Read Lampung Api 1 KORINTUS 13 Bible Online

1 KORINTUS 13 - Lampung Api bible

1 KORINTUS 13

¹Meskipun nyak dapok cawa jama lamon macam bahasa manusia, bahkan jama bahasa malaikat sekalipun, kidang nyak mak mengasihi jelma bareh, maka cawa-cawaku ano angkah bunyi sai nyaring tanpa reti.

² Meskipun nyak pandai nyampaiko kabar jak Allah, rik ngerti sunyin hal sai relam-relam, rik pandai sunyin hal percaya nihan jama Allah in dapok nyani gunung malih, kidang nyak mak mengasihi jelma bareh, maka nyak mak bereti api-api!

³Meskipun sunyin sai kukedau, kusedekahko jama jelma mejerih, rik nyak nyerahko diri untuk disuah, kidang nyak mak mengasihi jelma-jelma bareh, maka sunyinni ano mak ngedok gunani sama sekali.

⁴Jelma sai mengasihi ulun-ulun bareh, sabar rik betik hati. Ia mak sesera, mak ngebuhung, mak mepungah.

⁵Ia mak angkuh, mak kasar, ia mak maksa ulun bareh untuk nutuk kehagani tenggalan, mak muneh geluk tesinggung, rik mak dendam.

⁶Jelma sai mengasihi ulun-ulun bareh, mak senang jama kejahatan, ia angkah senang jama kebetikan.

⁷Ia tahan ngehadapi sunyin hal rik haga percaya jama sai paling betik di unggal jelma; delom keadaan sai injuk repa pun juga jelma sai mengasihi udi mak pernah lebon harapanni rik sabar nunggu sunyin hal.

⁸Mak pernah haga wat waktu di dipa jelma mak perlu saling mengasihi. Tano inji wat jelma sai pandai nyampaiko kabar jak Allah, kidang kanah ia haga taru nyampaiko kabar ano. Tano wat sai pandai cawa delom bebagai bahasa sai aneh, kidang kanah ia haga taru cawa delom bahasa-bahasa ano. Tano wat jelma sai pandai lamon hal, kidang kanah api sai tian pandai ano haga dilupako.

⁹Mani, pengetahuan ram rik kesanggupan ram untuk nyampaiko kabar jak Allah, masih kurang sempurna.

¹⁰Kanah haga ratong waktuni Allah nyani sunyinni sempurna, rik sai mak sempurna udi haga lebon.

¹¹Waktu nyak masih lunik, nyak cawa injuk sanak lunik, nyak beperasaan injuk sanak lunik rik nyak bepiker injuk sanak lunik. Tano nyak radu dewasa, kelakuanku sai kekanak-kanakan radu kutokko.

¹²Api sai ram liak tano inji iado injuk halinu sai kabor di kaca. Kidang kanah ram haga jelas ngeliak langsung. Tano nyak makkung pandai sunyinni, kidang kanah nyak haga pandai sunyinni gegoh injuk Allah pandai sunyinni tentang diriku.

¹³Jadi, untuk saat inji wat telu hal sai ram harus tetap lakuko: percaya, beharap rik saling mengasihi. Sai paling penting jak keteluni ano iado mengasihi jelma-jelma bareh.