Read Lampung Api 1 KORINTUS 15 Bible Online

1 KORINTUS 15 - Lampung Api bible

1 KORINTUS 15

¹Rik tano, Puari-puari, nyak haga keti ingok luot jama Kabar Betik jak Allah sai kuberitako tumbai jama niku. Keti nerimani, rik percaya jama Almasih mani Kabar Betik ano.

²Kik keti nyating teguh jama api sai kukabarko ano, maka Kabar Betik ano nyelamatko keti; kecuali kik Puari percaya tanpa pengertian.

³ Api sai kusampaiko jama Puari-puari iado sai radu kuterima juga. Sai paling penting, injuk sai tetulis delom Alkitab, kusampaiko jama niku bahwa Almasih mati ulih dusa-dusa ram;

⁴ bahwa Ia dikubor, kidang kak raduni dihurikko luot waktu rani ketelu. Ano juga tetulis delom Alkitab.

⁵ Nyak ngeni pandai juga jama niku bahwa Almasih sai dihurikko luot ano nunjukko juga diri-Ni jama Petrus, rik kak raduni jama kerua belas rasul.

⁶Radu jak seno Ia nunjukko diri muneh jama lebih jak lima ratus jelma sai nutuk-Ni sekaligus. Lamon jak ulun-ulun udi masih hurik tano, angkah pepira jelma sai radu mati.

⁷Radu jak seno Almasih nunjukko diri juga jama Yakobus rik kak raduni jama sunyin rasul.

⁸ Paling akher nihan Ia nunjukko diri jama nyak juga — nyak sai injuk upi sai laher mak waktuni!

⁹ Nyak iado rasul Tuhan sai paling rendah. Nyak mak patut disebut rasul, mani nyak radu nganiaya jemaah-Ni Allah.

¹⁰Kidang mani rahmat-Ni Allah nyak jadi injuk keadaan nyak tano. Rik mak percuma Allah ngampuni nyak. Malah justru nyakdo sai beguai lebih keras jak sunyin rasul sai barehni. Kidang udi sebenorni lain usahaku; udi usaha-Ni Allah sai mengasihiku rik sai beguai jejama nyak.

¹¹Jadi, jak sapa pun keti nerima Kabar Betik udi — api ano jak nyak atau jak rasul-rasul sai bareh — ano mak jadi soal. Sai penting iado sekam ngabarko Kabar betik udi rik Puari percaya.

¹²Kik sai sekam kabarko ano iado bahwa Almasih radu dihurikko luot jak kematian, mengapi wat jak hantaramu sai cawa bahwa ulun mati mak haga dihurikko luot?

¹³Kik temon ulun mati mak haga dihurikko luot, udi retini Almasih juga mak dihurikko luot jak kematian.

¹⁴Rik kik seandaini Almasih mak dihurikko luot jak kematian, maka mak ngedok gunani sekam ngabarko api-api rik mak ngedok gunani muneh keti percaya, mani kepercayaanmu ano mak ngedok dasar api-api.

¹⁵Lebih jak udi, ternyata bahwa sekam bebuhung tentang Allah, mani sekam ngabarko bahwa Allah radu ngehurikko luot Almasih jak kematian, padahal Allah mak ngehurikko Ia luot — kik sangun benor ulun mati mak dihurikko luot!

¹⁶Mani kik ulun mati mak dihurikko luot, maka Almasih pun mak dihurikko luot jak kematian.

¹⁷Rik kik Almasih mak dihurikko luot maka kepercayaanmu angkah hanipi gaoh; udi retini keti masih delom keadaan bedusa rik mak ngedok harapan sama sekali.

¹⁸Udi retini muneh bahwa jelma-jelma Kristen sai radu mati, juga mak ngedok harapan.

¹⁹Kik pengharapan ram jama Almasih terbatas jama hurik ram di delom dunia inji gaoh, maka jak sunyin manusia di delom dunia inji, ramdo sai paling malang!

²⁰Kidang nyatani Almasih radu dihurikko luot jak kematian. Injido jaminan bahwa jelma-jelma sai radu mati haga dihurikko luot.

²¹Mani kematian kuruk mik delom dunia, liwat sai jelma, injuk reno juga hurik luot jak kematian dikeniko jama manusia, liwat sai jelma muneh.

²²Injuk repa sunyin manusia mati mani tegolong sai jama Adam, injuk reno juga sunyinni haga dihurikko, mani tegolong sai jama Almasih.

²³Kidang masing-masing haga dihurikko nurut gileranni; mula-mula Almasih; kak raduni kanah pada waktu Ia ratong luot, nyusul gileran jelma-jelma sai termasuk kedau-Ni Almasih.

²⁴Radu jak seno tejadido kiamat. Pada waktu ano Almasih haga naklukko sunyin pemerintahan, sunyin kekuasaan, rik sunyin kekuatan; raduni Ia haga nyerahko kekuasaan-Ni sebagai Raja, jama Allah, Bapa ram.

²⁵ Almasih haga terus memerintah sampai Allah nyani sunyin musuh Almasih takluk jama Almasih.

²⁶Musuh sai paling akher sai haga ditaklukko iado kematian.

²⁷ Delom Alkitab tetulis injuk reji, “Allah radu nyani sunyin hal takluk jama Ia.” Jelasdo bahwa sai dimaksud jama “sunyin hal” udi mak termasuk Allah tenggalan, sai nyani sunyin hal ano takluk jama Almasih.

²⁸Kidang seraduni sunyinni ditaklukko mik debah pemerintahan Almasih, maka Ia tenggalan yakdo Anak-Ni Allah, haga naklukko diri-Ni jama Allah sai radu nyani sunyinni takluk jama Ia. Maka Allah tenggalan pun haga memerintah sunyinni.

²⁹Kik ulun mati mak dihurikko luot, mengapi wat jelma sai dibaptis untuk ulun mati? Untuk api tian ngelakuko hal ano? Kik sangun jelma mati sama sekali mak haga dihurikko luot, untuk api tian ngelakuko hal ano?

³⁰Rik untuk api muneh sekam haga ngehadapi bahaya unggal waktu?

³¹Puari-puari! Unggal rani nyak tahan menderita mani nyak bangga atas hurikmu mani keti radu percaya jama Isa Almasih, Tuhan ram.

³² Kik udi angkah jak segi manusia gaoh, api untungni bagiku untuk bejuang seolah-olah ngelawan binatang-binatang buas di kota inji, di Efesus? Kik sangun ulun mati mak dihurikko luot, nah, lebih betik ram nutuk peribahasa inji: “Ija ram mengan-nginum rik besenang-senang, mani jemoh ram haga mati juga.”

³³Dangdo ketipu! Pergaulan sai burak nyadangko akhlak sai betik.

³⁴Sadardo tano, rik dang lagi nyani dusa. Sepantasni keti haga meliom, bahwa di hantaramu wat sai makkung kenal jama Allah.

³⁵Mungkin wat sai betanya, “Injuk repa ulun mati dihurikko luot? Badan sai injuk repa sai dikeni jama tian, seraduni tian dihurikko luot?”

³⁶Bugu nihan! Kik Puari nanom benih di delom tanoh, benih udi mak haga tuoh, kik benih udi makkung mati pai.

³⁷Rik benih sai Puari tanom di delom tanoh udi — mungkin benih gandum atau benih barehni — iado biji benih udi gaoh, lain sunyin tanomanni sai haga tuoh kanah.

³⁸Allah tenggalan sai haga ngeniko jama benih udi bantuk sai nutuk pandangan-Ni betik untuk tanoman ano. Untuk unggal macam benih, Allah ngeniko bantuk tanomanni tenggalan-tenggalan.

³⁹Badan makhluk-makhluk sai benyawa mak sunyinni gegoh. Manusia ngedok sejenis badan, binatang-binatang ngedok badan sai bareh; burung-burung lain muneh jenis badanni, rik iwa-iwa lain muneh jenis badanni.

⁴⁰Injuk reno muneh jama benda-benda sai di langit rik benda-benda sai di bumi. Benda-benda sai di langit masing-masing ngedok keindahanni tenggalan, rik benda-benda sai di bumi pun injuk reno muneh.

⁴¹Keindahan matarani lain jak keindahan bulan. Bintang-bintang pun ngedok keindahanni tenggalan. Malah bintang-bintang udi masing-masing berlain-lainan muneh keindahanni.

⁴²Injuk reno halni kanah jama ulun-ulun mati sai dihurikko luot. Badan sai dikubor udi iado badan sai dapok busuk, kidang badan sai dihurikko luot, yakdo badan sai mak dapok cadang.

⁴³Pada waktu badan udi dikuborko, badan udi burak rik lemoh; kidang pada waktu ia dihurikko luot, ia iado badan sai helau rik kuat.

⁴⁴Pada waktu dikuborko, badan udi badan jak dunia; kidang seraduni hurik luot, maka badan udi badan sai dikeni ulih Ruh-Ni Allah. Wat badan jak dunia, wat juga badan sai jak Allah.

⁴⁵ Delom Alkitab tetulis injuk reji, “Manusia sai mula-mula, yakni Adam, jadi makhluk sai hurik,” kidang Adam sai terakher yakdo Ruh sai ngeni hurik.

⁴⁶Sai ratong lebih mena iado sai jasmani, lain sai rohani. Sai rohani ratong kak raduni.

⁴⁷Adam sai mula-mula dijadiko jak tanoh, kidang Adam sai kerua asalni jak surga.

⁴⁸Jelma-jelma dunia inji iado injuk Adam sai mula-mula, sai dijadiko jak tanoh, kidang jelma-jelma surga iado injuk Ia sai ratong jak surga.

⁴⁹Injuk repa ram tano iado injuk Adam sai dijadiko jak tanoh, maka kanah ram haga jadi injuk Ia sai jak surga udi.

⁵⁰Maksudku, Puari-puari, iado: badan sai dijadiko jak rah rik daging, mak dapok kuruk Dunia Ampai Allah; rik badan sai dapok mati mak dapok jadi abadi.

⁵¹ Perhatikodo rahasia inji: Mak sunyinni ram haga mati, kidang ram sunyinni haga berubah.

⁵²Hal seno haga tejadi tiba-tiba delom sekejap mata, waktu trumpet dibunyiko untuk paling akher kalini. Mani pada waktu kedengian bunyi trumpet ano, ulun-ulun mati haga dihurikko luot jama badan sai abadi, rik ram sunyinni haga diubah.

⁵³Badan ram sai dapok mati inji haga diganti jama badan sai mak dapok mati, rik badan sai jak dunia haga diganti jama badan sai jak surga.

⁵⁴ Kik badan sai dapok mati radu diganti jama badan sai mak dapok mati, rik badan sai jak dunia haga diganti jama badan sai jak surga, waktu seno ampaido tejadi api sai tetulis delom Alkitab, “Kematian radu dibasmi; kemenangan radu dicapai!”

⁵⁵ “Hai maut, di dipa kemenanganmu? Hai maut, di dipa bisamu?”

⁵⁶Bisa maut iado dusa, rik dusa ngejalanko perananni liwat hukum agama.

⁵⁷Kidang syukor jama Allah; Ia ngeniko jama ram kemenangan liwat Isa Almasih Tuhan ram!

⁵⁸Ulihni seno, Puari-puari sai tecinta, hagani keti kuat rik teguh. Beguaido terus untuk Tuhan jama temon-temon, mani keti pandai bahwa sunyinni sai keti guaiko untuk Tuhan, mak percuma.