Read Lampung Api 1 KORINTUS 16 Bible Online

1 KORINTUS 16 - Lampung Api bible

1 KORINTUS 16

¹ Tano soal duit sai keti haga sumbangko jama peperda ulun Kristen, kuanjurko in keti guaiko sesuai petunjuk sai kukeniko jama jemaah-jemaah di Galatia.

²Di rani mula-mula unggal minggu, hagani Puari sunyinni nyisihko duit, masing-masing nutuk penghasilanni. Segokko duit udi sampai nyak ratong, in pada waktu seno mak perlu lagi dikumpulko.

³Kanah kik nyak sampai, nyak haga ngutus jelma-jelma sai radu keti setujui. Nyak haga ngeniko jama tian surat pengantar, in tian ngusung duit sumbangan udi mik Yerusalem.

⁴Rik kik keliakanni betik bahwa nyak mik muneh jama tian, maka nyak haga mik jama-jama tian.

⁵ Nyak haga napol keti seraduni ngeliu Makedonia, mani nyak beniat untuk liu di disan.

⁶Halokni nyak haga tinggal serebok jama keti, halokni selama musim ngison. Radu jak seno keti dapok ngebantu nyak nerusko lapahni selanjutni.

⁷Nyak mak haga napol keti sekadar singgah gaoh. Kik Tuhan ngizinko, nyak mirak tinggal agak mesaka jama keti.

⁸ Sementara ano nyak haga tinggal di kota inji, di Efesus, sampai rani Pentakosta.

⁹Lamon kesempatan di dija untuk guai-guai sai bemanfaat, meskipun lamon juga jelma sai nantang.

¹⁰ Kik Timotius ratong, sambut betikdo ia in ia ngerasa betah di hantara keti, mani ia injuk nyak juga beguai untuk Tuhan.

¹¹Dang sampai wat sai ngeremehko ia. Tulungdo ia in ia dapok nerusko lapahni muloh selamat jama nyak, mani nyak nunggu ratongni jejama jama puari-puari sai barehni.

¹²Tentang puari ram Apolos, radu pira kali nyak nganjurko ia in ia jejama puari sai barehni napol keti. Kidang ia makkung ngerasa yakin bahwa ia haga mik tano. Kidang kik wat kesempatan kanah, tantu ia haga ratong.

¹³Hagani keti waspada rik teguh delom hurikmu sebagai jelma Kristen. Betindakdo bani rik jadido kuat.

¹⁴Sunyin sai keti lakuko, lakukodo jama kasih.

¹⁵ Puari tantuni kenal jama Stefanas rik keluargani; tian sai mula-mula jadi Kristen di Akhaya. Tian jama sepenuh hati beguai khusus untuk ngelayani umat Allah.

¹⁶Kuanjurko temon-temon in keti nutuk pimpinan jelma-jelma sai injuk ano, rik jelma-jelma bareh sai beguai jama-jama rik ngelayani jejama tian.

¹⁷Nyak senang atas ratongni Stefanas, Fortunatus rik Akhaikus. Tian ngerupako pengganti keti bagiku.

¹⁸Tian radu nyani hatiku jadi senang, injuk tian nyenangko hatimu. Jelma-jelma injuk seno haga dihargai.

¹⁹ Jemaah-jemaah di Asia nyampaiko salam tian jama keti. Akwila rik Priskila rik jemaah sai bekumpul di lamban tian pun ngirim salam Kristen sai mesra.

²⁰Sunyin puari di dija nyampaiko salam jama keti. Besalam-salamdo jama mesra sebagai puari Kristen.

²¹Kutambahko di dija salam sai kutulis tenggalan: Salam jak nyak, Paulus.

²²Jelma sai mak mengasihi Tuhan, tagando ia tekutuk! Maranatha — Tuhan sekam, ratongdo!

²³Semoga Tuhan Isa ngeberkati Puari.

²⁴Teriring kasih jama Puari sunyinni sai besatu jama Isa Almasih. Hormat sekam, Paulus