Read Lampung Api 1 KORINTUS 2 Bible Online

1 KORINTUS 2 - Lampung Api bible

1 KORINTUS 2

¹Puari-puari! Waktu nyak ratong jama niku rik ngabarko jama niku tentang rencana-Ni Allah sai makkung dipandai ulih dunia, nyak mak makai kebijaksanaan dunia inji atau cawa jama cawa sai muluk-muluk.

²Mani nyak radu betekad bahwa selama nyak wat jejama keti, nyak mak haga ngemukako api-api, selain tentang Isa Almasih; khususni bahwa Ia radu mati disalib.

³ Waktu nyak wat jama keti, nyak lemoh rik gegoran kerabaian.

⁴Kabar sai kusampaiko jama niku mak kusampaiko jama cawa-cawa sai memikat nutuk kebijaksanaan manusia. Nyak nyampaiko ano jama cara sai ngebuktiko bahwa Ruh-Ni Allah bekuasa.

⁵Nyak bebuat injuk reno, in kepercayaanmu jama Almasih mak bedasarko kebijaksanaan manusia, melainko bedasarko kuasa-Ni Allah.

⁶Walaupun injuk reno, di hantara jelma-jelma sai kehurikan rohanini radu mesak, nyak sangun cawa tentang kebijaksanaan. Kidang kebijaksanaan inji lain hak kebijaksanaan dunia, atau kebijaksanaan jelma-jelma sai bekuasa zaman inji, sai kekuasaanni haga lebon.

⁷Kebijaksanaan sai kukemukako inji iado kebijaksanaan jak Allah. Kebijaksanaan udi mak dipandai ulih dunia, kidang Allah radu nyediakoni untuk kebahagiaan ram semakkung dunia inji dijadiko.

⁸Mak sai jelma pun jak jelma-jelma sai bekuasa zaman inji sai pandai tentang kebijaksanaan ano. Mani, seandaini tian radu pandai, tantu tian mak haga nyalibko Tuhan sai mulia udi.

⁹ Sebalikni hal udi yakdo injuk sai tetulis delom Alkitab, “Api sai mak pernah diliak atau didengi ulih manusia, rik mak pernah muneh timbul delom pikeran manusia, udido sai disediako Allah untuk jelma-jelma sai mengasihi-Ni.”

¹⁰Kidang Allah radu nyatakoni jama ram liwat Ruh-Ni. Ruh-Ni Allah udi nyelidiki sunyin hal, sampai jama rencana-rencana-Ni Allah sai paling tesegok sekalipun.

¹¹Mani sai ngemandai isi hati sai jelma yakdo ruh ulun udi tenggalan, kan? Injuk reno juga tentang Allah. Sai pandai isi hati-Ni Allah angkah Ruh-Ni Allah tenggalan!

¹²Rik ram mak dikeni ruh dunia inji, melainko Ruh sai jak Allah, in ram pandai sunyin sai radu dianugerahko Allah jama ram.

¹³Ulihni seno, kik sekam ngejelasko hal-hal tentang Allah jama ulun-ulun sai ngedok Ruh-Ni Allah, sekam mak ngemukako nutuk kebijaksanaan manusia, melainko nutuk ajaran Ruh-Ni Allah.

¹⁴Jelma sai mak ngedok Ruh-Ni Allah, mak dapok nerima api sai dinyatako ulih Ruh-Ni udi. Mani bagi ulun udi hal-hal tersebut injuk suatu kebuguan gaoh. Ulun udi mak dapok ngerti, mani hal-hal udi angkah dapok dinilai secara rohani.

¹⁵Ulun sai ngedok Ruh-Ni Allah dapok menilai sunyin hal, kidang mak sai jelma pun berhak menilai ia.

¹⁶ Delom Alkitab tetulis, “Sapa sai pandai pikeran-Ni Tuhan? Rik sapa sai dapok ngeni petuah-Ni?” Ramdo sai ngedok pikeran sai gegoh jama Almasih!