Read Lampung Api 1 KORINTUS 3 Bible Online

1 KORINTUS 3 - Lampung Api bible

1 KORINTUS 3

¹Puari-puari, sebenorni nyak mak dapok cawa jama keti injuk jama jelma sai ngedok Ruh-Ni Allah. Nyak angkah dapok cawa jama niku injuk jama jelma sai masih hurik nutuk kehagani dunia; injuk jama jelma sai masih upi delom kepercayaanni jama Almasih.

² Tumbai nyak angkah dapok ngeniko jama niku kanikan upi, lain kanikan ulun dewasa; mani keti makkung cukup kuat untuk seno. Kidang tano pun keti masih makkung kuat untuk seno,

³mani keti masih hurik nutuk tabiatmu secara manusia. Mani kik keti masih sesera rik rigu peperda keti, bukankah udi nunjukko bahwa keti masih hurik nutuk tabiat manusia, injuk jelma-jelma sai mak kenal jama Allah?

⁴ Kik wat sai cawa, “Sekam nutuk Paulus,” rik sai bareh cawa, “Nyak nutuk Apolos,” bukankah ano nunjukko bahwa kelakuan Puari injuk jelma-jelma dunia?

⁵Sebenorni sapa Apolos udi? Rik sapa Paulus? Sekam angkah jelma-jelma sai ngebantu Allah, sai radu ngebimbing keti untuk percaya jama Almasih. Sekam angkah ngejalanko guai sai ditugasko Tuhan jama sekam masing-masing.

⁶ Nyak nanom rik Apolos nyiram, kidang Allah tenggalando sai nyani tanomanni tuoh.

⁷Jadi sai penting iado Allah, mani Iado sai nuohkoni. Sai nanom rik sai nyiram mak penting;

⁸tian rua sederajat. Masing-masing haga nerima upah nutuk jerih payahni.

⁹Sekam iado jelma sai jejama beguai untuk Allah; rik keti iado injuk kebun Allah. Puari-puari iado injuk gedung Allah juga.

¹⁰Jama kepandaian sai dikeniko Allah, nyak sebagai ahli bangunan radu ngepikko pondasi untuk gedung ano, rik ulun bareh ngebangun gedung di atas pondasi ano. Unggal jelma harus memperhatiko betik-betik injuk repa ia ngebangun di atas pondasi ano.

¹¹Mani Allah tenggalan radu ngepikko Isa Almasih sebagai satu-satuni pondasi untuk gedung ano; mak ngedok pondasi sai bareh.

¹²Wat sai ngebangun di atas pondasi ano jama memakai emas, wat sai makai perak, wat sai makai batu permata, wat muneh sai makai kayu, jukuk nyangu ataupun jerami.

¹³Guai unggal jelma haga keliakan kanah pada saat Almasih ratong luot. Mani waktu rani udi apui haga nyani keliakan guai masing-masing jelma. Apui haga nguji rik nantuko mutu jak guai udi.

¹⁴Kik gedung sai didiriko jelma di atas pondasi ano tahan disuah apui, ulun udi haga nerima hadiahni.

¹⁵Kidang kik guaini ulun tesuah, ia haga rugi; ia tenggalan haga selamat, kidang injuk jelma sai lulos nerubos apui.

¹⁶ Pandai mak Puari bahwa keti anodo Lamban Ibadah? Rik bahwa Ruh-Ni Allah tinggal di delom keti?

¹⁷Kik wat sai nyadangko Lamban Ibadah, Allah pun haga nyadangko ulun udi. Mani Lamban Ibadah yakdo khusus untuk Allah gaoh, rik ketido lamban udi.

¹⁸Dangdo sai jelma pun nipu dirini tenggalan. Kik wat jelma di hantaramu ngerasa dirini bijaksana nutuk ukoran dunia inji, ulun udi harus jadi bugu, in ia jadi benor-benor bijaksana.

¹⁹ Mani sai dianggap bijaksana ulih dunia iado bugu pada pandangan Allah. Delom Alkitab tetulis, “Allah ngejebak jelma-jelma bijaksana delom kecerdikan tian tenggalan.”

²⁰ Wat tetulis injuk reji juga, “Tuhan pandai bahwa pikeran jelma-jelma bijaksana iado pikeran sai mak beguna.”

²¹Ulihni seno, dang sai jelma pun nyanjung-nyanjung manusia, mani sunyinni radu dikeniko jadi kedaumu:

²²Paulus, Apolos, Petrus, dunia inji, kehurikan rik kematian, zaman inji ataupun zaman sai haga ratong, sunyinni iado kedaumu.

²³Rik keti iado kedau-Ni Almasih, rik Almasih kedau-Ni Allah.