Read Lampung Api 1 KORINTUS 5 Bible Online

1 KORINTUS 5 - Lampung Api bible

1 KORINTUS 5

¹ Nyak sebenorni radu nerima laporan bahwa di hantaramu wat perbuatan-perbuatan hajor sai terlalu nihan: Wat jak hantara Puari sai bezinah jama emak tirini. Jelma-jelma sai mak kenal jama Tuhan pun mak ngelakuko injuk reno!

²Walaupun injuk reno, Puari masih tinggi hati. Sebalikni Puari seharusni sedih, rik ngeluahko jak hantara Puari jelma sai ngelakuko hal ano.

³Secara laher nyak jaoh jak keti, kidang secara batin nyak wat di tengah-tengah keti. Jadi, nyak haga betindak seolah-olah nyak wat di hantaramu, “Atas gelar-Ni Tuhan Isa Almasih, kunyatako bahwa jelma sai radu ngelakuko perbuatan sai injuk reno kamak, harus dihukum!” Kik keti bekumpul anggapdo bahwa nyak hadir di hantaramu, rik jama kuasa-Ni Tuhan ram Isa,

⁵keti harus nyerahko ulun udi jama iblis in badan ulun udi binasa rik jama injuk reno ruhni diselamatko waktu-Ni Tuhan ratong luot.

⁶ Mak patut keti ngerasa mepungah. Halokni keti radu kenal jama peribahasa inji, “Ragi sai cutik nyani seluruh adonan cakak!”

⁷ Tokko pai ragi saka udi, yakdo ragi dusa, in keti jadi injuk adonan sai ampai, mekecah jak ragi dusa sai saka rik nyak pandai bahwa keti sangun injuk reno. Mani, perayaan Paskah ram radu siap, mani Almasih sai jadi sebagai biri-biri Paskah ram, radu dikurbanko.

⁸ Jadi, ija ram ngerayako pesta ram udi jama ruti sai mak beragi, yakdo ruti sai melambangko kemurnian rik sunyin sai bekenan di hati-Ni Allah. Dang ram ngerayako pesta Paskah udi jama ruti sai ngisi ragi sai saka, yakdo ragi dusa rik kejahatan.

⁹Di delom suratku sai radu, nyak ngeni pandai jama niku in dang begaul jama jelma hajor.

¹⁰Sai kumaksudko lain hak jelma hajor atau tamak, atau jelma sai nipu atau jelma sai nyumbah berhala sai sama sekali mak kenal jama Allah. Lain! Nyak mak maksudko tian; mani kik keti harus ngejaohi tian, maka tantuni keti perlu luah sama sekali jak dunia inji.

¹¹Maksudku iado, bahwa keti dang begaul jama jelma sai ngaku dirini ulun Kristen, kidang ulun udi hajor, atau tamak, atau penyumbah berhala, atau gering ngeburak-burakko jelma bareh, atau jelma sai mabuk, ataupun pemaling. Mejong mengan jama ulun udi pun dang!

¹² Sangun ngadili jelma-jelma lain Kristen lain hak urusanku. Allah tenggalando sai haga ngadili tian. Kidang mengenai anggota-anggota jemaahmu, bukankah keti tenggalan sai harus ngadili tian? Delom Alkitab tetulis, “Userdo jelma jahat jak hantaramu.”