Read Lampung Api 1 KORINTUS 6 Bible Online

1 KORINTUS 6 - Lampung Api bible

1 KORINTUS 6

¹Mengapi wat di hantara keti sai bani mik jama hakim sai mak kenal jama Allah, untuk ngaduko puari seiman, kik ia beselisih jama puarini udi? Mengapi ia mak ngilu umat-Ni Allah nyelesaiko perkara udi?

²Api keti mak pandai bahwa umat-Ni Allah haga ngadili dunia inji? Jadi, kik sangun keti haga ngadili dunia inji, api keti mak sanggup nyelesaiko perkara-perkara pengadilan sai mak bereti?

³Api keti mak pandai bahwa ram haga ngadili malaikat-malaikat? Lebih-lebih lagi perkara-perkara kehurikan serani-rani!

⁴Maka kik timbul perkara-perkara injuk ano, api keti ngajukoni jama jelma-jelma sai mak ngedok kedudukan sama sekali delom jemaah?

⁵Ngeliamko nihan! Tantu di hantaramu wat sai jelma sai cukup bijaksana untuk nyelesaiko perselisihan hantara puari-puari sai peperda Kristen!

⁶Kidang sebalikni sai jelma Kristen mik jama jelma lain Kristen untuk ngaduko perkarani tehadap puarini sai Kristen!

⁷Dang mik beperkara jama jelma lain Kristen; wat perselisihan-perselisihan di hantaramu pun radu merupako sai hal kekalahan bagimu. Lebih betik keti diperlakuko mak adil, atau dirugiko!

⁸Kidang keti tenggalan malah sai memperlakuko jelma bareh jama mak adil. Keti tenggalan juga sai ngerugiko ulun bareh. Rik udi keti lakuko justru tehadap puari-puari seiman!

⁹Pandai mak keti bahwa jelma-jelma sai mak nutuk kehaga-Ni Allah, mak haga jadi anggota umat-Ni Allah? Dang tetipu! Jelma-jelma sai bebuat hajor, jelma-jelma sai nyumbah berhala, sai bezinah, sai ngelakuko perbuatan sai ngeliamko tehadap peperda jenisni,

¹⁰sai maling, sai serakah, sai jelma sai mabuk, sai gering ngeburak-burakko ulun bareh, rik sai memeras ulun bareh — sunyin jelma injuk reno mak haga jadi anggota umat-Ni Allah.

¹¹Pira-pira di hantaramu tumbai kelakuanni injuk reno. Kidang tano keti dinyatako mekecah jak dusa. Keti radu jadi kedau-Ni Allah sai khusus. Keti radu muloh mebetik luot jama Allah, mani keti percaya jama Tuhan Isa Almasih rik mani kuasa-Ni Ruh jak Allah ram.

¹² Wat sai cawa bahwa unggal jelma ngasi ngelakuko sunyin hal. Kidang bagiku mak sunyinni beguna. Jadi walaupun nyak ngasi ngelakuko api gaoh, kidang nyak mak haga naganko diriku dikuasai ulih api pun.

¹³Wat juga sai cawa bahwa kanikan iado untuk tenai, rik tenai disediako untuk kanikan. Kidang rua-ruani ano haga dibinasako ulih-Ni Allah. Badan manusia mak ngasi dipakai untuk mengadako hubungan sai hajor, kidang angkah untuk ngelayani Tuhan. Rik Tuhan haga memelihara badan ano.

¹⁴Allah radu ngehurikko Tuhan Isa jak kematian, injuk reno juga Allah haga ngehurikko ram jama kuasa-Ni.

¹⁵Puari-puari pandai bahwa badanmu iado anggota badan-Ni Almasih. Jadi api ngasi nyak ngakuk sai anggota badan Almasih raduni ngejadikoni anggota badan sai jelma sai ngelacorko diri? Sekali-kali mawat!

¹⁶ Atau kintu keti makkung pandai bahwa jelma sai becampor jama jelma sai ngelacorko diri, jadi sai jama jelma sai ngelacorko diri udi! Mani delom Alkitab tetulis, “Keruani jadi sai.”

¹⁷Kidang jelma sai menyatuko dirini jama Tuhan, Ruh Tuhan rik ruh jelma udi jadi sai.

¹⁸Jaohido perbuatan-perbuatan sai hajor. Mani sunyinni dusa bareh sai dilakuko jelma, tejadi di luah badanni ulun udi. Kidang jelma sai bebuat sai hajor, retini bebuat dusa tehadap badanni tenggalan.

¹⁹ Keti harus pandai bahwa badanmu iado rang tinggal-Ni Ruh Allah. Ruh udi tinggal di delom keti. Rik Allah tenggalando sai ngeniko Ruh udi jama niku. Diri Puari lain kedaumu. Udi kedau-Ni Allah.

²⁰Allah radu ngebeli keti rik radu ngebayarni lunas. Ulihni seno, pakaido badanmu sedemikian rupa in Allah dimuliako.