Read Lampung Api 1 KORINTUS 9 Bible Online

1 KORINTUS 9 - Lampung Api bible

1 KORINTUS 9

¹Bukankah nyak jelma bebas? Bukankah nyak rasul? Api nyak makkung ngeliak Isa, Tuhan ram? Api keti lain hak hasil guaiku untuk Tuhan?

²Kik jelma-jelma bareh mak haga ngaku nyak sebagai rasul, paling cutik keti ngakui ano! Mani hurikmu sebagai ulun Kristen iado bukti bahwa nyak ajo rasul.

³Kik ulun ngeritik nyak, nyak haga ngejawab injuk reji:

⁴Api nyak mak berhak nerima kanikan rik inuman ulihni guaiku?

⁵Api nyak mak berhak ngusung sai inggom Kristen jama-jama nyak delom lapahku, injuk sai dilakuko ulih puari-puari Tuhan Isa rik ulih rasul-rasul barehni, termasuk Petrus?

⁶Atau angkah Barnabas rik nyak gaoh sai diharusko nyepok nafkah tenggalan?

⁷Mak ngedok anggota tentera sai harus ngebiayai dirini tenggalan di delom angkatan perang! Mak ngedok petani sai nanom anggor di kebunni raduni mak nganik hasil anggor jak kebun ano! Mak ngedok gembala sai memelihara biri-biri, raduni mak nginum susu jak biri-birini udi!

⁸Nyak ngemukako ano lain angkah bedasarko sai biasa-biasa delom pengalaman serani-rani, kidang mani Alkitab ngemukako hal ano juga.

⁹ Di delom Bukuni Musa tetulis, “Jawi sai sedang ngilik-ngilik gandum untuk ngelepasko biji gandum jak tangkai-tangkaini, dang disalok bangukni.” Jawi kedo sai diperhatiko Allah?

¹⁰Atau seno dimaksudko untuk ram? Sangun ano tetulis untuk ram. Mani jelma sai ngeguaiko kebun rik jelma sai ngecahko gandumni radu selayakni beguai jama harapan untuk nerima sebagian jak hasil guaianni.

¹¹ Sekam radu nabor benih rohani di delom hurikmu. Maka kik sekam menuai berkat-berkat barang jak keti, api ano retini sekam nuntut terlalu lamon jak keti?

¹²Kik jelma-jelma bareh berhak ngeharapko inji jak keti, bukankah sekam lebih berhak lagi jak tian? Kidang nyak makkung ngegunako hak seno. Sebalikni nyak lebih gering nanggung sunyin hal jak nimbulko suatu hal sai ngehalangi penyebaran Kabar Betik tentang Almasih.

¹³ Puari tantu pandai bahwa jelma sai beguai di delom Lamban Ibadah nerima kanikan tian jak Lamban Ibadah. Rik jelma-jelma sai ngurus rang persembahan kurban, mansa sebagian jak kurban sai dipersembahko di dudi.

¹⁴ Injuk reno juga Tuhan radu nantuko bahwa jelma sai ngabarko Kabar Betik udi harus mansa nafkahni jak pemberitaan ano.

¹⁵Kidang makkung pernah nyak makai sai pun jak hak-hak ano. Rik nyak nulis surat inji lain juga jama maksud in hal-hal udi dilakuko tano tehadap nyak. Lebih baik nyak mati daripada kelebonan hal sai kubanggako ano.

¹⁶Mani, kik seno angkah soal ngeberitako Kabar Betik jak Allah, maka nyak mak berhak ngerasa bangga, mani Allah radu merintahko nyak untuk ngelakukoni. Celakado nyak, kik nyak mak ngabarko Kabar Betik udi!

¹⁷Seandaini nyak ngejalanko guai udi atas kehagaku tenggalan, maka nyak ngasi ngeharap untuk mansa upah. Kidang nyak ngabarko Kabar Betik udi justru mani diwajibko. Nyak ditugasko ulih-Ni Allah untuk ngelakuko ano.

¹⁸Kik injuk reno, upahku api? Inji upahni: bahwa nyak dapok ngabarko Kabar Betik udi tanpa ngebiakko sai jelma pun untuk ngebiayai nyak, mani nyak mak nuntut hak-hakku sebagai jelma sai ngabarko Kabar Betik udi.

¹⁹Nyak inji lain jelma sai ngebantu sapa pun; nyak bebas. Walaupun injuk reno, nyak radu ngejadiko diriku inji jelma sai ngebantu sunyin jelma. Kuguaiko ano in nyak dapok menangko selamon mungkin jelma untuk Almasih.

²⁰Tehadap jelma Yahudi, kelakuanku sebagai jelma Yahudi in nyak dapok menangko jelma Yahudi untuk Almasih. Tehadap jelma-jelma sai hurik nutuk hukumni Musa, kelakuanku seolah-olah nyak teikok pada hukum ano, walaupun nyak sebenorni mak teikok jama ia. Kulakuko ano in nyak dapok narik tian jadi jelma sai nutuk Almasih.

²¹Tehadap jelma lain Yahudi, kelakuanku injuk jelma lain Yahudi, sai hurik di luah hukum Musa. Kulakuko udi in nyak dapok narik tian jadi jelma sai nutuk Almasih. Kidang ano mak bereti bahwa nyak mak taat jama perintah-perintah Allah; nyak justru dikuasai ulih perintah-perintah-Ni Almasih.

²²Di tengah-tengah jelma sai keyakinanni mak kuat, kelakuanku pun injuk sai jelma sai keyakinanni mak kuat, in nyak dapok narik tian jadi jelma sai nutuk Almasih. Pendekni, nyak jadi sunyinni untuk sunyinni jelma in jama cara sai repa pun juga nyak dapok nyelamatko sebagian jak tian.

²³Sunyinni ano kulakuko untuk Kabar Betik jak Allah udi, in nyak juga diberkati.

²⁴Puari tantu pandai bahwa di delom perlumbaan sunyin peserta nutuk tegar, kidang angkah sai jelma nerima hadiahni. Ulih sebab ano tegardo sekuat-kuatni sehingga Puari nerima hadiahni.

²⁵Unggal jelma sai sedang delom latihan, nahan diri delom sunyin hal. Ia ngelakuko ano mani ia mirak dikalungko jama karangan bunga kejuaraan, yakdo kumbang sai geluk haga layu. Kidang ram inji nahan diri delom geluk hal mani ram haga dikalungko jama karangan bunga sai mak haga layu.

²⁶Udi sebabni nyak tegar jama tujuan sai tantu. Injuk delom pertandingan tinju, nyak mak mukul sembarangan.

²⁷Nyak naganko badanku digembleng keras sampai nyak dapok nguasaini. Nyak bebuat injuk reno, mani nyak mak haga sampai tejadi bahwa radu jak nyak ngurau ulun bareh nutuk delom perlumbaan seno, nyak tenggalan ditulak.