Read Lampung Api 2 KORINTUS 1 Bible Online

2 KORINTUS 1 - Lampung Api bible

2 KORINTUS 1

¹ Puari-puari! Jemaah-Ni Allah di Korintus rik sunyin umat-Ni Allah di seluruh Akhaya. Nyak, Paulus, rasul Isa Almasih, sai diangkat atas kehaga-Ni Allah, jejama jama Puari ram Timotius,

²ngeharap semoga Allah Bapa ram rik Tuhan Isa Almasih ngeni berkat rik sejahtera jama keti.

³Terpujido Allah, Bapa jak Tuhan ram Isa Almasih. Ia Bapa sai betik hati nihan, rik Ia Allah sai ngeniko kekuatan hati jama manusia.

⁴Ia nguatko hati sekam delom unggal kepayahan sai sekam alami, in jama kekuatan sai sekam terima jak Allah udi, sekam pun dapok nguatko hati sunyinni jelma sai delom kesusahan.

⁵Penderitaan-penderitaan sai dialami ulih-Ni Almasih radu lamon sekam alami juga. Rik liwat Almasih muneh, hati sekam dikuatko nihan.

⁶Kik sekam ngalami kepayahan, udido untuk nguatko hatimu, demi keselamatanmu. Kik hati sekam dikuatko, maka keti nutuk dikuatko, sehingga keti jadi tabah delom kepayahan-kepayahan injuk sai sekam pun derita juga.

⁷Sekam selalu yakin rik mak pernah ragu-ragu tentang Puari, mani sekam pandai bahwa keti nutuk menderita jama sekam. Rik ulih sebab udi keti nutuk juga dikuatko jejama sekam.

⁸ Puari-puari! Sekam haga keti pandai tentang kepayahan sai sekam alami di wilayah Asia. Penderitaan sai sekam tanggung udi terlalu biak nekan sekam sehingga sekam radu mak ngeharap luot hurik;

⁹rasani injuk radu dijatuhko hukum mati gaoh. Kidang hal udi tejadi in sekam dang besandar jama kekuatan diri tenggalan, melainko jama Allah sai ngehurikko ulun mati.

¹⁰Iado sai radu nyelamatko sekam jak bahaya kematian sai balak udi. Rik Iado juga sai haga nyelamatko sekam kanah di rani sai haga ratong, mani jama Iado sekam beharap.

¹¹Sekam yakin bahwa jama dua-duamu untuk sekam, Allah haga nyelamatko sekam luot jak bahaya. Allah bekenan ngeberkati sekam sebagai jawaban atas lamon dua untuk sekam, rik ulihni seno lamon jelma haga ngucapko terima kasih jama Allah.

¹²Sekam bangga, mani hati sekam ngeyakinko sekam bahwa hurik sekam di dunia inji — terutama hubungan sekam jama Puari — radu sekam jalanko jama ikhlas rik murni. Sekam ngelakuko ano, lain jama kebijaksanaan manusia, kidang jama kemampuan sai dikeniko Allah.

¹³Sai sekam tulis jama niku iado angkah mengenai hal-hal sai dapok keti baca rik ngerti. Tano keti mak ngerti sekam sepenuhni, kidang kuharap kanah keti haga temon-temon ngerti sekam. Jama injuk reno, waktu Tuhan Isa ratong kanak, keti haga bangga atas sekam, injuk repa sekam pun bangga atas keti.

¹⁵Ulihni keyakinan senodo maka nyak pada mulani ngerencanako untuk napol keti in keti dapok berkat rua kali lipat.

¹⁶ Nyak bemaksud napol keti delom lapahku mik Makedonia rik singgah luot jama niku delom lapahni lagi, in keti dapok ngebantu nyak nerusko lapah mik Yudea.

¹⁷Kidang nyak radu ngubah niatku ano; nah, api kedo ano nunjukko bahwa pendirianku mak kuat? Waktu nyani rencana, api kedo nyak nyani rencana nutuk kehagaku tenggalan, serebok cawa, “Ya”, rik serebok “Mawat”?

¹⁸Demi Allah sai dapok dipercaya, janjiku jama Puari lain hak “Ya” rik “Mawat”.

¹⁹ Mani Isa Almasih, Anak Allah, sai diberitako jama niku ulih Silas, Timotius, rik ulihku tenggalan lain hak jelma “Ya” rik “Mawat”. Sebalikni Ia ngerupako jawaban “Ya” jak Allah.

²⁰Mani liwat Ia Allah radu nyatako “Ya” tehadap sunyin janji-Ni. Bedasarko renodo ram ngucapko “Amin” jama Allah ulihni Isa Almasih. Sekam bebuat injuk reno in Allah dimuliako.

²¹Allah tenggalando sai nyani sekam rik Puari kuat besatu jama Almasih; Iado juga sai milih ram khusus untuk diri-Ni.

²²Untuk seno Allah radu ngesahko ram jadi kedau-Ni rik ngeniko Ruh-Ni di delom hati ram sebagai jaminan bahwa Ia haga ngeniko jama ram sunyin sai dijanjiko-Ni.

²³Allah saksiku — mani Ia pandai isi hatiku — bahwa nyak mak jadi mik Korintus, mani nyak mak haga nyani hatimu sedih.

²⁴Nyak mak maksa keti mengenai api sai keti harus percaya, mani keti radu percaya nihan jama Almasih. Nyak angkah beguai jejama jama keti in keti makin bahagia.