Read Lampung Api 2 KORINTUS 10 Bible Online

2 KORINTUS 10 - Lampung Api bible

2 KORINTUS 10

¹Tano nyak, Paulus, haga ngajuko sai hal jama niku. Nyak inji, nutuk cawa ulun, rabai kik behadapan jama keti, kidang bani kik bejaohan. Nah, mani kelembutan rik kebetikan hati-Ni Almasih,

²nyak kilu nihan dangdo nyani nyak tepaksa betindak keras jama keti kapan nyak ratong kanah. Mani nyak beniat untuk betindak tegas tehadap jelma-jelma sai ngucakko bahwa sekam beguai jama tujuan-tujuan dunia.

³Sekam sangun masih hurik di delom dunia, kidang sekam mak bejuang bedasarko tujuan dunia.

⁴Senjata-senjata sai sekam gunako di delom perjuangan sekam lain hak senjata dunia inji, kidang senjata-senjata Allah sai bekuasa. Jama senjata-senjata udi sekam ngehancorko pertahanan-pertahanan; sekam nangkis perdebatan-perdebatan

⁵rik ngedobrak benteng-benteng kepungahan sai dibangun untuk nantang pengetahuan tentang Allah. Sekam menawan pikeran jelma-jelma rik nyani tian takluk jama Almasih.

⁶Rik kik keti radu taat jama sepenuhni, sekam siap untuk ngehukum sunyin jelma sai mak taat.

⁷Hagani keti sadar keadaan sai setemoni. Kik sai jelma yakin bahwa ia kedau-Ni Almasih, hagani ia ngingokko dirini tenggalan rik sadar bahwa sekam juga kedau-Ni Almasih injuk ia.

⁸Nyak mak meliam kik nyak harus lebih lamon ngerasa bangga atas kekuasaan sai radu dikeniko Tuhan jama sekam, mani kekuasaan udi dikeniko untuk ngebangun keti, lain hak untuk ngeruntuhko.

⁹Nyak mak haga keti ngerasa bahwa nyak ngerabai-rabai keti jama surat-suratku.

¹⁰Ulun cawa, “Surat-surat Paulus udi tegas rik bewibawa, kidang kik ia tenggalan wat di tengah-tengah ram, pribadini lemoh rik cawa-cawani mak bereti api-api!”

¹¹Hagani jelma sai injuk reno sadar bahwa kik sekam wat di tengah-tengah keti, tindakan sekam tepat injuk api sai sekam tulis delom surat-surat sekam.

¹²Tantu gaoh sekam mak bani ngebandingko atau ngepikko diri sekam sederajat jama ulun-ulun sai nganggap dirini langgar. Hara buguni tian! Tian nyani ukoran tenggalan rik menilai diri tenggalan jama ukoran ano.

¹³Sekam mak injuk reno. Kik sekam ngerasa bangga, sekam mak ngelampaui batas. Sekam tinggal di delom batas-batas daerah guaini sekam sai radu ditantuko ulih Allah untuk sekam. Rik keti kuruk di delom daerah ano.

¹⁴Jadi, waktu sekam napol keti rik ngusung Kabar Betik tentang Almasih jama niku, sekam sebenorni mak luah jak batas-batas daerah guai sekam.

¹⁵Sekam mak muji diri atas guaini ulun bareh sai wat di luah batas sai ditantuko Allah untuk sekam. Sebalikni sekam tetap di delom batas-batas sai ditantuko Allah untuk sekam rik beharap bahwa keti semakin percaya jama Almasih, in sekam dapok ngelakuko guai sai lebih balak di hantara keti.

¹⁶Jama injuk reno sekam dapok ngabarko juga Kabar Betik udi di negeri-negeri bareh tanpa harus ngebalak-balakko diri atas guai sai radu dilakuko di wilayah pelayanan ulun bareh.

¹⁷ Di delom Alkitab tetulis, “Jelma sai haga ngebanggako sai hal, hagani ngebanggako api sai radu disani ulih Tuhan.”

¹⁸Mani jelma sai tepuji iado jelma sai dipuji ulih Tuhan, lain jelma sai muji dirini tenggalan.