Read Lampung Api 2 KORINTUS 11 Bible Online

2 KORINTUS 11 - Lampung Api bible

2 KORINTUS 11

¹Izinkodo nyak bekelakuan agak bugu cutik. Ngasi, kan?

²Nyak tiram jama niku, injuk Allah tenggalan pun tiram jama niku. Keti yakdo injuk sai muli sai masih suci sai radu kujanjiko untuk dinikahko jama sai kajong, yakdo Almasih.

³ Kidang nyak khuater pikeranmu haga teguda untuk mak setia lagi jama Almasih, gegoh injuk Hawa tumbai juga teguda ulih kelicikan si ulai.

⁴Mani rupani keti senang gaoh nerima jelma sai ratong jama niku rik ngajar tentang Isa sai bareh — lain Isa sai sekam kenalko jama niku. Rik keti haga juga nyambut ruh rik “kabar betik” sai sama sekali belainan jama Ruh-Ni Allah rik Kabar Betik sai pernah keti terima jak sekam.

⁵Nyak sama sekali mak ngerasa lebih rendah jak “rasul-rasul” sai luar biasa udi!

⁶Halokni nyak kurang pandai cawa, kidang tentang pengetahuan, nyak lain jelma sai bugu. Ano radu sekam buktiko jama niku delom sunyin hal.

⁷Waktu nyak ngabarko Kabar Betik jak Allah jama niku, nyak mak ngilu keti ngebiayai nyak cutik pun; rik jama injuk reno nyak nyani diriku jadi rendah. Kulakuko ano untuk ngelanggarko keti. Api ano suatu kesalahanku tehadap niku?

⁸Waktu nyak ngelayani keti, nyak dibiayai ulih jemaah-jemaah bareh. Dapok diucakko nyak ngerugiko jemaah-jemaah udi in dapok nulung keti.

⁹ Kik waktu seno nyak kekurangan, nyak mak pernah nyusahko sai jelma pun jak keti. Sunyin sai kuperluko disediako ulih puari-puari sai ratong jak Makedonia. Nyak ngejaga betik-betik in nyak mak nyusahko keti delom hal api pun, rik nyak haga terus ngejaga in ano tetap injuk reno.

¹⁰Kebanggaanku inji mak dapok dihapusko di dipa pun juga di sunyin negeri Akhaya, mani ajaran Almasih sai benor wat jama nyak.

¹¹Mengapi nyak cawa injuk reno? Api ulih sebab nyak mak mengasihi keti? Allah pandai nyak mengasihi!

¹²Api sai nyak lakuko tano haga terus nyak lakuko in “rasul-rasul” sai bareh udi mak ngedok alasan untuk ngebalak-balakko diri rik cawa bahwa tian beguai injuk sekam.

¹³Jelma-jelma injuk seno iado rasul-rasul palsu. Tian jelma-jelma sai ngebuhungi ulun jama menyamar sebagai rasul-rasul-Ni Almasih.

¹⁴Mak hiran tian nyani injuk reno, mani iblis tenggalan pun menyamar sebagai malaikat terang!

¹⁵Jadi mak aneh juga kik jelma-jelma sai ngebantu iblis menyamar sebagai jelma-jelma sai ngebantu sai ngelakuko kehaga-Ni Allah. Akherni tian juga haga nerima balosan sai nutuk sunyin perbuatan tian.

¹⁶Kuulangi sekali lagi: Dang sampai wat sai nganggap nyak mebudoh. Kidang kik keti nganggap nyak injuk reno, izinkodo nyak sai bugu inji ngerasa bangga juga cutik.

¹⁷Selanjutni hagani nyak nyebutko rasa banggaku, kidang lain Tuhan sai ngayun nyak ngucakko ano. Delom hal sinji nyak temon-temon cawa injuk jelma bugu.

¹⁸Sangun wat lamon jelma sai ngerasa bangga atas hal-hal dunia, jadi nyak haga ngerasa bangga juga.

¹⁹Keti jama senang hati sabar tehadap jelma sai bugu, mani keti ngerasa diri pintar nihan!

²⁰Keti nagando gaoh kik ulun ngebudakko keti, atau memeras rik ngakuk untung jak keti, atau ngerasa diri lebih langgar jak keti rik bani nampar keti.

²¹Nyak meliam ngakui bahwa sekam lemoh nihan untuk bebuat injuk reno. Kidang api sai jelma bareh bani ngebanggako, nyak bani juga! (Nyak cawa injuk jelma bugu.)

²²Ulun Ibrani kedo tian? Nyak juga ulun Ibrani. Ulun Israel kedo tian? Nyak juga ulun Israel. Keturunan Abraham kedo tian? Nyak pun injuk reno!

²³ Jelma-jelma sai ngebantu Almasih kedo tian? Kedengianni injuk nyak radu lebon akal, kidang nyak sangun jelma sai ngebantu sai lebih betik jak tian sunyinni! Nyak beguai lebih keras, nyak lebih risok dikurukko mik delom bui, nyak lebih lamon disiksa rik risok hamper mati.

²⁴ Radu lima kali nyak disiksa ulih ulun Yahudi jama pukulan lecut telu puluh siwa kali.

²⁵ Telu kali nyak dilecut ulih ulun-ulun Roma; pernah muneh nyak ditayar jama batu. Telu kali nyak ngalami karam kapal di laok, rik sekali nyak terapung selama rua puluh epak jam.

²⁶ Lamon nihan nyak ngadako lapah sai bebahaya: diancam bahaya banjer, bahaya perampuk, bahaya jak pihak Yahudi maupun jak pihak lain Yahudi, bahaya di delom kota, bahaya di luah kota, bahaya di laok, rik bahaya jak jelma-jelma sai ngemukako diri sebagai puari Kristen padahal lain.

²⁷Nyak ngebanting tulan rik bejuang setengah mati: risok mak pedom, mak mengan, mak nginum, lamon nihan telantar delom keadaan kebetohan, kengisonan mani kurang kawai rik mak ngedok rang tinggal.

²⁸Di samping sunyinni ano, unggal rani nyak cemas juga jama keadaan sunyin jemaah.

²⁹Kapan wat sai lemoh nyak pun nutuk ngerasa lemoh juga. Kapan wat sai jatuh mik delom dusa, hatiku nutuk hancor.

³⁰Nah, kik nyak harus ngerasa bangga atas sai hal, maka nyak ngerasa bangga atas hal-hal sai nunjukko kelemohanku.

³¹Allah, Bapak jak Tuhan Isa pandai bahwa nyak mak bebuhung. Tepujido gelar-Ni selama-lamani.

³² Waktu nyak wat di Damsyik, gubernur sai bekuasa di dudi di debah pemerintahan Raja Aretas, ngayun tentera ngejaga rangok kota udi untuk nangkok nyak.

³³Kidang jama sai keranjang nyak diulurko mik debah liwat sai lubang di sesai. Injuk renodo nyak lulos jak culuk gubernur udi.