Read Lampung Api 2 KORINTUS 13 Bible Online

2 KORINTUS 13 - Lampung Api bible

2 KORINTUS 13

¹ Injido untuk ketelu kalini nyak ratong napol niku. Delom Alkitab tetulis, “Unggal perkara harus didukung ulih kesaksian rua atau telu ulun saksi, ampai perkara ano sah.”

²Jelma-jelma sai di waktu tumbai radu bebuat dusa rik sunyin jelma barehni, radu kuperingatko lebih mena waktu nyak napol keti pada kerua kalini. Tano, sementara nyak bejaohan jama niku, nyak ngingokko luot bahwa kik nyak ratong lagi, mak sai jelma pun jak tian sai haga lepas jak hukuman.

³Maka keti haga ngedapokko sunyin bukti sai keti mirak bahwa Almasih temon-temon cawa liwat nyak. Kik Almasih betindak tehadap keti, Ia mak betindak lemoh-lemoh, sebalikni Ia nunjukko kuasa-Ni di hantaramu.

⁴Sangun waktu Ia disalibko, Ia lemoh, kidang tano Ia hurik ulihni kuasa-Ni Allah. Sekam juga lemoh delom hurik sekam sai besatu jama Almasih, kidang waktu ngehadapi keti, sekam pun kuat jejama Almasih mani kuasa Allah.

⁵Cuba keti nguji diri tenggalan api keti temon-temon hurik bedasarko percaya jama Almasih! Pasti keti sadar bahwa Isa Almasih wat di delom keti! — lain halni kik sangun keti mak temon-temon percaya.

⁶Nyak ngeharap keti sadar bahwa sekam lain hak jelma sai mak tahan uji.

⁷Sekam bedua jama Allah semoga Ia haga nulung keti untuk mak bebuat salah. Lain hak untuk nunjukko bahwa sekam inji sangun pandai nunaiko tugas, kidang in keti ngelakuko api sai Allah kehagako — tagan keliakanni sekam gagal, mak api-api!

⁸Mani sekam mak dapok bebuat sai pun sai betentangan jama sai benor, sekam harus nutuk sai benor.

⁹Sekam senang rik sekam lemoh, rik keti kuat. Sekam bedua juga in keti jadi sempurna.

¹⁰Udido sebabni nyak nulis inji waktu nyak makkung wat di tengah-tengah keti. Jama injuk reno, kik nyak ratong kanah, mak ikin nyak betindak keras tehadapmu jama ngegunako kekuasaan sai dikeniko Tuhan jama nyak. Kekuasaan ano dikeniko untuk ngebangun keti, lain untuk ngehancorko.

¹¹Akherni, Puari-puari, hagani keti riang, rik berusahado jadi sempurna. Terimado sunyin petuahku. Hagani keti sehati rik hurik rukun. Allah Sai Mahakasih rik pendamai udi haga menyertai keti.

¹²Besalam-salamando mesra peperda keti sebagai puari Kristen. Sunyin umat-Ni Allah ngirim salam jama niku.

¹³Tuhan Isa Almasih ngeberkati keti, Allah mengasihi keti, rik Ruh-Ni Allah menyertai keti sunyinni! Hormat sekam, Paulus