Read Lampung Api 2 KORINTUS 2 Bible Online

2 KORINTUS 2 - Lampung Api bible

2 KORINTUS 2

¹Ulihni seno nyak radu nyani keputusan untuk mak ratong napol lagi jama niku sai nyani keti sedih.

²Mani kik nyak nyedihko keti, sapa muneh sai dapok ngehibur nyak, kik lain ulun-ulun ano juga sai radu kusedihko hatini?

³Udi sebabni nyak nulis surat udi, jama niku. Nyak mak haga napol niku, raduni disedihko ulih keti padahal ketido sai seharusni nyenangko nyak. Mani nyak yakin bahwa kik nyak riang, maka Puari sunyinni riang juga.

⁴Nyak nulis jama niku jama hati sai sedih rik biak rik lamon miwang. Maksudku lain in keti jadi sedih, kidang in keti nyadari bahwa nyak ngasihi keti nihan.

⁵Kik wat jelma sai nyebabko kesedihan, maka hal udi ia lakuko lain tehadap nyak, melainko tehadap Puari sunyinni atau paling mawat tehadap sebagian jak Puari. Nyak mak haga terlalu keras tehadap ia.

⁶Untuk jelma sai injuk reno udi, hukuman sai dijatuhko jama ia ulih kelamonan di hantara Puari, radu cukup.

⁷Tano keti harus ngampuni ia rik ngeni durongan lagi jama ia in ia dang sedih hati nihan rik sampai putus asa.

⁸Ulihni seno nyak ngilu, in keti nunjukko luot jama ia bahwa keti temon-temon ngasihini.

⁹Nyak nulis surat ano jama niku jama maksud untuk nguji keti, api kedo keti selalu haga nutuk petunjuk-petunjuk jak nyak.

¹⁰Kik keti radu ngampuni jelma sai bebuat salah tehadapmu maka nyak pun ngampuni jelma ano. Mani api sai radu kuampuni — kik sangun wat sai perlu diampuni — ano kuampuni di hadap Almasih untuk kebetikan keti.

¹¹Kulakuko ano in iblis dang ngakuk kesempatan untuk nguasai ram, mani ram pandai rencana-rencanani.

¹² Pada waktu nyak sampai di Troas jama maksud untuk ngabarko Kabar Betik tentang Almasih, Tuhan radu ngebuka renglaya bagi nyak untuk beguai di rang udi.

¹³Kidang nyak mak tenang mani mak betungga jama puari ram Titus di disan. Maka nyak ngilu diri jama jelma-jelma di rang udi raduni mik Makedonia.

¹⁴Kidang syukor jama Allah! Ia selalu mimpin sekam untuk nutuk di delom barisan kemenangan Almasih mani sekam hurik besatu jama Ia. Allah makai sekam in kabar mengenai Almasih tesebar injuk himbau herum sai semerbak mik dipa-dipa.

¹⁵Mani sekam yakdo injuk himbau kemiyan sai herum; sai disuah ulih-Ni Almasih untuk Allah. Tehadap jelma-jelma sai sedang nuju kehancoran, sekam injuk himbau kematian sai ngebunuh, kidang tehadap jelma-jelma sai sedang diselamatko, sekam injuk himbau herum sai ngusung kehurikan. Nah, sapa sai dapok memenuhi tugas inji?

¹⁷Sekam mawat injuk lamon jelma sai nyani kabar jak Allah injuk barang dagangan gaoh. Tujuan-tujuan sekam iado murni, mani sekam ditugasko ulih-Ni Allah. Rik Allah tenggalan ngeliak bahwa sekam nyampaiko kabar ano sebagai jelma-jelma sai ngebantu sai taat jama Almasih.