Read Lampung Api 2 KORINTUS 4 Bible Online

2 KORINTUS 4 - Lampung Api bible

2 KORINTUS 4

¹Sekam ngelakuko guai inji ulihni kemurahan hati-Ni Allah. Udi sebabni sekam mak putus asa.

²Sekam mak makai cara-cara kelam sai ngeliamko. Sekam mak haga beguai licik atau mutar balikko cawa-Ni Allah. Sekam ngelayani Allah jama hati sai murni untuk kehaga-Ni. Ulihni seno, sekam harapko sunyin jelma nilai sekam betik di delom hatini.

³Kik Kabar Betik sai sekam kabarko ano masih juga makkung dipahami, maka angkah jelma-jelma sai sedang nuju kehancoran gaoh sai mak memahamini.

⁴Diwa jahat sai nguasai dunia inji nyalok pikeran jelma-jelma sai mak percaya udi. Iado sai ngehalang-halangi tian in tian mak ngeliak terang jak Kabar Betik udi tentang kemuliaan-Ni Almasih, sai ngerupako gambaran-Ni Allah.

⁵Kabar sai sekam sampaiko ano lain hak kabar tentang sekam tenggalan. Kabar ano iado kabar tentang Isa Almasih; bahwa Iado Tuhan; rik sekamdo jelma-jelma sai ngebantu niku mani Ia.

⁶ Allah sai cawa, “Hagani jak delom kelam terbit terang,” Allah udido juga sai nerbitko terang udi di delom hati ram, in pikeran jadi terang untuk memahami kecemerlangan-Ni Allah sai besinar di pudak Almasih.

⁷Kidang harta rohani sai helau udi sekam usung pada diri sekam sai mak berega inji sai disani jak tanoh. Jama injuk reno nyatado bahwa keagungan kuasa udi terletak pada Allah rik lain hak jama sekam.

⁸Sekam diserang jak sunyin pihak, kidang sekam mak kejepit. Sekam kebingungan, kidang mak sampai putus asa.

⁹Lamon sai memusuhi sekam, kidang mak pernah sekam tinggal tenggalan. Rik meskipun risok sekam dipukul sampai tumbak, kidang sekam mak mati.

¹⁰Risok nihan sekam ngerasa kematian Isa di badan sekam, in hurik-Ni pun jadi nyata di badan sekam.

¹¹Selama sekam hurik, sekam risok nihan diancam ulih kematian ulih-Ni Isa, in jama injuk reno hurik-Ni Isa pun dapok dinyatako di badan sekam sai sementara inji.

¹²Inji retini bahwa di delom diri sekam kematian sedang giat ngejalanko perananni, kidang sekam riang bahwa hurikdo sai sedang giat di delom dirimu.

¹³ Di delom Alkitab wat cawa inji, “Nyak percaya, udi sebabni nyak cawa.” Nah, jama semangat percaya sai injuk reno juga, sekam cawa mani sekam percaya.

¹⁴Sekam yakin bahwa Allah sai radu ngehurikko luot Tuhan Isa, haga ngehurikko sekam juga jama Isa, rik ngusung keti rik sekam mik hadap-Ni.

¹⁵Sunyinni anodo untuk kepentinganmu. Mani semakin lamon jelma ngalami kasih-Ni Allah, semakin lamon muneh dua syukor sai disampaiko jama Allah; jama injuk reno Allah dimuliako.

¹⁶Udido sebabni sekam mak putus asa. Sekalipun sekam secara laher semakin betambah cadang, kidang secara delom hati sekam dijadiko ampai unggal rani.

¹⁷Rik kesusahan sai mak sepira inji, sai sekam alami untuk sementara, haga ngehasilko untuk sekam suatu kebahagiaan sai luar biasa rik abadi. Kebahagiaan udi jaoh lebih balak kik dibandingko jama kesusahan ano tenggalan.

¹⁸Mani sekam mak ngeperhatiko hal-hal sai keliakan melainko sai mak keliakan. Sai keliakan angkah tahan sementara, kidang sai mak keliakan udi kekal sampai selama-lamani.