Read Lampung Api 2 KORINTUS 5 Bible Online

2 KORINTUS 5 - Lampung Api bible

2 KORINTUS 5

¹Mani sekam pandai bahwa kik lamban — yakdo badan — sai ram tinggal di dunia inji dibungkar, Allah haga nyediako untuk ram sai lamban di surga, sai disani ulih-Ni Allah tenggalan rik sai tahan selama-lamani.

²Di delom lamban sai tano inji, neram mengeluh mani ram mirak nihan tinggal delom lamban ram sai di surga udi.

³Lamban udido badan ram sai ampai.

⁴Selama ram tinggal di delom lamban sai jak dunia inji, ram mengeluh mani baban ram biak. Lain hak mani ram mirak lepas jak badan ram sai jak dunia inji, kidang mani ram mirak makai badan jak surga udi, in badan ram sai dapok mati inji dikuasai ulih sai hurik.

⁵Sai nyiapko ram untuk seno iado Allah tenggalan, rik Ia ngeni Ruh-Ni jama ram sebagai jaminan.

⁶Ulihni seno hati sekam selalu ngerasa kuat. Sekam pandai bahwa selama sekam masih tinggal di delom badan sekam inji, sekam jaoh jak lamban sai haga sekam tinggal jejama Tuhan.

⁷Mani sekam hurik bedasarko percaya jama Almasih, lain bedasarko api sai dapok diliak,

⁸udi sebabni hati sekam tabah. Sekam lebih gering lepas jak badan sekam inji, in dapok tinggal jama-jama Tuhan.

⁹Ulihni seno sekam berusaha temon-temon untuk nyenangko hati-Ni, baik sewaktu sekam masih wat di lamban sekam dija, ataupun di dudi.

¹⁰ Mani pasti ram sunyin haga diajuko di hadap pengadilan-Ni Almasih, rik masing-masing haga dapok balosan setimpal jama perbuatanni di dunia inji — perbuatan helau ataupun jahat.

¹¹Sekam pandai api reti merabai jama Tuhan; udi sebabni sekam berusaha ngeyakinko jelma mengenai diri sekam. Allah kenal sekam nihan, rik kuharap keti pun kenal sekam di delom hatimu.

¹²Jama inji sekam mak ngilu in keti muji diri sekam. Sekam angkah haga ngeniko suatu alasan sai betik jama niku untuk jadi bangga tehadap sekam, in keti pandai injuk repa keti harus ngejawab jelma-jelma sai mementingko bantuk jelma rik lain hak sifatni.

¹³Kik sekam sangun keliakanni radu luangan, udi demi kepentingan-Ni Allah. Rik kik sekam keliakan waras, udi demi kepentinganmu.

¹⁴Kasih-Ni Almasihdo sai nguasai sekam; rik sekam sadar bahwa kik sai jelma radu mati untuk sunyin ulun, maka udi retini bahwa sunyin jelma radu mati.

¹⁵Almasih mati untuk sunyin jelma, in ulun-ulun sai hurik, mak lagi hurik untuk diri tenggalan, melainko untuk Almasih sai radu mati rik dihurikko luot demi kepentingan tian.

¹⁶Ulihni seno, sekam mak lagi menilai manusia nutuk ukoran manusia. Sangun sekam pernah menilai Almasih jak segi manusia, kidang tano mak lagi.

¹⁷Jelma sai radu besatu jama Almasih, radu jadi manusia ampai. Sai tumbai mak ngedok lagi — sunyinni radu jadi ampai.

¹⁸Sunyinni udi diguaiko ulih-Ni Allah. Liwat Almasih Allah nyani ram mebetik luot jama Ia, raduni nugasko ram in jelma-jelma bareh dimungkinko mebetik juga jama Allah.

¹⁹Sekam ngabarko bahwa liwat Almasih, Allah nyani manusia mebetik luot jama diri-Ni. Allah ngelakuko ano tanpa nuntut kesalahan-kesalahan sai radu dilakuko manusia tehadap diri-Ni. Rik sekam radu ditugasko Allah untuk ngabarko kabar ano.

²⁰Jadi sekamdo utusan-utusan-Ni Almasih. Liwat sekam Allah tenggalan sai nyampaiko luhot-Ni. Atas gelar-Ni Almasih, sekam ngilu nihan, terimado uluran culuk-Ni Allah sai ngemungkinko keti mebetik jama Ia.

²¹Almasih mak bedusa, kidang Allah nyani Ia nanggung dusa ram, in ram mebetik luot jama Allah mani besatu jama Almasih.