Read Lampung Api 2 KORINTUS 6 Bible Online

2 KORINTUS 6 - Lampung Api bible

2 KORINTUS 6

¹Mani sekam beguai jejama jama Allah, maka sekam ngilu nihan dangdo keti nyia-nyiako kebetikan hati Allah udi.

² Delom Alkitab, Allah cawa, “Waktu sai diperkenanko, Nyak radu ngedengi niku, rik waktu rani keselamatan, Nyak radu nulung niku.” Ingokdo betik-betik, tano injido waktu sai diperkenanko ano. Tano injido rani untuk diselamatko!

³Sekam mak haga pelayanan sekam disalahko. Ulihni sekam berusaha mak ngeni alasan jama sai jelma pun untuk ngelakuko hal ano.

⁴Sebalikni, delom sunyin hal, sekam nunjukko bahwa sekamdo jelma-jelma sai ngebantu Allah. Mani, sunyin macam kepayahan radu sabar sekam derita:

⁵ sekam disiksa, kuruk bui, dikeruyok; sekam beguai keras, risok mak pedom rik risok muneh mak ngedok kanikan.

⁶Jama belaku tulus, bijaksana, sabar rik betik hati, sekam nunjukko bahwa sekam yakdo jelma sai ngebantu Allah. Juga jama begantung tulungan jak Ruh Allah, rik jama kasih sai ikhlas,

⁷rik jama ngabarko kabar sai jak Allah rik jama kuasa Allah, sekam nunjukko bahwa sekamdo jelma-jelma sai ngebantu Allah. Sekam begantung jama kehaga-Ni Allah sebagai senjata sekam untuk nyerang ataupun untuk ngebela diri.

⁸Sekam dihormati, kidang dihina juga; dipuji, rik difitnah muneh. Meskipun sekam jujor, sekam dituduh pembuhung.

⁹Sekam dianggap mak tekenal, kidang sekam dikenal ulih sunyin jelma. Sekam disangko mati, kidang nyatani sekam masih hurik. Meskipun sekam dianiaya, sekam mak mati.

¹⁰Walaupun hati sekam sedih, kidang sekam selalu riang juga. Sekam keliakanni mejerih, kidang sekam radu nyani lamon jelma jadi mebatin. Keliakanni sekam mak ngedok api-api, kidang sebenorni sekam ngedok sunyinni.

¹¹Puari-puari sai tecinta di Korintus! Sekam radu beterus terang jama niku. Sunyin isi hati sekam radu sekam utarako.

¹²Sekam mak nyalok hati untuk keti, angkah ketido sai nyalok hati tehadap sekam.

¹³Tano, tagando nyak cawa injuk jama anak-anakku tenggalan. Bukakdo juga hatimu tehadap sekam.

¹⁴Dang hak haga jadi sekutu jelma-jelma sai mak percaya jama Isa; udi mak cucok. Dipa mungkin kebetikan becampor jama kejahatan! Mak mungkin terang begabung jama kelam.

¹⁵Mak mungkin Almasih sepakat jama iblis. Api persamaanni hantara jelma Kristen jama jelma lain Kristen?

¹⁶ Api hubunganni hantara Lamban Ibadah jama lamban berhala? Ram inji Lamban Ibadah, yakdo Allah sai hurik. Allah tenggalan cawa, “Nyak haga tinggal di tengah-tengah tian, rik hurik jejama tian. Nyak haga jadi Allah tian, rik tian haga jadi umat-Ku.

¹⁷ Ulihni seno, tinggalkodo jelma-jelma sai mak kenal jama Allah udi, rik pisahko dirimu jak tian. Dang behubungan sama sekali jama sai najis, maka Nyak haga nerima niku.

¹⁸ Nyak haga jadi Bapamu, rik niku haga jadi anak-anak-Ku, injuk renodo cawa Tuhan Sai Mahakuasa.”