Read Lampung Api GALATIA 1 Bible Online

GALATIA 1 - Lampung Api bible

GALATIA 1

¹Puari-puari jemaah-jemaah di wilayah Galatia, Nyak, Paulus, rik sunyinni puari Kristen sai jama-jama nyak, ngeharap semoga Allah Bapa ram rik Tuhan Isa Almasih ngeni berkat rik sejahtera jama niku. Nyak jadi rasul lain hak jama liwat manusia atau mani diangkat ulih manusia, melainko ulih-Ni Isa Almasih rik Allah Bapa ram sai radu ngehurikko Ia luot jak kematian.

⁴Mentaati kehaga-Ni Allah Bapa ram, Almasih nyerahko diri-Ni jadi kurban untuk dusa-dusa ram, in ram diselamatko jak zaman sai jahat inji.

⁵Terpujido Allah selama-lamani! Amin.

⁶Nyak hiran tentang Puari-puari! Keti diurau Allah ulih sebab rahmat-Ni Almasih, kidang tano keti geluk nihan ngeduriko Allah rik nutuk “kabar betik” sai bareh jak Kabar Betik sai jak Allah.

⁷Setemonni mak ngedok “kabar betik sai bareh”. Angkah wat jelma-jelma sai ngabarko jama keti “kabar betik” tentang Almasih sai tian putar balikko sehingga ngacauko keti.

⁸Ulun sai ngabarko “kabar betik” sai bareh jak Kabar Betik sai radu ram kabarko, tagando ia dihukum Allah — sekalipun ulun udi sekam tenggalan atau malaikat jak surga!

⁹Sekam radu ngucakko tumbai, tano nyak ngucakko sekali lagi: Jelma sai ngabarko jama niku “kabar betik” sai bareh jak Kabar Betik sai radu keti terima jak sekam, jelma udi hagani dihukum Allah!

¹⁰Api jama seno keliakanni nyak seolah-olah ngeharap diakui ulihni manusia? Sama sekali mawat! Nyak angkah ngeharapko pengakuan jak Allah. Api nyak sedang berusaha ngakuk hati manusia in disenangi ulun? Kik nyak masih bebuat injuk reno, nyak lain hak jelma sai ngebantu Almasih.

¹¹Puari-puari harus pandai bahwa Kabar Betik sai kukabarko ano mak asalni jak manusia.

¹²Nyak mak nerima kabar udi jak manusia, rik mak sai jelma pun sai ngajarkoni jama nyak. Isa Almasih tenggalando sai ngungkapko isi Kabar Betik udi jama nyak.

¹³ Tantu keti radu ngedengi tentang hurikku tumbai sebagai jelma sai nutuk agama Yahudi. Keti pandai injuk repa kejamni nyak memperlakuko jemaah-Ni Allah rik injuk repa kerasni nyak berusaha ngehancorkoni.

¹⁴ Delom hal ngejalanko agama Yahudi, nyak ngelebihi kelamonan ulun Yahudi sai seumor jama nyak. Nyak besemangat nihan delom hal-hal tentang adat istiadat nenek muyang sekam.

¹⁵ Kidang ulihni betik-Ni hati Allah, Ia milih nyak semakkung nyak laher rik ngurau nyak untuk ngelayani Ia.

¹⁶Allah nyatako Anak-Ni jama nyak in Kabar Betik tentang Anak-Ni dapok kukabarko jama ulun-ulun lain Yahudi. Waktu seno nyak mak mik jama sai jelma pun untuk ngilu petuah.

¹⁷Nyak mak juga mik jama jelma-jelma di Yerusalem sai radu lebih mena jak nyak jadi rasul. Kidang nyak mik di negeri Arab, raduni jak udi muloh mik Damsyik luot.

¹⁸ Telu tahun jak seno, nyak mik di Yerusalem untuk bekenalan jama Petrus. Nyak tinggal jama ia angkah lima belas rani sakani.

¹⁹Nyak mak betungga jama rasul-rasul sai bareh, kecuali Yakobus, puari-Ni Tuhan.

²⁰Api sai kutulis inji temon. Allah pandai bahwa nyak mak bebuhung!

²¹Radu jak seno nyak mik di daerah-daerah di Siria rik Kilikia.

²²Sampai saat seno jemaah-jemaah Kristen di Yudea masih makkung langsung kenal jama nyak.

²³Tian angkah ngedengi ulun cawa, “Jelma sai tumbai nganiaya sekam, tano ngabarko kepercayaan sai tumbai haga dimusnahko.”

²⁴Maka tian memuji Allah mani nyak.