Read Lampung Api GALATIA 3 Bible Online

GALATIA 3 - Lampung Api bible

GALATIA 3

¹Puari-puari ulun Galatia! Keti bugu nihan! Induh keti radu kena pengaruh sapa? Kematian Almasih disalib radu kuterangko sejelas-jelasni jama niku!

²Cuba keni pandai jama nyak sai hal inji: Api keti radu nerima Ruh-Ni Allah mani ngejalanko hukum agama, atau mani keti ngedengi Kabar Betik jak Allah rik percaya jama Almasih?

³Mengapi keti bugu nihan! Keti radu mulai hurik ampai jama Ruh-Ni Allah, masakan tano keti haga mencapai kesempurnaan jama kekuatanmu tenggalan?

⁴Percuma kedo sunyin sai radu keti alami ano! Masakan percuma!

⁵Allah ngeniko Ruh-Ni jama niku rik ngadako keajaiban-keajaiban di hantara keti. Api kedo Allah ngelakuko ano mani keti jalanko hukum agama atau mani keti ngedengi Kabar Betik udi rik percaya jama Almasih?

⁶ Udi gegoh injuk sai tetulis delom Alkitab tentang Abraham — injuk reji, “Abraham percaya jama Allah, rik ulih kepercayaanni ano ia diterima ulih-Ni Allah sebagai jelma sai nyenangko hati-Ni Allah.”

⁷ Jadi hagani keti sadar bahwa jelma sai temon-temon keturunan Abraham iado jelma sai percaya jama Allah.

⁸ Alkitab radu ngeliak lebih mena bahwa Allah ngeyakinko ulun-ulun lain Yahudi muloh betik luot jama Allah, kik tian percaya jama Ia. Kabar Betik ano dikeni pandai lebih mena jama Abraham delom janji inji, “Liwat niku, Allah haga ngeberkati sunyin manusia di atas bumi.”

⁹Abraham percaya, maka ia dikeni berkat. Injuk reno juga sunyin jelma sai percaya, haga dikeni berkat jejama Abraham.

¹⁰ Ulun-ulun sai begantung jama hukum agama, sunyinni hurik di debah kutukan. Mani delom Alkitab tetulis, “Jelma sai mak setia ngejalanko sunyin sai tetulis delom Buku Hukum Agama, dikutuk Allah!”

¹¹ Mak sai jelma pun sai muloh betik jama Allah ulihni ngejalanko hukum agama. Hal ano radu dinyatako delom Alkitab, “Angkah jelma sai percaya jama Allah sehingga hubunganni jama Allah jadi betik luot, haga hurik!”

¹² Kidang hukum agama mak didasarko atas iman. Delom Alkitab tetulis bahwa ulun sai ngejalanko hukum agama, haga hurik ulihni hukum udi.

¹³ Kidang Almasih ngebebasko ram jak kutukan hukum agama. Ia ngelakuko ano jama naganko diri-Ni tekutuk mani ram. Mani delom Alkitab tetulis, “Tekutukdo jelma sai mati digantung di tihang kayu.”

¹⁴Almasih ngelakuko injuk reno in berkat sai dijanjiko Allah jama Abraham dikeniko juga jama jelma-jelma lain Yahudi. Jama injuk reno ram pun sai percaya jama Allah, dapok nerima Ruh sai dijanjiko ulih-Ni Allah udi.

¹⁵Puari-puari! Helauni nyak makai cuntoh jak pengalaman serani-rani. Kik jelma nyani suatu ikatan janji rik janji ano radu disahko, maka mak sai jelma pun dapok ngebatalko perjanjian udi, atau nambah sai hal pun jama ia.

¹⁶ Janji-janji-Ni Allah disani ulih-Ni Allah untuk Abraham rik untuk jelma keturunan Abraham. Delom Alkitab mak tetulis, “rik untuk ulun-ulun keturunanni Abraham”, sai retini lamon ulun. Sai tetulis di dudi iado, “rik untuk jelma keturunanmu,” retini sai jelma gaoh, yakdo Almasih.

¹⁷ Sai haga kukemukako di dija iado inji: janji-Ni Allah radu disani rik disahko lebih mena. Hukum agama sai dikeniko 430 tahun jak seno mak dapok ngebatalko pengesahanni rik ngehapusko janji-Ni Allah udi.

¹⁸ Mani kik pengenian-Ni Allah tegantung jama hukum agama, maka udi lain lagi pengenian sai dijanjiko. Justru mani Allah radu ngejanjikoni jama Abraham, maka Allah ngeniko ano jama ia.

¹⁹Kik injuk reno, untuk api hukum agama dikeniko? Jawabni iado bahwa hukum udi ditambahko untuk nyatako pelanggaran manusia. Hukum agama udi belaku angkah sai sampai ratongni sai jelma keturunan Abraham, sai disebut di delom janji-Ni Allah jama Abraham. Hukum agama udi disampaiko ulih malaikat-malaikat rik perantaraan sai manusia.

²⁰Nah, harus wat rua pihak, ampai perlu sai jelma perantara. Kidang Allah mak memerluko perantara, mani Ia tenggalan betindak.

²¹Api udi retini bahwa hukum agama belawanan jama janji-Ni Allah? Tantu gaoh mawat! Mani kik hukum dikeniko untuk nganugerahko hurik jama manusia, maka manusia dapok muloh betik jama Allah liwat hukum agama.

²²Kidang di delom Alkitab tetulis bahwa sunyin manusia wat di debah kekuasaan dusa. Ulihni seno, pengenian sai dijanjiko bedasarko percaya jama Isa Almasih dikeniko jama tian sai percaya.

²³Semakkung ratong waktuni untuk percaya jama Almasih, ram dijaga ketat ulih hukum agama; ram injuk dikurung sampai iman ano dinyatako.

²⁴Jama injuk reno, hukum agama jadi sebagai pengawas ram sampai Almasih ratong untuk nyani ram muloh betik lagi jama Allah mani ram percaya jama Almasih.

²⁵Tano, mani radu waktuni manusia dapok percaya jama Almasih, maka ram mak lagi diawasi ulih hukum agama.

²⁶Mani keti percaya jama Isa Almasih, maka keti besatu jama Ia; rik ulihni udi keti jadi anak-anak-Ni Allah.

²⁷Keti sunyinni radu dibaptis atas gelar-Ni Almasih, jadi keti radu nerima pada diri keti sifat-sifat-Ni Almasih tenggalan.

²⁸Delom hal inji mak lagi diadako perbidaan hantara jelma Yahudi rik jelma lain Yahudi, hantara jelma sai ngebantu rik ulun bebas, hantara bakas rik bebai. Puari sunyinni besatu mani Isa Almasih.

²⁹ Kik keti kedau-Ni Almasih, maka ketido keturunanni Abraham. Rik keti haga nerima api sai dijanjiko Allah.