Read Lampung Api GALATIA 4 Bible Online

GALATIA 4 - Lampung Api bible

GALATIA 4

¹Kidang perlu kutegasko: selama sai jelma ahli waris masih di debah umor, wat jelma sai ngawasi ia rik ngurus kepentingan-kepentinganni sampai ia mencapai umor sai ditantuko ulih bakni. Ia diperlakuko gegoh injuk sai jelma ngebantu, walaupun setemonni ia sai kedau jak sunyinni harta udi.

³Injuk reno muneh jama ram: Selama ram masih makkung dewasa, ram diperhamba ulihni ruh-ruh sai nguasai dunia inji.

⁴Kidang waktu sai tepat, Allah ngutus Anak-Ni mik dunia. Anak-Ni udi dilaherko ulih sai bebai rik hurik di debah kekuasaan hukum agama.

⁵ Jama injuk reno Ia ngebebasko jelma-jelma sai hurik di debah kekuasaan hukum agama; in neram pun dapok jadi anak-anak-Ni Allah.

⁶Mani ketido anak-anak-Ni Allah, Allah ngayun Ruh Anak-Ni kuruk mik delom hati Puari rik di hatiku, yakdo Ruh sai beseru, “Bapa, ya Bapaku.”

⁷Jadi, keti lain jelma sai ngebantu, kidang anak. Rik ulihni keti anak-Ni Allah, maka Allah haga ngeniko jama niku sunyin hal sai disediako-Ni untuk anak-anak-Ni.

⁸Tumbai keti mak kenal jama Allah, udi sebabni keti jadi jelma sai ngebantu jak kuasa-kuasa sai dianggap sebagai diwa kidang setemonni lain Allah sama sekali.

⁹Kidang tano keti kenal jama Allah, atau lebih tepat lagi, Allah kenal jama keti. Nah, mengapi keti haga muloh luot jama ruh-ruhni dunia inji, sai lemoh rik mejerih? Mengapi keti haga diperhamba luot ulihni ruh-ruh udi?

¹⁰Keti ngerayako rani-rani sai tantu, bulan-bulan sai tantu rik tahun-tahun sai tantu.

¹¹Nyak khuater, dang-dang jerih payahku untuk keti sia-sia gaoh.

¹²Puari-puari! Kumohon nihan in keti jadi injuk nyak. Mani nyak juga radu jadi injuk keti. Keti mak ngelakuko sai hal pun sai salah tehadap nyak.

¹³Keti tantu masih ingok api sai nyebabko nyak pada mulani ngeniko Kabar Betik udi jama niku. Sebabni iado mani nyak meruyuh.

¹⁴Waktu seno keti mak ngerasa jijik tehadap nyak, walaupun keadaan badanku merupako cubaan sai balak jama keti. Keti malah nerima nyak injuk nerima malaikat-Ni Allah atau nerima Isa Almasih tenggalan.

¹⁵Keti bahagia nihan waktu seno. Kidang tano, di dipa kebahagiaan udi? Nyak pandai bahwa waktu seno keti rila nyungkil matamu tenggalan untuk ngeniko jama nyak, kik seno dapok dilakuko.

¹⁶Api keti tano radu nganggap nyak sebagai musuh, mani nyak nyatako sai benor jama niku?

¹⁷Jelma-jelma sai bareh udi jama semangat nihan nyepok keti, kidang maksud-maksud tian mak mebetik. Tian angkah mirak mutusko hubunganmu jama sekam, in keti nutuk tian jama semangat nihan.

¹⁸Sangun helau untuk besemangat delom hal-hal sai betik, asal selalu injuk reno rik dang angkah kik nyak wat jejama jama keti.

¹⁹Anak-anakku sai tecinta! Nyak tano inji menderita luot ulihni keti. Nyak menderita injuk sai bebai menderita waktu ngelaherko anak. Nyak haga terus menderita, kik sifat-sifat-Ni Almasih makkung tetanom di dirimu.

²⁰Nyak tiram nihan wat di tengah-tengah keti tano, in nyak dapok cawa jama niku jama suara sai bareh, mani nyak radu mak pandai haga bebuat apilagi jama keti.

²¹Puari-puari sai haga hurik di debah kekuasaan hukum-hukum agama, cuba dengiko nyak! Nyak haga ngeni pandai jama niku api sai setemonni tetulis delom Kitab Hukum Musa.

²² Di dudi tetulis bahwa Abraham ngedok rua anak: Emak jak sanak sai mula-mula yakdo sai jelma ngebantu, rik emak sanak sai barehni ano yakdo sai jelma bebas.

²³Sanak jak bebai sai jadi jelma sai ngebantu laher biasa mani kemauan manusia. Kidang sanak jak bebai sai bebas, laher mani dijanjiko Allah.

²⁴Inji dapok dipakai sebagai kiasan. Rua jelma bebai udi yakdo ibarat rua perjanjian: sai asalni sai jak Gunung Sinai — udido Hagar; anak-anakni dilaherko sebagai jelma sai ngebantu.

²⁵Jadi, Hagar udido Gunung Sinai, di negeri Arab. Ia ngelambangko kota Yerusalem jama sunyinni pendudukni sai tano inji radu jadi jelma sai ngebantu.

²⁶Kidang Yerusalem sai di surga udi iado Yerusalem sai bebas, rik iado emak ram.

²⁷ Mani di delom Alkitab tetulis, “Begembirado niku hai bebai mandul, sai mak pernah nganak! Besukariado rik besurak-surakdo hai niku sai mak pernah ngerasa sakik nganak! Mani bebai sai ditinggalko kajongni haga mansa lebih lamon anak jak bebai sai hurik jama kajongni.”

²⁸Puari-puari! Keti tenggalan iado anak-anak-Ni Allah sai dilaherko ulihni janji Allah; keti gegoh injuk Ishak.

²⁹ Waktu seno anak sai laher nutuk kehagani manusia, nganiaya anak sai dilaherko mani kehaga Ruh-Ni Allah. Injuk reno juga tano.

³⁰ Kidang api sai tetulis delom Alkitab? Di dudi tetulis injuk reji: “Userdo jelma sai ngebantu bebai udi jama-jama anakni, mani anak jak jelma sai ngebantu bebai udi mak haga jadi ahli waris jama-jama anak jak bebai bebas udi.”

³¹Jadi, Puari-puari, ram inji lain hak anak-anak jak jelma sai ngebantu bebai; ramdo anak-anak jak bebai bebas.