Read Lampung Api GALATIA 5 Bible Online

GALATIA 5 - Lampung Api bible

GALATIA 5

¹Ram tano bebas, mani Almasih radu ngebebasko ram! Ulihni seno pertahankodo kebebasanmu, rik dang haga diperhamba lagi.

²Ingok, kik keti ngilu disunat, udi retini Almasih mak ngedok gunani bagi keti. Sai ngucakko inji iado nyak tenggalan, Paulus.

³Sekali lagi nyak ngeni peringatan jama jelma sai ngilu disunat, bahwa ia wajib ngejalanko sunyinni hukum agama!

⁴Kik keti berusaha muloh betik jama Allah liwat hukum agama, ano retini hubunganmu jama Almasih radu putus. Jama injuk reno keti hurik di luah lingkungan rahmat-Ni Allah.

⁵Kidang bagi sekam, sekam ngeharap bahwa jama tulungan Ruh-Ni Allah rik bedasarko percaya sekam jama Almasih, Allah memungkinko sekam muloh betik jama Ia.

⁶Mani kik ram radu besatu jama Isa Almasih, hal nutuk atau mak nutuk atoran sunat mak jadi soal lagi. Sai penting angkah percaya jama Almasih, rik udi nyata delom kasih ram jama ulun bareh.

⁷Tumbai keti betik bejuang! Tano mengapi keti mak taat lagi jama kehaga Allah? Sapa radu ngebujuk keti?

⁸Pasti sai ngelakuko ano lain hak Allah sai radu ngurau keti!

⁹ “Ragi sai cutik haga nyakakko sunyin adonan,” ani ulun.

¹⁰Walaupun injuk reno nyak masih percaya bahwa keti mak haga nutuk pendirian bareh, mani ram besatu jama Almasih. Rik nyak yakin bahwa sapa pun sai ngacau pikeranmu, haga dihukum Allah.

¹¹Tentang nyak, Puari-puari, mengapi nyak terus gaoh dimusuhi kik nyak masih ngabarko bahwa atoran sunat ano perlu? Kik nyak sangun ngabarko injuk reno, maka pemberitaanku tentang salib Almasih mak nimbulko persoalan.

¹²Lebih betik jelma-jelma sai ngacauko pikeranmu langsung gaoh luah sekaligus jak jemaah!

¹³Puari radu diurau untuk jadi jelma sai bebas. Kidang dangdo makai kebebasanmu ano untuk terus-menerus ngelakuko api gaoh sai keti mirak lakuko. Sebalikni, keti harus saling mengasihi rik saling ngelayani.

¹⁴ Sunyinni hukum agama tesimpul delom perintah sai sinji, “Hagani niku ngasihi peperda manusia injuk niku mengasihi dirimu tenggalan.”

¹⁵Kidang kik keti rigu terus, awas, kanah keti jama-jama hancor.

¹⁶Maksudku injuk reji: Tagando Ruh-Ni Allah ngebimbing keti rik dangdo hurik nutuk kehagani tabiat manusia.

¹⁷ Mani kehagani manusia betentangan jama kehagani Ruh Allah, rik kehaga-Ni Ruh Allah betentangan jama kehagani manusia. Kerua-ruani saling belawanan, sehingga keti mak dapok ngelakuko api sai keti mirak.

¹⁸Kidang kik Ruh-Ni Allah mimpin keti, maka keti mak dikuasai ulih hukum agama.

¹⁹Kehagani tabiat manusia nyata delom perbuatan-perbuatan sai hajor, kamak, rik mak patut;

²⁰delom cara nyumbah berhala rik guna-guna; delom bemusuh-musuhan, betinju, sesera, geluk butong, rik mementingko diri tenggalan; perpecohan rik bepihak-pihak,

²¹rik sesera, bemabuk-mabukan, bepesta-pesta rik sai barehni. Tehadap sunyinni ano kuperingatko keti tano injuk repa kuperingatko keti juga tumbai, bahwa jelma-jelma sai ngelakuko hal-hal injuk seno mak haga jadi anggota umat-Ni Allah.

²²Sebalikni, kik jelma-jelma dipimpin Ruh-Ni Allah, hasilni yakdo: Tian saling mengasihi, tian riang, tian ngedok ketenangan hati, tian sabar rik betik budi, tian mebetik tehadap ulun bareh, tian setia,

²³tian rendah hati, rik selalu sanggup nguasai diri. Mak ngedok hukum agama sai ngelarang hal-hal injuk reno.

²⁴Jelma-jelma sai radu jadi kedau-Ni Isa Almasih, jelma-jelma udi radu mematiko tabiat manusiani jama sunyin nafsu rik kehagani.

²⁵Ruh-Ni Allah radu ngeniko jama ram hurik sai ampai; ulihni seno Ia jugado harus nguasai hurik ram.

²⁶Ram mak ngasi jadi mepungah, rik saling nyakikko hati, rik sesera peperda sai bareh.