Read Lampung Api GALATIA 6 Bible Online

GALATIA 6 - Lampung Api bible

GALATIA 6

¹Puari-puari! Kik sai jelma dihalu ngelakuko suatu dusa, hagani keti sai hurik nutuk Ruh-Ni Allah, ngebimbing jelma udi muloh di renglaya sai benor. Kidang keti harus ngelakuko ano jama lembut, rik jagado dang sampai keti tenggalan teguda juga.

²Hagani keti saling ngebantu menanggung baban ulun, in jama injuk reno keti mentaati perintah Almasih.

³Kik sai jelma nyangko dirini penting, padahal mawat, ulun udi ngebuhungi dirini tenggalan.

⁴Unggal jelma harus memeriksa tenggalan api kelakuanni betik atau mawat. Kik betik, ia ngasi ngerasa bangga atas hal seno. Kidang dang ia ngebandingko jama api sai dilakuko ulun bareh.

⁵Mani masing-masing jelma harus memikul tanggung jawabni tenggalan.

⁶Jelma sai nerima ajaran Almasih, hagani ngebagi jama guruni sunyin sai betik sai wat jama ia.

⁷Dangdo ketipu. Allah mak dapok dipermainko! Api sai ditanom, udido sai digetas.

⁸Kik jelma nanom nutuk tabiatni manusia, ia haga nerima kematian jak tabiat ano. Kidang kik ia nanomi nutuk pimpinan Ruh-Ni Allah, ia haga menuai hurik sejati rik kekal jak Ruh-Ni Allah.

⁹Ulihni seno, dangdo ram jadi bosan ngelakuko hal sai betik; mani kik ram mak taru ngelakuko hal-hal seno sewaktu-waktu kanah ram haga menuai hasilni.

¹⁰Jadi, selama wat kesempatan bagi ram, hagani ram ngelakuko sai betik jama sunyin jelma, terutama sekali jama puari-puari ram sai seiman.

¹¹Perhatiko betik-betik bagian inji sai kutulis tenggalan jama huruf sai balak-balak.

¹²Jelma-jelma sai haga nunjolko diri jama hal-hal laher, tiando sai berusaha memaksa keti nutuk atoran sunat. Kidang tian ngelakuko ano angkah in tian mak dianiaya jelma Yahudi ulihni salib Almasih.

¹³Jelma-jelma sai nutuk atoran sunat pun mak ngejalanko hukum agama. Kidang tian haga keti disunat, in tian dapok ngerasa bangga bahwa keti mentaati atoran ano.

¹⁴Kidang nyak sama sekali mak haga ngerasa bangga api pun, selain Tuhan ram Isa Almasih sai radu mati disalib. Mani justru Ia radu mati disalib, maka dunia mak lagi bereti api-api bagiku. Rik tehadap dunia inji, nyak pun seolah-olah radu mati.

¹⁵Disunat atau mak disunat, ano mak penting. Sai penting iado jadi manusia ampai.

¹⁶Bagi ulun-ulun sai hurik jama pendirian ano, rik reno juga bagi sunyin umat-Ni Allah, nyak ngeharap Allah haga ngeniko sejahtera rik rahmat-Ni.

¹⁷Selanjutni, dangdo sai jelma nyusahko nyak lagi, mani di badanku wat bukti-bukti bahwa nyak sai nutuk Isa.

¹⁸Semoga Tuhan ram Isa Almasih selalu ngeni berkat jama Puari-puari. Amin. Hormat sekam, Paulus