Read Lampung Api EFESUS 1 Bible Online

EFESUS 1 - Lampung Api bible

EFESUS 1

¹ Umat-Ni Allah di Efesus, sai setia jama Isa Almasih!

²Nyak, Paulus, rasul-Ni Isa Almasih atas kehaga-Ni Allah, ngeharap semoga Allah Bapa ram rik Tuhan Isa Almasih ngeni berkat rik sejahtera jama keti.

³Terpujido Allah, Bapa Tuhan ram Isa Almasih! Ia ngeberkati ram jama sunyin berkat rohani di delom surga, mani ram besatu jama Almasih.

⁴Semakkung dunia inji diciptako, Allah radu memilih ram liwat Almasih jama maksud in ram jadi kedau-Ni sai khusus rik mak becacat di hadap-Ni. Mani kasih-Ni Allah,

⁵maka Ia radu nantuko lebih mena bahwa liwat Isa Almasih, Ia haga ngangkat ram jadi anak-anak-Ni tenggalan. Rik sangun senodo sai mirak dilakuko-Ni.

⁶Terpujido Allah sai agung, mani liwat Anak-Ni sai tecinta Ia ngasihi ram.

⁷ Mani, ulih kematian Almasih, ram dibebasko ulih Allah, retini Ia radu ngampuni ram jak dusa-dusa ram.

⁸Ia ngelakuko ano mani Ia ngasihi nihan ram, rik kasih ano dilimpahko-Ni jama ram jama penuh bijaksana rik pengertian.

⁹Nutuk kehaga-Ni tenggalan, Allah ngeni pandai jama ram rahasia rencana-Ni; Ia radu mutusko bahwa rencana-Ni ano haga diselesaiko liwat Almasih.

¹⁰Rencana ano iado in sunyinni hal, baik sai di surga maupun di bumi, jadi sai jama Almasih sebagai kepala. Rik hal udi haga diselesaiko ulih-Ni Allah kik radu sampai waktuni.

¹¹Allah ngeguaiko sunyin hal nutuk kehaga-Ni rik keputusan-Ni tenggalan. Radu jak mula-mula Ia radu milih ram mani Ia mirak in ram jadi umat-Ni mani besatu jama Almasih.

¹²Tagando ram, sai mula-mula beharap jama Almasih memuji Allah ulih keagunganni!

¹³Keti pun radu jadi umat-Ni Allah sewaktu keti ngedengiko luhot-Ni Allah, yakdo Kabar Betik sai ngeni keselamatan jama niku. Keti percaya jama Isa Almasih, ulih seno Allah ngeni tanda kedau-Ni jama niku, yakdo Ruh-Ni sai dijanjiko-Ni.

¹⁴Ruh udido jaminan bahwa ram haga nerima api sai radu dijanjiko Allah jama umat-Ni. Inji ngeni keyakinan jama ram bahwa Allah haga ngebebasko umat-Ni. Terpujido Allah ulihni keagungan-Ni.

¹⁵Ulihni seno, radu jak nyak ngedengi bahwa keti percaya jama Tuhan Isa, rik keti mengasihi sunyin umat Allah;

¹⁶nyak mak putus-putusni beterima kasih jama Allah tentang keti. Selalu nyak nyebut gelarmu waktu nyak bedua.

¹⁷Nyak ngilu in Allah Tuhan ram Isa Almasih, Bapa sai mulia, ngeni Ruh-Ni jama niku. Ruh udi haga ngejadiko keti bijaksana, rik haga nyatako Allah jama niku sehingga keti kenal jama Ia.

¹⁸Nyak ngilu nihan in Allah ngebuka pikeranmu hingga jadi terang; in keti ngerti api sai keti dapok harapko jak Allah sai ngurau keti. Juga in keti pandai hara melimpah berkat-berkat sai helau sai disediako Allah jama umat-Ni;

¹⁹rik hara hibat-Ni Allah beguai jama penuh kuasa di delom ram sai percaya. Kuasa-Ni Allah udi gegoh injuk kuasa luar biasa

²⁰ sai dipakai-Ni waktu ngehurikko luot Almasih jak kematian rik ngeniko jama Ia kedudukan paling langgar jama-jama Allah di surga.

²¹Kedudukan-Ni Almasih ano jaoh lebih langgar jak kedudukan pemerintah, sunyin jelma sai nguasai, sunyin jelma sai mimpin, sunyin tuan-tuan rik sapa pun juga sai radu dikeniko kedudukan langgar; baik sai hurik di zaman inji maupun sai haga hurik di zaman sai haga ratong.

²² Allah menaklukko sunyinni di debah kekuasaan Almasih, rik ngeni Almasih jama jemaah sebagai kepala jak sunyin hal.

²³Jemaah iado badan-Ni Almasih, disempurnako ulih-Ni sai menyempurnako sunyin hal di dipa pun juga.