Read Lampung Api EFESUS 3 Bible Online

EFESUS 3 - Lampung Api bible

EFESUS 3

¹Udi sebabni nyak, Paulus, kuruk bui mani Isa Almasih untuk kepentingan keti sai lain Yahudi.

²Tantu keti radu ngedengi bahwa Allah, mani betik hati-Ni, radu ngeniko jama nyak tugas inji demi kepentinganmu.

³Allah ngungkapko rahasia rencana-Ni rik ngeni pandai jama nyak. (Tentang hal inji radu kutulis singkat di atas,

⁴ rik kik keti ngebacani, keti haga memahami rahasia tentang Almasih injuk nyak memahamini.)

⁵Tumbai rahasia udi mak pernah dikeni pandai jama manusia, kidang tano Ruh-Ni Allah radu nyatakoni jama rasul-rasul rik nabi-nabi-Ni.

⁶Rahasia udi iado inji: Liwat Kabar Betik udi, jelma lain Yahudi nutuk ngerasako berkat-berkat-Ni Allah sai tumbai disediako angkah untuk jelma Yahudi. Jelma-jelma lain Yahudi radu jadi anggota jak badan sai gegoh, rik nutuk nerima api sai dijanjiko Allah liwat Isa Almasih.

⁷Allah ngeniko jama nyak anugerah — yakdo tugas — untuk nyebarko Kabar Betik udi. Nyak nerima anugerah ano liwat kuasa-Ni Allah sai beguai di delom diriku.

⁸Di hantara sunyin umat-Ni Allah, nyakdo sai paling hina. Kidang Allah ngeniko jama nyak karunia inji: tugas untuk ngabarko jama ulun-ulun lain Yahudi Kabar Betik tentang kebatinan-Ni Almasih sai mak ngedok belani;

⁹rik juga in liwat nyak sunyin ulun pandai injuk repa Allah, Jelma Sai Nyiptako semesta alam inji, ngelaksanako rencana-Ni sai radu jak tumbai dirahasiako jama dunia.

¹⁰Maksud Allah yakdo tano, liwat jemaah, sunyin sai nyating kekuasaan di angkasa pandai kebijaksanaan-Ni Allah delom sunyin macam bantukni.

¹¹Allah ngelakuko ano sesuai rencana-Ni sai kekal, sai dilaksanako-Ni liwat Isa Almasih Tuhan ram.

¹²Jama percaya jama Almasih rik mani besatu jama Ia, ram dikeni kebebasan untuk ngeredik Allah jama percaya nihan.

¹³Ulihni seno, pekiluanku yakdo: dang khuater tentang api sai kuderita ulihni keti, mani sunyinni ano untuk kebetikanmu.

¹⁴Ulihni senodo nyak sujud di hadap Bapa.

¹⁵Jak Iado unggal keluarga di surga rik di bumi nerima sifat-sifat-Ni sai khusus.

¹⁶Nyak bedua semoga Allah sai mahamulia bekenan untuk nguatko hatimu jama Ruh-Ni.

¹⁷Semoga ulihni keti percaya jama Almasih, Almasih tinggal di delom hatimu, rik hurikmu didasarko rik dikuasai ulih kasih.

¹⁸Nyak bedua semoga jejama jama sunyin umat-Ni Allah, keti dapok nyelami hara luasni rik kejungni rik langgarni rik relamni kasih-Ni Almasih,

¹⁹sai jama akal manusia mak dapok dipahami serelam-relamni. Semoga keti kenal jama kasih-Ni Almasih udi, in keti penuh jama kepribadian Allah sai sempurna.

²⁰Jama kuasa-Ni Allah sai rajin beguai di delom diri ram, Allah dapok ngelakuko jaoh lebih lamon jak api sai dapok ram kilu atau pikerko.

²¹Hagani Allah dimuliako turun-temurun di delom jemaah, liwat Isa Almasih. Terpujido Allah selama-lamani! Amin.