Read Lampung Api EFESUS 5 Bible Online

EFESUS 5 - Lampung Api bible

EFESUS 5

¹Ketido anak-anak Allah sai dikasihi-Ni, ulihni seno keti harus berusaha nutuk teladan-Ni Allah.

² Hagani hurikmu temon-temon mengasihi injuk Almasih pun mengasihi ram. Ia ngurbanko diri-Ni untuk ram, sebagai persembahan sai merum rik nyenangko hati-Ni Allah.

³Ketido umat-Ni Allah. Ulihni seno, perbuatan-perbuatan sai hajor rik sai mak keruan, ataupun keserakahan mak patut wat di tengah-tengah keti. Dang sampai jelma bareh ngedok alasan untuk ngucakko bahwa keti bebuat hal-hal injuk reno.

⁴Mak juga patut jama keti ngucakko cawa-cawa sai kamak, sai hajor rik sai mak pantas. Sebalikni hagani keti ngucapko syukor jama Allah.

⁵Perhatiko betik-betik: jelma sai bekelakuan hajor, atau mak keruan, atau serakah (kelakuan injuk reno gegoh gaoh jama nyumbah berhala), jelma udi mak dapok jadi anggota umat sai diperintah ulih-Ni Almasih rik Allah.

⁶Dang keti tetipu ulih kicik-kicikan sai bangkang. Mani hal-hal injido sai nimbulko Allah butong tehadap jelma-jelma sai mak taat jama Ia.

⁷Jadi, dangdo behubungan sama sekali jama jelma-jelma injuk reno udi.

⁸Keti tenggalan tumbai wat di delom kekelaman. Tano keti radu jadi umat-Ni Tuhan, jadi keti wat delom terang. Ulihni seno keti harus hurik di delom terang.

⁹Mani jak terang udido terbit sunyin macam perbuatan sai betik, adil rik tulus di pengliakan Allah.

¹⁰Berusahado kenal jama api sai nyenangko hati-Ni Tuhan.

¹¹Dang ngelakuko perbuatan-perbuatan sai mak beguna sai dilakuko ulih jelma-jelma sai hurik delom kekelaman. Sebalikni, hagani keti ngebukak hal-hal injuk reno udi. (

¹²Mani hal-hal sai tian lakuko segok-segok ano, untuk dikicikko pun radu ngeliamko.)

¹³Sunyin hal sai disoroti di delom terang haga jelas keliakan.

¹⁴Mani sunyin sai dapok jelas diliak, yakdo terang. Udido sebabni diucakko, “Minjakdo, hai niku sai pedom, rik bangkitdo jak kematian! Almasih haga besinar atasmu.”

¹⁵Ulihni seno, perhatiko betik-betik cara hurikmu. Dang hurik injuk jelma-jelma bugu; hurikdo injuk jelma-jelma pintar.

¹⁶ Gunakodo sebetik-betikni unggal kesempatan sai wat jama niku, mani waktu inji iado waktu sai jahat.

¹⁷Dang bugu, kidang selidikido api sai dikehagai Tuhan.

¹⁸Dang keti mabuk ulih anggor, mani seno haga nyadangko keti. Sebalikni hagani keti dikuasai ulih Ruh-Ni Allah.

¹⁹ Pakaido cawa-cawa jak mazmur, nyanyian puji-pujian rik lagu rohani, delom kicik-kicikmu. Hagani keti jama hati sai riang ngenyanyiko puji-pujian jama Tuhan.

²⁰Selalu rik tentang api pun juga, hagani keti ngucapko terima kasih jama Allah Bapa, atas gelar-Ni Isa Almasih Tuhan ram.

²¹Untuk ngehormati Almasih, hagani keti tunduk peperda keti.

²² Inggom, tundukdo jama kajongmu, injuk jama Tuhan.

²³Mani kajong iado kepala atas inggomni, gegoh injuk Almasih pun jadi kepala atas jemaah rik Ia tenggalan pun juga Raja Penyelamat bagi jemaah sai jadi badan-Ni.

²⁴Gegoh injuk jemaah juga tunduk jama Almasih, injuk reno pun delom sunyin hal inggom harus tunduk jama kajong.

²⁵ Kajong, kasihido inggommu, gegoh injuk Almasih mengasihi jemaah rik ngurbanko diri-Ni untuk jemaah udi.

²⁶Almasih ngelakuko ano in Ia dapok ngecahko jemaah udi jama ajaran-Ni rik liwat way baptisan, in radu jak seno Ia dapok nyerahko jama Allah.

²⁷Renodo Almasih nyani jemaah udi cecok agung rik murni di hadap-Ni tanpa wat cacat atau cela api pun.

²⁸Renodo juga kajong harus mengasihi inggomni injuk ia mengasihi badanni tenggalan. Jelma sai mengasihi inggomni retini ia mengasihi dirini tenggalan. (

²⁹Mak pernah wat jelma sai nyuohko badanni tenggalan. Sebalikni, ia memelihara rik ngejagani injuk Almasih juga memelihara jemaah-Ni.

³⁰Ram pandai ano, mani ramdo anggota-anggota badan-Ni Almasih.)

³¹ Delom Alkitab tetulis, “Ulihni seno sai jelma bakas haga ninggalko bak-emakni untuk besatu jama inggomni, rik tian rua haga jadi sai.”

³²Ayat udi ngisi reti sai relam. Rik kukaitko ano jama hubungan hantara Almasih rik jemaah.

³³Kidang ayat tersebut wat hubunganni jama keti: Hagani unggal kajong mengasihi inggom injuk ia mengasihi dirini tenggalan rik hagani unggal inggom berusaha untuk ngehormati kajongni.