Read Lampung Api EFESUS 6 Bible Online

EFESUS 6 - Lampung Api bible

EFESUS 6

¹ Sanak-sanak! Sebagai jelma sai nutuk Almasih, taatido ulun tuhamu mani udido sai patut dilakuko.

² “Hormatido bakmu rik emakmu” iado perintah mula-mula jak Allah rik bejanji,

³yakdo: “In niku bebahagia rik kejung umormu di bumi”.

⁴ Puari-puari sai jadi bak! Dangdo memperlakuko anak-anakmu injuk reno sehingga tian jadi butong. Sebalikni, balakkodo tian jama tata tertib rik ajaran Tuhan.

⁵ Puari-puari sai jadi jelma sai ngebantu! Tutukdo perintah majikanmu di dunia inji. Lakukodo ano jama perasaan hormat rik patuh rik jama temon-temon seolah-olah keti lakuko jama Almasih tenggalan.

⁶Dang belaku injuk reno angkah waktu keti diawasi, angkah untuk mansa pujian manusia. Kidang hagani keti ngelakukoni sebagai jelma sai ngebantu Almasih sai sedang nutuk kehaga-Ni Allah sepenuh hati.

⁷Guai sai keti lakuko sebagai jelma sai ngebantu udi, hagani keti guaiko jama riang hati seolah-olah Tuhando sai keti layani, rik lain angkah manusia.

⁸Ingokdo bahwa unggal jelma, baik jelma sai ngebantu atau pun jelma sai bebas, haga nerima balosan jak Tuhan untuk hal-hal betik sai dilakukoni.

⁹ Puari-puari sai jadi majikan! Hagani keti besikap injuk reno tehadap jelma-jelma sai ngebantu niku. Dang lagi makai ancaman-ancaman. Ingok bahwa keti rik jelma-jelma sai ngebantu ano, jama-jama ngedok sai majikan, yakdo Tuhan sai di surga. Ia mak ngeliak pudak.

¹⁰Akherni, hagani keti jadi kuat, jama kekuatan sai keti mansa jak kuasa-Ni Tuhan, mani keti besatu jama Ia.

¹¹Pakaido sunyinni perlengkapan perang sai dikeniko Allah jama niku, in keti dapok betahan ngelawan siasat-siasat sai licik jak iblis.

¹²Mani ram bejuang lain ngelawan manusia, melainko ngelawan kekuatan sunyin sitan-sitan sai nguasai zaman sai jahat inji. Ram ngelawan kekuatan ruh-ruh jahat sai nguasai ruang angkasa.

¹³Ulihni seno, tano, pakaido sunyin perlengkapan perang-Ni Allah, in waktu rani sai jahat keti sanggup ngelawan serangan-serangan musuh. Rik in seraduni keti bejuang sampai akher, keti masih gagah perkasa.

¹⁴ Hagani keti siap siaga. Pakaido kesetiaan jama Allah sebagai ikok tengah, rik ketulusan sebagai kawai besimu.

¹⁵ Hagani kerilaan untuk ngabarko Kabar Betik sai ngusung sejahtera jadi sepatumu.

¹⁶Unggal waktu pakaido percayamu jama Tuhan sebagai senjata penangkis; jama iman udi keti dapok madamko sunyin anak panah sai wat apui jak si jahat.

¹⁷ Akukdo keselamatan sebagai tupi baja, rik cawa-Ni Allah sebagai pedang jak Ruh-Ni Allah.

¹⁸Lakukodo sunyinni udi sambil bedua untuk ngilu tulung jak Allah. Di unggal kesempatan, beduado injuk repa Ruh-Ni Allah mimpin keti. Hagani keti selalu siap rik dang nyerah. Beduado selalu untuk sunyin umat-Ni Allah.

¹⁹Rik beduado untuk nyak juga, in waktu nyak cawa, Allah ngeniko jama nyak cawa-cawa sai tepat. Rik in nyak bani dapok ngeni pandai rahasia Kabar Betik udi.

²⁰Mani Kabar Betik udido, nyak jadi utusan, rik tano wat di delom bui. Beduado in nyak bani cawa tentang Kabar Betik udi, injuk repa nyak haga cawa.

²¹ Tikhikus, puari ram rik jelma sai ngebantu sai setia delom guai-Ni Tuhan, haga ngeni pandai jama niku sunyin hal tentang nyak, in keti pandai keadaanku rik guaiku.

²²Udi sebabni nyak ngutus ia jama niku untuk ngeni pandai keadaan sekam jama niku sunyinni, in ngebalakko hatimu.

²³Semoga Allah Bapa, rik Tuhan Isa Almasih memungkinko sunyin jemaah untuk besatu rik saling mengasihi rik tetap percaya jama Almasih.

²⁴Semoga Allah ngeberkati Puari sunyin sai mengasihi Tuhan ram Isa Almasih jama kasih sai mak dapok padam. Hormat sekam, Paulus