Read Lampung Api FILIPI 1 Bible Online

FILIPI 1 - Lampung Api bible

FILIPI 1

¹ Puari-puari umat-Ni Allah sunyinni sai tinggal di Filipi, rik sai radu besatu jama Isa Almasih. Juga Puari-puari sai mimpin rik sai ngebantu jemaah! Nyak, Paulus, jejama Timotius, jelma-jelma sai ngebantu Isa Almasih,

²ngeharap in Allah Bapa ram rik Tuhan Isa Almasih ngeni berkat rik sejahtera jama keti.

³Unggal nyak ingok jama keti, nyak ngucapko terima kasih jama Allah.

⁴Rik unggal nyak ngeduako Puari sunyinni, nyak senang hati bedua.

⁵Nyak beterima kasih jama Allah mani radu jak mula-mula sampai tano, keti radu ngebantu nyak nyebarko Kabar Betik jak Allah.

⁶Allah tenggalan sai mulai guaini sai betik udi jama niku, rik nyak yakin Ia haga nerusko guaini udi sampai selesai di Rani Isa Almasih ratong luot.

⁷Sangun tepat di rangni nyak ngedok perasaan injuk reno tehadap keti, mani Puari sunyinni redik nihan di hatiku. Juga mani keti nutuk nerima jejama nyak, anugerah sai Allah keniko jama nyak; baik tano inji sementara nyak di delom bui ataupun waktu nyak wat di luah untuk ngebela rik mempertahanko Kabar Betik udi.

⁸Allah pandai bahwa nyak temon tiram nihan jama niku jama perasaan kasih mesra jak Isa Almasih tenggalan.

⁹Injido duaku untuk keti: semoga keti makin mengasihi Allah rik peperda keti rik terus betambah delom pengetahuan sai benor rik pandangan sai bijaksana.

¹⁰Jama injuk reno keti pandai milih api sai paling betik, rik hurikmu haga mekecah jak cela atau tuduhan api pun juga pada rani Almasih ratong luot.

¹¹Hurikmu haga melimpah jama perbuatan sai temon-temon betik sai angkah dapok dihasilko ulih-Ni Isa Almasih tenggalan; maka Allah haga dimuliako rik dipuji-puji.

¹²Nyak haga keti pandai, bahwa hal-hal sai radu tejadi jama nyak justru nyebabko lebih lamon jelma ngedengi rik percaya jama Kabar Betik udi.

¹³ Akibatni, sunyin pengawal istana rik jelma-jelma barehni di kota inji pandai bahwa nyak kuruk bui mani nyak ngelayani Almasih.

¹⁴Rik pengurunganku di bui radu nyebabko kelamonan ulun-ulun Kristen di kota inji jadi lebih yakin jama Tuhan, sehingga tian makin bani ngabarko luhot-Ni Allah jama mak rabai-rabai.

¹⁵Sangun wat pira-pira di hantara tian sai ngabarko Almasih mani sesera rik haga betangkar, kidang sai barehni ngabarko Almasih mani ngedok maksud sai murni.

¹⁶Jelma-jelma inji ngelakukoni mani tian ngasihi Allah rik nyak, mani tian pandai bahwa Allah radu nugasko nyak untuk nunjukko bahwa Kabar Betik udi benor.

¹⁷Kidang ulun bareh ngabarko Almasih jama maksud sai mak betik; tian ngabarko untuk kepentingan pribadi. Jama ano tian beharap dapok nyani nyak lebih susah di delom bui.

¹⁸Kidang mak mengapi! Mani injuk repa pun juga, baik udi dilakuko jama maksud sai murni ataupun jama maksud sai salah, kan Almasih dikabarko juga; jadi nyak senang. Rik nyak haga tetap ngerasa injuk reno,

¹⁹mani nyak pandai bahwa jama dua-duamu rik jama bantuan Ruh-Ni Isa Almasih, nyak haga dibebasko.

²⁰Sai nyak mirak nihan rik harapko iado in dang sekali-kali nyak gagal delom tugasku. Sebalikni nyak beharap in unggal waktu terutama nihan tano, nyak dapok besikap bani sehingga jama segenap jiwa ragaku — baik nyak hurik atau nyak mati — Almasih dimuliako.

²¹Mani bagiku, tujuan hurikku angkah Almasih! Rik mati retini untung.

²²Kidang kik jama hurik di dunia inji, nyak dapok ngelakuko guai sai lebih beguna, maka nyak mak pandai dipa sai harus kupilih.

²³Nyak ditarik jak rua pihak. Nyak mirak nihan ninggalko dunia inji untuk mik tinggal jama Almasih, ulihni senodo sai paling betik;

²⁴kidang, untuk kepentinganmu, iado lebih betik kik nyak tetap tinggal di dunia.

²⁵Nyak yakin jama hal seno. Udi sebabni nyak pandai nyak haga tetap tinggal jama Puari sunyinni, in dapok nulung keti jadi makin kuat rik makin senang delom percaya jama Tuhan.

²⁶Ulihni seno, kik nyak kanah muloh jama niku, keti sai radu besatu jama Isa Almasih haga ngedok lebih lamon lagi alasan untuk ngerasa bangga atas diriku.

²⁷Nah, sai penting tano iado bahwa keti hurik nutuk api sai dituntut ulih Kabar Betik tentang Almasih udi. Jama injuk reno, induh nyak dapok betungga jama niku atau mawat, nyak haga ngedengi bahwa keti teguh besatu rik bejuang jama-jama untuk angkah sai maksud rik sai kehaga; yakdo untuk kepercayaan sai nutuk Kabar Betik jak Allah udi.

²⁸Hagani keti selalu bani; dang rabai tehadap lawan-lawanmu. Jama injuk reno keti nunjukko bahwa tian pasti haga kalah, rik keti haga menang, mani Allah tenggalan sai ngeniko kemenangan jama niku.

²⁹Mani Allah radu ngeni anugerah jama niku lain angkah untuk percaya jama Almasih, kidang juga untuk menderita bagi Almasih.

³⁰ Tano keti juga nutuk nyak delom perjuangan sai gegoh, yakdo sai keti pernah liak nyak perjuangko tumbai, rik sai nyak masih tetap perjuangko sampai tano, injuk sai keti tano radu dengi.