Read Lampung Api FILIPI 2 Bible Online

FILIPI 2 - Lampung Api bible

FILIPI 2

¹Keti kuat, mani keti besatu jama Almasih. Rik keti tehibur mani Almasih mengasihimu! Keti dibimbing Ruh-Ni Allah, rik keti juga saling mengasihi rik kesian peperda keti.

²Nah, cubado keti benor-benor nyenangko hatiku jama hal-hal inji: Hurikdo sehati jama kasih sai gegoh, jama pikeran sai gegoh rik tujuan sai gegoh.

³Dangdo ngelakuko sai hal mani didurong kepentingan diri tenggalan, atau untuk ngepungahko diri. Sebalikni hagani keti masing-masing jama rendah hati nganggap ulun bareh lebih baik jak diri tenggalan.

⁴Perhatikodo kepentingan jelma bareh; dang angkah kepentingan diri tenggalan.

⁵Hagani keti bejiwa injuk Isa Almasih:

⁶Pada dasarni Ia gegoh jama Allah, kidang Ia mak ngerasa bahwa keadaan-Ni sai ilahi udi harus dipertahanko-Ni.

⁷Sebalikni, Ia ngelepasko sunyinni, raduni jadi gegoh injuk sai jelma sai ngebantu. Ia jadi injuk manusia, keliakan hurik injuk manusia.

⁸Ia ngerendahko diri, rik hurik taat jama Allah sampai mati — yakdo mati disalib.

⁹Ulihni senodo Allah ngangkat Ia selanggar-langgarni, rik ngeniko jama Ia kekuasaan sai lebih balak jak sunyinni kekuasaan sai bareh.

¹⁰ Maka untuk ngehormati Isa, sunyin makhluk sai di surga, rik sai di bumi rik sai di debah bumi, haga nyumbah Ia.

¹¹Tian sunyinni haga ngaku bahwa Isa Almasihdo Tuhan; jama injuk reno Allah Bapa dimuliako.

¹²Ulihni seno, Puari-puari sai tecinta, injuk repa keti selalu taat jama nyak waktu nyak wat di tengah-tengah keti, maka lebih-lebih tano waktu bejaohan, hagani keti tetap taat jama nyak. Keti radu diselamatko ulih-Ni Allah, jadi berusahado terus in kesejahteraanmu jadi sempurna. Lakukodo ano jama hormat rik patuh jama Allah,

¹³mani Allah tenggalan sai beguai di delom dirimu untuk nyani keti rila rik sanggup ngeriangko hati-Ni Allah.

¹⁴Guaikodo sunyin hal jama mak besungut-sungut dang betangkar.

¹⁵ Jama injuk reno keti nunjukko bahwa ketido anak-anak-Ni Allah sai mak becela, sai hurik tulus rik benor di tengah-tengah ulun jahat rik bedusa. Rik waktu keti nyampaiko jama tian kabar sai ngeni hurik, hagani keti jadi injuk cahaya sai besinar nerangi dunia bagi tian. Kik keti hurik injuk reno, kanah wat alasan bagiku untuk ngerasa bangga tentang keti waktu Isa Almasih ratong luot. Udi buktini bahwa perjuanganku mak sia-sia rik usahaku wat hasilni.

¹⁷Halokni nyak haga dibunuh rik rahku jadi injuk kurban curahan di atas apui sai keti persembahko jama Allah sebagai tanda bahwa keti percaya jama Ia. Kik sangun ano harus injuk reno, nyak besyukor atas hal ano rik nutuk riang jama keti.

¹⁸Reno juga hagani keti pun ngerasa senang rik nutuk riang jama nyak.

¹⁹Nyak percaya bahwa jama tulungan-Ni Tuhan Isa, nyak geluk dapok ngutus Timotius jama niku, in nyak dapok tehibur ulih kabar tentang keti.

²⁰Angkah Timotiusdo satu-satuni jelma sai sejiwa jama nyak, rik temon-temon mikerko kebahagiaanmu.

²¹Sunyin sai barehni angkah ngurus kepentingan diri tenggalan gaoh, lain kepentingan Isa Almasih.

²²Keti tenggalan radu ngeliak buktini bahwa Timotius beguna. Ia radu beguai keras jama-jama nyak untuk ngabarko Kabar Betik jak Allah. Sekam rua injuk anak jama bak gaoh.

²³Ulihni seno, seraduni nyak pandai injuk repa perkaraku selesai kanah, nyak haga ngutus ia jama niku.

²⁴Nyak percaya bahwa tulungan-Ni Tuhan, nyak tenggalan pun mak mesaka lagi haga napol keti muneh.

²⁵Tentang puari ram Epafroditus sai keti utus untuk ngebantu nyak, nyak ngerasa perlu untuk ngayun ia muloh jama niku. Ia radu ngedampingi nyak delom guai rik perjuanganku.

²⁶Ia tiram nihan jama Puari sunyinni, rik ia gelisah mani keti radu mansa kabar bahwa ia meruyuh.

²⁷Sangun temon ia meruyuh sampai hamper mati. Kidang Allah kesian jama ia; rik lain angkah jama ia gaoh, kidang jama nyak juga, in nyak dang jadi lebih sedih lagi.

²⁸Udi sebabni makin balak juga kehagaku untuk ngayun ia muloh jama niku, in keti riang lagi kik keti betungga jama ia, rik hatiku pun jadi tenang.

²⁹Jadi, sambutdo ia jama sunyin senang hati sebagai puari seiman. Hargaido sunyin jelma sai injuk ia.

³⁰Untuk kepentingan guai-Ni Almasih, ia hamper gaoh mati; ia mempertaruhko nyawani untuk ngeni tulungan jama nyak atas gelarmu.