Read Lampung Api FILIPI 3 Bible Online

FILIPI 3 - Lampung Api bible

FILIPI 3

¹Akherni, Puari-puariku, hagani keti riang mani keti radu besatu jama Tuhan. Nyak mak ngerasa biak untuk ngulangi api sai radu kutulis jama niku semakkungni, mani hal ano betik untuk keselamatanmu.

²Hati-hatido tehadap jelma-jelma sai ngelakuko hal-hal sai jahat, jelma-jelma sai pantas diucakko ‘kaci’. Tian ngedesak in jelma-jelma disunat.

³Padahal ramdo jelma-jelma sai radu nerima sunat sai sejati, lain tian. Ram nyumbah jama Allah jama bimbingan Ruh-Ni Allah tenggalan, rik ram besyukor mani ram hurik besatu jama Isa Almasih. Ram mak begantung jama upacara-upacara sai besifat laher.

⁴Sebenorni nyak gaoh dapok begantung jama upacara-upacara udi. Mani kik wat sai jelma sai ngerasa ia ngedok alasan untuk begantung jama upacara sai besifat laher, nyak lebih lagi.

⁵ Nyak disunat waktu beumor walu rani. Nyak laher sebagai ulun Israel, jak suku bangsa Benyamin; nyak ulun Ibrani asli. Delom ketaatan jama hukum-hukumni Yahudi, nyakdo anggota golongan Farisi.

⁶ Nyak malah besemangat nihan sehingga nyak nganiaya jemaah. Kik dinilai jak segi hukumni agama Yahudi, nyak jelma betik sai mak becela.

⁷Kidang ulih-Ni Almasih, maka sunyinni sai tumbai kuanggap sebagai suatu sai nguntungko, tano jadi hal sai ngerugiko.

⁸Lain gaoh hal-hal injuk reno; kidang malah sunyin hal kuanggap sebagai hal-hal sai angkah ngerugiko gaoh. Sai kukedau tano inji iado lebih berega: yakdo kenal jama Isa Almasih, Tuhanku. Mani Almasih, maka nyak radu ngelepasko sunyinni. Kuanggap sunyinni ano sebagai yuhyuh gaoh, in nyak dapok mansa Almasih,

⁹rik temon-temon besatu jama Ia. Hubungan sai betik jama Allah mak lagi nyak ngusahako tenggalan jama cara taat jama hukum agama. Tano nyak wat hubungan sai betik jama Allah, mani nyak percaya jama Almasih. Jadi, hubungan sai betik udi ratong jak Allah, rik bedasarko percaya jama Isa Almasih.

¹⁰Satu-satuni sai nyak mirak iado in nyak kenal jama Almasih, rik ngalami kuasa sai ngehurikko Ia jak kematian. Nyak mirak untuk menderita jama Ia rik jadi gegoh jama injuk Ia delom hal kematian-Ni.

¹¹Rik nyak beharap bahwa nyak tenggalan haga dihurikko luot jak kematian.

¹²Nyak mak cawa bahwa nyak radu behasil, atau radu jadi sempurna. Kidang nyak terus gaoh berusaha ngerebut hadiah sai disediako ulih-Ni Isa Almasih. Untuk anodo Ia radu ngerebut nyak rik ngejadiko nyak kedau-Ni.

¹³Tantuni, Puari-puari, nyak setemonni mak ngerasa bahwa nyak radu behasil ngerebut hadiah udi. Kidang wat sai hal sai kusani, yakdo nyak ngelupako api sai wat di kudanku rik berusaha keras mencapai api sai wat di hadap.

¹⁴Udi sebabni nyak tegar terus nuju tujuan akher untuk mansa kemenangan, yakdo hurik di surga; untuk senodo Allah ngurau ram liwat Isa Almasih.

¹⁵Ram sunyin sai radu dewasa secara rohani, harus besikap injuk reno. Kidang kik di hantaramu wat sai bependapat bareh, maka Allah haga ngejelaskoni juga jama niku.

¹⁶Kidang hal inji hagani diperhatiko: Ram harus tetap hurik nutuk atoran sai radu ram tutuk sampai saat inji.

¹⁷ Puari-puari sunyinni! Tutukdo teladanku. Sekam radu ngeniko teladan sai benor, ulihni seno perhatikodo betik-betik jelma-jelma sai nutuk teladanni sekam udi.

¹⁸Nyak radu risok nihan ngeni pandai jama niku, rik tano nyak miwang ngulangini, bahwa wat lamon jelma sai hurikni nyadangko retini kematian-Ni Almasih disalib.

¹⁹Hurik jelma-jelma injuk reno haga berakher jama kehancoran, mani diwa tian yakdo kehagani badan tian tenggalan. Hal-hal sai ngeliamko, justru senodo sai tian banggako; mani tian mikerko angkah hal-hal sai bekenan jama dunia inji gaoh.

²⁰Kidang ramdo warga negara surga. Jak udido juga Raja Penyelamat ram, Tuhan Isa Almasih haga ratong. Iado sai ram tiram nunggu-nungguni.

²¹Badan ram sai lemoh rik dapok hancor inji, haga diubah ulih-Ni Almasih jadi injuk badan-Ni tenggalan sai mulia. Ia dapok ngelakuko ano mani Ia wat kuasa untuk naklukko sunyinni.