Read Lampung Api FILIPI 4 Bible Online

FILIPI 4 - Lampung Api bible

FILIPI 4

¹Ulihni seno, Puari-puariku sai tecinta, injuk renodo hagani keti hurik rik temon-temon percaya jama Tuhan. Hatiku tiram jama niku! Ketido kebanggaanku sai nyani nyak riang.

²Puari sai bebai Euodia rik Puari sai bebai Sintike! Nyak ngilu nihan in Puari sehati sebagai ulun-ulun sai seiman.

³Untuk kantikku sai setia, nyak ngilu juga in Puari ngebantu kerua bebai udi. Tian radu beguai keras jejama nyak untuk ngabarko Kabar Betik jak Allah; gegoh injuk Klemen rik sunyin jelma bareh sai beguai jejama nyak. Gelar-gelar tian wat delom Buku Ulun Hurik.

⁴Semoga keti selalu riang mani keti radu hurik besatu jama Tuhan. Sekali lagi nyak cawa: riangdo!

⁵Hagani sunyinni jelma dapok ngeliak sikapmu sai betik hati. Mani mak mesaka lagi Tuhan haga ratong.

⁶Dang khuater tentang api pun. Delom sunyin hal, beduado rik ajuko kiluanmu jama Allah. Api sai keti perluko, keni pandai ano selalu jama Allah jama ngucapko terima kasih.

⁷Maka sejahtera jak Allah sai mak halokni dapok dimengerti manusia, haga ngejaga hati rik pikeranmu sai radu besatu jama Isa Almasih.

⁸Akherni Puari-puari, isido pikeranmu jama hal-hal sai benilai, sai patut dipuji, yakdo hal-hal sai benor, sai tehormat, sai adil, murni, manis, rik betik.

⁹Jalankodo api sai keti pelajari rik terima jak nyak; baik jak cawa-cawa ataupun jak perbuatan-perbuatanku. Allah sumber sejahtera, haga menyertai keti.

¹⁰Delom hurikku sai besatu jama Tuhan, nyak ngerasa bahagia nihan, mani radu injuk reno saka, tano keti sempat lagi mikerko keadaanku. Maksudku lain hal bahwa keti radu ngelupako nyak, keti sangun memperhatiko nyak, kidang keti mak mansa kesempatan untuk nunjukkoni.

¹¹Nyak ngemukako inji lain mani nyak kekurangan, mani nyak radu belajar ngerasa puas jama api sai wat.

¹²Nyak radu ngalami hurik serba kekurangan, rik juga hurik berlebihan. Nyak radu kenal jama rahasiani untuk ngehadapi keadaan sai injuk repa pun juga; baik keadaan makmur ataupun keadaan mejerih, baik keadaan mewah maupun keadaan kekurangan.

¹³Jama kuasa sai dikeniko Almasih jama nyak, nyak ngedok kekuatan untuk ngehadapi sunyin rupa keadaan.

¹⁴Kidang keti radu nulung nyak di delom kesusahanku; rik api sai keti lakuko udi sangun betik.

¹⁵ Puari-puari jelma Filipi! Keti tenggalan pandai nihan bahwa waktu nyak ninggalko Makedonia tumbai, waktu Kabar Betik udi kusebarko untuk mula-mulani, ketido satu-satuni jemaah sai ngebantu nyak; keti satu-satuni sai nutuk ngerasako untung rugi jejama nyak.

¹⁶ Waktu nyak di Tesalonika rik memerluko bantuan, radu lebih jak sekali keti ngirim bantuan jama nyak.

¹⁷Udi lain retini nyak angkah mirak nerima pengenian. Sai nyak mirak iado in nyak dapok ngeliak hasil-hasil sai nambah untungmu.

¹⁸ Nyak radu nerima sunyinni — malah lebih jak cukup! Sunyin pengenian sai keti kirim jama nyak, radu kuterima jak Epafroditus. Tano nyak ngedok sunyin sai kuperluko. Pengenian-pengenian jak keti ano yakdo injuk himbau sai merum jak kurban sai dipersembahko jama Allah rik sai diterima ulih-Ni Allah jama senang hati.

¹⁹Allah sai kusumbah, sai melimpah jama kebatinan delom Isa Almasih, haga memenuhi sunyin keperluanmu.

²⁰Terpujido Allah Bapa ram selama-lamani! Amin.

²¹Sampaikodo salamku jama sunyinni umat-Ni Allah sai besatu jama Isa Almasih. Rik terimado juga salam jak puari-puari sai wat jejama nyak di dija.

²²Sunyin umat-Ni Allah di kota inji, terutama tian sai jak istana Kaisar, ngirim salam jama keti.

²³Semoga Tuhan Isa Almasih ngeberkati Puari sunyinni. Hormat sekam, Paulus rik Timotius