Read Lampung Api KOLOSE 1 Bible Online

KOLOSE 1 - Lampung Api bible

KOLOSE 1

¹Puari-puari umat-Ni Allah di Kolose sai setia besatu jama Almasih! Sebagai rasul-Ni Isa Almasih, — atas pengangkatan Allah — nyak, Paulus, jejama jama puari ram Timotius, ngeharap semoga Allah Bapa ram ngeni berkat rik sejahtera jama keti.

³Sekam radu ngedengi bahwa keti percaya jama Isa Almasih rik keti mengasihi sunyin umat-Ni Allah. Udi sebabni waktu sekam bedua untuk niku, sekam selalu ngucapko terima kasih jama Allah, Bapa Tuhan ram Isa Almasih.

⁵Keti percaya rik keti mengasihi, mani keti ngeharap haga api sai disediako di surga ulih-Ni Allah jama keti. Keti radu ngedengi tentang hal seno, waktu Kabar Betik sai benor disampaiko jama niku.

⁶Kabar jak Allah udi tesebar mik sunyin dunia, rik hurik jelma terus diberkati ulih kabar udi, gegoh injuk hurikmu diberkati jak waktu keti ngedengi tentang rahmat-Ni Allah rik benor-benor ngehayatini.

⁷ Hal ano disampaiko jama Puari ulih Epafras, kantik sai sekam kasihi. Ia sai ngebantu Almasih sai setia beguai untuk kepentingan ram.

⁸Jak iado sekam ngedengi bahwa jama kuasa jak Ruh-Ni Allah keti dapok saling mengasihi.

⁹Udido sebabni sekam selalu bedua untuk keti radu jak sekam ngedengi tentang keti. Sekam ngilu jama Allah in Ruh-Ni Allah ngeniko jama niku kebijaksanaan rik pengertian sehingga keti sempurna ngemandai api kehaga-Ni Allah.

¹⁰Jama injuk reno keti dapok hurik nutuk kehaga-Ni Allah, rik selalu nyenangko hati-Ni, sehingga delom sunyin hal keti dapok ngehasilko hal-hal sai betik. Rik pengetahuan keti tentang Allah pun haga betambah juga.

¹¹Semoga jama kuasa jak Allah sai agung, keti dikuatko sehingga keti sanggup menderita sunyin hal rik sabar rik senang hati,

¹²rik jama ngucapko terima kasih jama Bapa. Mani Bapa udido sai nyani keti layak nerima api sai disediako Allah bagi umat-Ni di delom kerajaan-Ni sai terang.

¹³Ia radu ngelepasko ram jak kuasa kekelaman rik ngalihko ram mik delom kerajaan Anak-Ni sai dikasihi-Ni.

¹⁴ Ulih Anak-Ni udi ram dibebasko; retini dusa-dusa ram radu diampuni.

¹⁵Almasih yakdo gambar sai nyata jak diri-Ni Allah sai mak keliakan; Almasih yakdo anak sai tuha, lebih utama jak sunyin sai diciptako.

¹⁶Mani liwat Iado Allah nyiptako sunyin hal di surga rik di atas bumi, sunyin hal sai keliakan rik sai mak keliakan, kuruk juga sunyin ruh sai bekuasa rik sai memerintah. Sunyin alam inji diciptako liwat Almasih rik untuk Almasih.

¹⁷Semakkung sunyin hal wat, Almasih radu lebih mena wat. Rik mani Iado juga maka sunyin hal wat di rangni masing-masing.

¹⁸ Iado ulu jak badan-Ni, yakdo jemaah, mani Iado sumber hurik jemaah udi. Iado Anak sai tuha, sai mula-mula dihurikko luot jak kematian, in Ia tenggalan gaoh sai jadi terpenting jak sunyin hal.

¹⁹Allah tenggalando sai ngehagako in sunyin hal sai wat di diri-Ni Allah, wat juga lengkap di diri Anak-Ni.

²⁰ Rik liwat Anak udi muneh Allah memutusko untuk nyani sunyin hal muloh betik lagi jama Ia — baik sunyin hal sai di bumi, maupun sai di surga. Allah ngelakuko ano liwat kematian Anak-Ni di kayu salib.

²¹Tumbai keti jaoh jak Allah. Keti memusuhi-Ni mani kelakuan rik pikeranmu jahat.

²²Kidang tano, jama kematian Anak-Ni, Allah nyani hubungan keti jama Ia jadi betik luot. Jama cara ano keti dapok diusung ngehadap Allah delom keadaan sai suci, murni rik tanpa cela.

²³Kidang tantu keti harus tetap setia percaya rik berdiri teguh jama kepercayaanmu. Dang sampai keti ngelepasko harapan sai radu dikeniko jama niku waktu keti nerima Kabar Betik jak Allah. Kabar udi radu dikabarko jama unggal jelma di sunyin dunia. Rik nutuk senodo juga nyak; Paulus, radu jadi jelma sai ngelayani.

²⁴Tano nyak senang menderita untuk kesenanganmu. Mani jama penderitaan badanku, kulengkapi api sai masih harus diderita ulih-Ni Almasih untuk jemaah-Ni, yakdo badan-Ni.

²⁵Allah ngayun nyak jadi jelma sai ngebantu jemaah-Ni untuk kepentinganmu. Nyak harus nyampaiko kabar jak Allah, sunyinni;

²⁶yakdo kabar sai selama beratus-ratus tahun sai radu dirahasiako ulih-Ni Allah jama sunyin jelma, kidang tano dinyatako jama umat-Ni.

²⁷Jama umat-Ni ano Allah haga nyatako hara betikni rik agungni rahasia-Ni ano untuk sunyin manusia. Rahasia ano iado: Almasih wat delom dirimu, sai retini keti haga nutuk ngerasako keagungan-Ni Allah.

²⁸Almasih anodo sai sekam kabarko jama unggal jelma. Sekam ngingokko rik ngajar tian sunyinni jama sunyin kebijaksanaan. Tujuan sekam iado in unggal jelma dapok diusung jama Allah, sebagai jelma sai dewasa delom hal-hal rohani, mani radu besatu jama Almasih.

²⁹Untuk mencapai hal udi nyak beguai keras. Nyak bejuang jama sunyin tenaga sai dikeniko Almasih jama nyak rik sai beguai penuh kuasa delom diriku.