Read Lampung Api KOLOSE 3 Bible Online

KOLOSE 3 - Lampung Api bible

KOLOSE 3

¹ Keti radu dihurikko luot jejama Almasih. Ulihni seno harusdo keti berusaha untuk mansa hal-hal sai di surga, di dipa Almasih memerintah jejama jama Allah.

²Arahko pikeranmu jama hal-hal sai di dudi, dang jama hal-hal sai di dunia.

³Mani keti radu mati, rik hurikmu tesegok jama-jama Almasih di delom Allah.

⁴Nah, sumber hurikmu sai sejati iado Almasih rik kik Ia keliakan kanah keti juga haga tampil jejama jama Ia delom keagungan-Ni!

⁵Ulihni seno, matiko rasa kemirakanni dunia sai ngerongrong dirimu, injuk guai hajor, hal-hal sai mak keruan, hawa nafsu, rasa mirak sai jahat, rik keserakahan (mani keserakahan yakdo gegoh jama nyumbah berhala).

⁶Hal-hal injuk reno senodo sai ngebangkitko butong-Ni Allah tehadap jelma-jelma sai mak taat jama Ia.

⁷Tumbai keti tenggalan pun nutuk kemirakan-kemirakan udi, waktu keti dikuasai ulihni.

⁸Kidang tano hagani keti ngetokko hal-hal sai jahat jak dirimu: dang lagi butong, atau ngamuk atau ngedok perasaan menyuoh tehadap ulun bareh. Dang sekali-kali luah jak bangukmu cawa-cawa caci maki atau cawa kamak.

⁹ Dang bebuhung peperda keti, mani hurik sai saka jama sunyin sifatni radu keti lepasko.

¹⁰ Keti tano radu dikeni hurik sai ampai. Ketido manusia ampai sai sedang dibantuk terus-menerus ulih Jelma Sai Nyiptakoni, yakdo Allah, nutuk rupa-Ni tenggalan. Maksudni iado in keti sempurna kenal jama Allah.

¹¹Sebagai akibat jak seno, lebondo sunyin perbidaan-perbidaan hantara jelma Yahudi rik lain Yahudi, jelma besunat rik jelma mak besunat, mak ngedok lagi perbidaan hantara jelma asing rik jelma biadab, hantara jelma sai ngebantu rik jelma bebas, mani Almasih ano sunyinni rik Ia besatu jama tian sunyin!

¹² Puari anodo umat-Ni Allah. Allah mengasihi keti rik milih keti untuk jadi kedau-Ni sai khusus. Udido sebabni keti harus nunjukko rasa kesian, keti harus betik hati, rendah hati, lemoh lembut, rik tahan menderita.

¹³ Keti harus sabar peperda keti, rik saling ngampuni kik wat sai ngerasa dendam tehadap sai bareh. Tuhan jama senang hati ngampuni keti, jadi keti pun harus haga ngampuni peperda keti.

¹⁴Rik sai terpenting iado: Keti harus saling mengasihi mani kasih udido sai menyatupaduko Puari-puari sunyinni sehingga jadi sempurna.

¹⁵Hagani keputusan-keputusanmu ditantuko ulih kedamaian sai dikeniko ulih Almasih di delom hatimu. Mani Allah ngurau keti untuk jadi anggota sai badan, in keti hurik delom kedamaian jak Almasih udi. Hagani keti beterima kasih.

¹⁶ Hagani ajaran-ajaran-Ni Almasih sai lamon berkat ngeresap mik delom hatimu. Hagani keti saling ngajar rik saling ngeni petuah sai bijaksana nihan. Nyanyikodo mazmur rik puji-pujian rik lagu rohani; benyanyido untuk Allah jama rasa syukor di delom hati.

¹⁷Sunyinni api sai keti lakuko atau cawako, harusdo ano dilakuko atau cawako atas gelar-Ni Tuhan Isa. Besyukordo jama Allah Bapa untuk api sai dilakuko Isa jama niku.

¹⁸ Puari-puari sai jadi inggom! Taatdo jama kajongmu, mani renodo seharusni kelakuanmu sebagai jelma Kristen.

¹⁹ Puari-puari sai jadi kajong! Kasihi inggommu. Dang kasar tehadap tian.

²⁰ Sanak-sanak! Kewajiban keti sebagai jelma Kristen untuk selalu taat jama bak-emak, mani senodo sai nyenangko hati-Ni Allah.

²¹ Puari-puari sai jadi bak! Dang nyani sakik hati anak-anakmu sehingga tian jadi putus asa.

²² Puari-puari sai jadi jelma sai ngebantu! Delom sunyin hal, hagani keti taat jama majikanmu sai di dunia inji. Dang taat jama tian angkah waktu tian sedang ngawasi keti, mani keti mirak dipuji. Taatdo jama tian jama hati sai ikhlas, mani keti ngehormati Tuhan.

²³Guai api gaoh sai dikeniko jama niku, hagani keti ngeguaikoni jama sepenuh hati, seolah-olah Tuhando sai keti layani, rik lain angkah manusia.

²⁴Ingokdo bahwa keti haga nerima upah jak Tuhan. Api sai disediako Tuhan untuk umat-Ni, udido sai haga dikeniko jama niku. Mani majikan sai sebenorni sedang dilayani ulih keti iado Almasih tenggalan.

²⁵ Rik sapa pun sai bebuat salah, haga nanggung kesalahan-kesalahan ano; mani Tuhan mak ngeliak pudak.