Read Lampung Api 1 TESALONIKA 1 Bible Online

1 TESALONIKA 1 - Lampung Api bible

1 TESALONIKA 1

¹ Puari-puari jemaah di Tesalonika, sai jadi umat-Ni Allah Bapa rik Tuhan Isa Almasih: Sekam, yakdo Paulus, Silas rik Timotius ngeharap semoga Allah ngeni berkat rik sejahtera jama keti.

²Sekam selalu besyukor jama Allah mani Puari sunyinni. Unggal sekam bedua jama Allah rik Bapa ram, sekam selalu ingok keti. Sekam selalu ngeduako keti. Sekam ingok injuk repa keti nunjukko delom perbuatan bahwa keti percaya jama Almasih, injuk repa keti mengasihi jelma bareh sehingga ngelayani tian, rik injuk repa keti kuat ngeharap jama Tuhan ram Isa Almasih.

⁴Sekam pandai, Puari-puari, bahwa Allah mengasihi keti rik radu milih keti jadi kedau-Ni sai khusus.

⁵Mani sekam nyampaiko Kabar Betik jama niku lain jama cawa-cawa gaoh, kidang jama kuasa rik Ruh-Ni Allah. Rik sekam yakin nihan tentang kebenoran jak Kabar Betik udi. Keti pandai injuk repa sekam hurik untuk kepentinganmu waktu sekam wat di tengah-tengah keti.

⁶ Keti nutuk teladanni sekam rik teladan-Ni Tuhan. Meskipun keti menderita nihan, keti nyambut riang kabar sai sekam kabarko jama niku. Keriangan ano dikeni ulih Ruh-Ni Allah.

⁷Renodo keti jadi cuntoh untuk sunyin jelma Kristen sai di Makedonia rik Akhaya.

⁸Mani mulai jak keti, kabar tentang Tuhan radu tesebar sampai di Makedonia rik Akhaya. Rik lain angkah udi gaoh; bahkan kabar tentang injuk repa keti percaya jama Allah radu sampai mik dipa-dipa sehingga sekam mak perlu lagi ngucakko api-api.

⁹Sunyin ulun udi cawa tentang injuk repa keti nerima sekam waktu sekam tumbai ratong jama niku. Tian cawa tentang injuk repa keti ninggalko berhala-berhala rik ratong jama satu-satuni Allah sai hurik untuk ngabdi jama Ia.

¹⁰Tian cawa juga tentang injuk repa keti ngeharapko ratong-Ni Anak Allah jak surga, yakdo Isa, sai radu dihurikko ulih-Ni Allah jak kematian. Isa udido juga sai nyelamatko ram jak butong-Ni Allah sai haga ratong.