Read Lampung Api 1 TESALONIKA 2 Bible Online

1 TESALONIKA 2 - Lampung Api bible

1 TESALONIKA 2

¹Puari-puari! Keti tenggalan pandai bahwa tapol sekam jama niku mak percuma.

² Keti pandai bahwa semakkung sekam ratong jama niku di Tesalonika, sekam radu dianiaya rik dihina di Filipi. Kidang walaupun lamon jelma ngelawan sekam, Allah ram radu ngeniko kebanian jama sekam untuk ngabarko jama niku Kabar Betik sai asalni jak Ia.

³Urauan sekam jama niku lain hak sai hal sai keliru; juga lain hak jama maksud sai mak murni atau untuk nipu.

⁴Mawat! Sekam mak cawa untuk nyenangko hati jelma, melainko untuk nyenangko hati-Ni Allah, sai nguji hati sekam. Mani sekam dianggap layak ulih-Ni Allah untuk nyebarko Kabar Betik udi.

⁵Keti tenggalan pandai bahwa mak pernah sekam manis banguk atau ngebuhungi keti untuk nyegokko maksud-maksud serakah. Allah saksini!

⁶Sekam mak berusaha juga untuk mansa pujian jak jelma — baik jak keti maupun jak ulun bareh. Sebenorni sebagai rasul-Ni Almasih, sekam ngasi gaoh nuntut sai hal jak keti.

⁷Kidang sekam besikap lemoh lembut sewaktu di tengah-tengah keti, injuk sai emak ngerawat anak-anakni.

⁸Ulih kasih sayang sekam, sekam besedia ngeniko jama niku lain gaoh Kabar Betik sai jak Allah udi, kidang hurik sekam pun juga. Mani sekam mengasihi keti nihan.

⁹Tantu keti masih ingok injuk repa kerasni sekam berusaha rik bejuang. Di rani di bingi sekam beguai in sekam mak nyusahko sai jelma pun jak keti sewaktu sekam nyebarko Kabar Betik sai jak Allah udi jama niku.

¹⁰Sekam hurik suci, benor rik tanpa cela tehadap keti sai radu percaya jama Almasih. Ketido saksi-saksi sekam, reno juga Allah.

¹¹Keti pandai bahwa sekam memperlakuko keti masing-masing injuk sai bak memperlakuko anak-anakni.

¹²Sekam ngeni petuah jama keti, sekam ngeni durongan jama niku rik sekam ngedesak in keti hurik injuk reno rupa sehingga nyenangko hati-Ni Allah. Mani Allah radu ngurau keti untuk jadi warga Dunia Ampai Allah rik ngerasako keagungan-Ni.

¹³Wat lagi sai hal bareh sai nyani sekam selalu ngucapko terima kasih jama Allah. Hal udi iado, bahwa waktu sekam nyampaiko kabar jak Allah jama niku, keti ngedengi rik nerima kabar udi lain sebagai kabar jak manusia kidang sebagai kabar sai benor-benor jak Allah. Iado sai sedang beguai delom dirimu sai percaya jama Almasih.

¹⁴ Puari-puari, hal sai keti alami radu dialami juga ulih jemaah-jemaah-Ni Allah di Yudea sai jadi kedau-Ni Isa Almasih. Keti ngalami penderitaan jak bangsamu tenggalan, gegoh injuk sai dialami ulih jemaah-jemaah-Ni Allah di Yudea udi jak pihak-pihak jelma-jelma Yahudi.

¹⁵ Jelma-jelma udi sai ngebunuh Tuhan Isa rik nabi-nabi, juga nganiaya sekam. Tian ngemusuhi sunyin jelma rik Allah sama sekali mak senang jama sekam.

¹⁶Bahkan tian ngehalang-halangi sekam untuk ngabarko jama bangsa-bangsa lain Yahudi kabar sai dapok nyelamatko bangsa-bangsa udi. Jama injuk reno jelma-jelma Yahudi ano nambah terus dusa-dusa tian sampai jumlahni lengkap. Rik tano tian akherni kena butong-Ni Allah.

¹⁷Kidang Puari-puari, radu jak sekam tepisah sementara waktu jak keti — tepisah di mata kidang mak di hati — sekam semakin tiram jama niku rik berusaha temon-temon untuk betungga lagi jama keti!

¹⁸Sekam beniat mik napol keti, rik nyak, radu nyubani sai rua kali, kidang iblis ngehalangi sekam.

¹⁹Temon ketido harapan rik keriangan rik mahkota kebanggaan sekam. Mani kanah kik Tuhan Isa ratong, rik ram ngehadap-Ni, maka ketido sai haga jadi kebanggaan sekam!

²⁰Sangun ketido kebanggaan rik keriangan sekam.