Read Lampung Api 1 TESALONIKA 3 Bible Online

1 TESALONIKA 3 - Lampung Api bible

1 TESALONIKA 3

¹ Akherni rasa tiram sekam mak tetahan lagi. Ulihni seno sekam bepiker lebih helau sekam ditinggalko tenggalan di Atena,

²sementara sekam ngutus puari ram Timotius. Ia jelma sai ngebantu Allah sai beguai jejama sekam untuk ngabarko Kabar Betik tentang Almasih. Sekam ngutus Timotius jama niku in ia nguatko keti rik ngedurong keti untuk lebih percaya lagi jama Almasih.

³Jama injuk reno mak sai jelma pun jak keti sai mundor mani penderitaan-penderitaan ram inji. Keti tenggalan pandai bahwa penderitaan-penderitaan udi kuruk delom rencana-Ni Allah untuk ram.

⁴Waktu sekam masih jejama keti, sekam radu ngeni pandai jama niku lebih mena bahwa ram haga menderita. Rik sangun udi benor-benor radu tejadi, keti tenggalan ngemandaini.

⁵Udido sebabni nyak ngutus Timotius, mani nyak mirak nihan pandai injuk repa kemajuanmu delom hal percaya jama Almasih. Nyak khuater iblis behasil ngeguda keti sehingga sunyin jerih payah sekam jadi sia-sia.

⁶ Tano Timotius radu muloh rik radu nyampaiko jama sekam kabar riang tentang injuk repa keti percaya jama Almasih rik saling mengasihi. Ia ngeni pandai jama sekam bahwa keti selalu ngepikko kenang-kenangan sai betik tentang sekam di hatimu. Rik keti mirak betungga jama sekam, gegoh injuk sekam pun mirak betungga jama keti.

⁷Udido sebabni, Puari-puari, di delom sunyinni kesusahan rik penderitaan sekam, sekam tehibur ulih kabar tentang keti. Percayamu jama Almasih ngeriangko hati sekam,

⁸sehingga tano sekam ngerasa temon-temon hurik, asal keti tetap berdiri tegak, besatu jama Tuhan.

⁹Hara balakni rasa terima kasih sekam jama Allah atas sunyin keriangan sai sekam alami di hadapan-Ni mani keti.

¹⁰Di rani di bingi sekam ngilu sepenuh hati jama Ia, in sekam dapok betungga tenggalan jama keti untuk ngelengkapi api sai keti perluko untuk percaya jama Almasih injuk repa mestini.

¹¹Semoga Allah Bapa ram tenggalan, rik Tuhan ram Isa ngeratako renglaya bagi sekam untuk betungga jama keti!

¹²Semoga Tuhan nyani keti semakin mengasihi peperda keti rik semakin mengasihi sunyin jelma, sehingga kasihmu ano betambah-tambah, gegoh injuk kasih sekam jama niku.

¹³Jama injuk reno Tuhan haga nguatko hatimu, sehingga keti suci rik mak becela di hadap-Ni Allah Bapa ram, waktu Tuhan ram Isa ratong jejama sunyin jelma sai jadi kedau-Ni.