Read Lampung Api 1 TESALONIKA 4 Bible Online

1 TESALONIKA 4 - Lampung Api bible

1 TESALONIKA 4

¹Akherni Puari-puari, sekam radu ngeniko teladan jama niku tentang injuk repa keti harus hurik untuk nyenangko hati-Ni Allah. Sangun keti radu hurik injuk reno. Kidang tano atas kuasa-Ni Tuhan Isa, sekam ngilu nihan jama niku rik ngedesak in keti lebih berusaha lagi delom hal seno!

²Mani keti radu pandai petunjuk-petunjuk sai radu sekam keniko jama niku atas kuasa-Ni Tuhan Isa.

³Injido kehaga-Ni Allah: In keti hurik khusus untuk Ia, suci, ngejaohko sunyin perbuatan sai hajor.

⁴Unggal bakas di hantara keti harus pandai injuk repa hurik jejama inggomni jama cara sai nyenangko hati-Ni Allah rik manusia.

⁵Dang hurik untuk kemirakan hawa nafsu tehadap inggommu, injuk sai dilakuko ulih jelma-jelma sai mak kenal jama Allah.

⁶Delom hal injuk reno, dang sai jelma pun nyani salah jama puarini ataupun nipuni. Tumbai sekam radu ngeni peringatan keras jama niku, bahwa Tuhan haga ngehukum jelma-jelma sai ngelakuko kesalahan-kesalahan injuk reno.

⁷Allah ngurau ram lain in ram hurik hajor, melainko in ram hurik jama cara sai nyenangko hati-Ni.

⁸Jelma sai nulak ajaran inji, lain hak nulak manusia, melainko nulak Allah sai ngeniko Ruh-Ni sai suci jama niku.

⁹Mak perlu lagi sekam nulis jama niku tentang injuk repa keti harus mengasihi puari-puari sai seiman. Keti tenggalan radu diajarko ulih-Ni Allah untuk saling mengasihi.

¹⁰Rik hal sinji radu keti tunjukko tehadap sunyin puari seiman di sunyin Makedonia. Kidang, Puari-puari, sekam ngilu nihan, in hurikmu jadi lebih betik lagi.

¹¹Berusahado hurik tenang rik mak nyampori persoalan jelma barih. Hagani keti beguai nyepok nafkah tenggalan, injuk repa sekam tumbai radu perintahko jama niku.

¹²Kik keti hurik injuk reno; keti mak begantung jama sapa pun juga, rik jelma-jelma sai mak percaya jama Almasih, haga ngehormati keti.

¹³Puari-puari sekam mirak in keti pandai sai sebenorni tentang jelma-jelma sai radu mati; in keti mak besedih hati injuk jelma bareh mak ngedok pengharapan.

¹⁴Ram percaya bahwa Isa radu mati rik hurik luot. Udi sebabni ram percaya juga bahwa Allah haga ngehurikko luot sunyin jelma sai percaya jama Isa rik radu mati, in tian hurik jejama Ia.

¹⁵ Tentang hal seno, injido ajaran Tuhan sai sekam haga sampaiko jama niku: Waktu Tuhan Isa ratong, ram sai masih hurik mak haga lebih mena jak jelma-jelma sai radu mati lebih mena.

¹⁶Kanah malaikat agung haga beseru jama suara kerasni rik trumpet-Ni Allah dibunyiko sebagai tanda aba-aba. Raduni Tuhan Isa tenggalan haga regah jak surga, rik jelma-jelma Kristen sai radu mati haga dihurikko lebih mena.

¹⁷Radu jak seno, ram sai masih hurik waktu seno haga jejama diiwak jama tian mik delom awan-awan untuk betungga jama Tuhan di udara. Raduni ram haga tinggal jama Tuhan selama-lamani.

¹⁸Ulihni seno hagani keti saling nguatko hati jama memakai cawa-cawa inji.