Read Lampung Api 1 TESALONIKA 5 Bible Online

1 TESALONIKA 5 - Lampung Api bible

1 TESALONIKA 5

¹Puari-puari, mak perlu sekam nulis jama niku kapan waktuni sai tepat hal-hal seno haga tejadi.

² Mani keti tenggalan jelas pandai bahwa Rani ratong-Ni Tuhan udi haga sampai injuk maling ratong waktu di bingi.

³Kik ulun cawa, “Sunyinni aman rik tenteram,” maka waktu udido tiba-tiba tian haga ditimpa kebinasaan, rik mak sai jelma pun haga lulos. Hal ano haga tejadi tiba-tiba, injuk perasaan sakik nganak sai menimpa bebai sai haga nganak.

⁴Kidang keti lain hak jelma sai hurik di delom kekelaman, sehingga rani inji ngejutko keti injuk ratongni maling.

⁵Puari sunyinni iado jelma sai hurik delom terang; keti tegolong waktu di rani sai terang. Ram lain jelma sai hurik delom kekelaman, atau sai tegolong waktu di bingi sai kelam.

⁶Ulihni seno ram mak ngasi pedom-pedom gaoh injuk ulun bareh. Ram harus waspada rik pikeran ram harus terang.

⁷Waktu di bingi jelma pedom, rik waktu di bingi jelma jadi mabuk.

⁸ Kidang ram inji jelma-jelma sai tegolong waktu di rani sai terang, ulihni seno pikeran ram harus terang. Ram harus tetap percaya jama Tuhan rik mengasihi ulun-ulun bareh rik ngeharap yakin bahwa Allah haga nyelamatko ram. Udido senjata sai ngelindungi ram delom perjuangan ngelawan kekelaman.

⁹Allah milih ram lain untuk dihukum, kidang untuk diselamatko liwat Tuhan ram Isa Almasih.

¹⁰Ia mati untuk ram in waktu Ia ratong kanah — induh ram masih hurik, induh ram radu mati — ram dapok hurik jejama Ia.

¹¹Ulihni seno, hagani keti tetap saling ngedurong rik saling nguatko, gegoh injuk sai keti sedang lakuko tano inji.

¹²Puari-puari, sekam ngilu nihan in keti ngehargai jelma-jelma sai beguai di tengah-tengahmu; yakdo tian sai radu dipilih ulih-Ni Tuhan untuk memimpin rik ngeni petuah keti.

¹³Perlakukodo tian sehormat-hormatni rik jama cinta kasih mani ngingokko api sai tian lakuko. Hurikdo rukun selalu.

¹⁴Sekam ngilu juga, Puari-puari, ingokdo betik-betik jelma sai mak haga beguai; tabahko hati jelma sai rabai; tulungdo jelma sai perlu ditulung rik sabardo tehadap sunyin jelma.

¹⁵Jagado in dang wat sai ngebalos kejahatan jama kejahatan. Berusahado selalu untuk ngelakuko sai betik, peperda keti rik jama sunyin jelma.

¹⁶Hagani keti selalu riang,

¹⁷rik beduado senantiasa.

¹⁸Delom sunyin keadaan hagani keti besyukor, mani udido sai Allah mirak jak keti sebagai jelma sai hurik besatu jama Isa Almasih.

¹⁹Dang mengekang Ruh-Ni Allah.

²⁰Dang nganggap enteng kabar-kabar sai dikeni ulih Ruh-Ni Allah.

²¹Sunyin hal harus diuji, rik sai betik harus ditutuk.

²²Jaohko macam-macam kejahatan.

²³Semoga Allah tenggalan sai ngeniko ram sejahtera, ngejadiko keti jelma sai temon-temon hurik khusus untuk Allah. Semoga Allah ngejaga dirimu sunyinni, baik ruh, jiwa ataupun badanmu, sehingga mak ngedok cacatni waktu Tuhan ram Isa Almasih.

²⁴Allah, sai radu ngurau keti, haga ngelakuko hal seno mani Ia setia.

²⁵Duako sekam, Puari-puari.

²⁶Besalam-salamdo sunyin secara mesra sebagai puari Kristen.

²⁷Atas kuasa Tuhan, nyak ngilu nihan in keti ngebacako surat inji jama sunyin puari sai seiman.

²⁸Semoga Tuhan ram Isa Almasih ngeberkati keti. Hormat sekam, Paulus