Read Lampung Api 2 TESALONIKA 3 Bible Online

2 TESALONIKA 3 - Lampung Api bible

2 TESALONIKA 3

¹Akherni, Puari-puari, beduado untuk sekam. Beduado in kabar jak Tuhan dapok terus tesebar geluk rik betik diterima, gegoh injuk sai radu tejadi jama niku tumbai.

²Beduado juga in Allah nyelamatko sekam jak jelma-jelma sai bejat rik jahat. Mani mak sunyinni jelma percaya jama kabar jak Tuhan udi.

³Kidang Tuhan setia. Ia haga nguatko keti rik ngelindungi keti jak Si Jahat.

⁴Rik sekam percaya nihan jama Tuhan tentang keti; bahwa keti sedang ngelakuko rik haga terus ngelakuko api sai sekam anjurko jama niku.

⁵Semoga Tuhan ngebimbing keti untuk lebih ngerti bahwa Allah mengasihi keti rik bahwa Almasih ngeni ketabahan jama niku.

⁶Puari-puari, atas kuasa Tuhan Isa Almasih, sekam perintahko in keti ngejaohi sunyin puari, sai hurik bemalas-malasan, rik mak nutuk ajaran-ajaran sai sekam keniko jama tian.

⁷Keti tenggalan pandai bahwa keti harus niru cuntoh sekam. Sekam mak bemalas-malasan waktu sekam wat di tengah-tengah keti.

⁸Sekam mak nganik kanikan jelma jama mak ngebayarni. Sebalikni di rani di bingi sekam beguai ngebanting tulan in sekam mak nyusahko sapa pun juga jak hantaramu.

⁹Sekam ngelakuko ano lain mani sekam mak berhak nuntut in keti nulung sekam, kidang mani sekam haga jadi teladan jama keti.

¹⁰Waktu sekam masih wat di tengah-tengah keti, sekam ngeni atoran inji, “Jelma sai mak haga beguai, mak ngasi mengan.”

¹¹Sekam ngucakko sinji mani sekam ngedengi bahwa wat jelma-jelma di hantaramu sai hurik bemalas-malasan. Tian mak ngelakuko sai hal pun, kecuali sibuk nyampori urusan jelma bareh.

¹²Atas kuasa Tuhan Isa Almasih sekam perintahko jelma-jelma udi rik ngeni peringatan, in tian beguai tenteram rik nyepok nafkah tian tenggalan.

¹³Kidang keti dang bosan ngelakuko sai betik.

¹⁴Halokni kanah wat jelma sai mak haga nutuk api sai sekam cawako delom surat inji. Waspadado tehadap jelma injuk seno rik dang begaul jama ia in ia meliom.

¹⁵Kidang dang memperlakuko ia sebagai musuh, angkah keni petuah ia sebagai puari.

¹⁶Tuhan yakdo sumber kesejahteraan ram. Semoga Ia selalu ngeni jama niku sejahtera delom sunyin hal. Semoga Tuhan menyertai Puari sunyinni.

¹⁷Salam jak nyak, Paulus. Nyak tenggalan sai nulis bagian inji. Injido tanda sai kutulis di sunyin suratku.

¹⁸Semoga Tuhan ram Isa Almasih ngeberkati Puari sunyinni. Hormat sekam, Paulus