Read Lampung Api 1 TIMOTIUS 1 Bible Online

1 TIMOTIUS 1 - Lampung Api bible

1 TIMOTIUS 1

¹ Timotius, anakku sai sejati di delom Tuhan! Surat inji jak nyak, Paulus, rasul-Ni Isa Almasih atas perintah Allah, Penyelamat ram rik atas perintah Isa Almasih, harapan ram. Semoga Allah Bapa rik Isa Almasih Tuhan ram ngeni berkat, rahmat rik sejahtera jama niku.

³Nyak mirak in niku tetap tinggal di Efesus injuk radu nyak tekanko jama niku waktu nyak mik di Makedonia. Mani, di Efesus wat pira-pira jelma sai nyebarko ajaran sai mak benor, rik niku harus naruko tian.

⁴Ucakko jama tian in dang lagi ngeni perhatian pada dongeng-dongeng rik cerita-cerita asal-usul sai mak putus-putusni. Sunyinni ano angkah nimbulko pertangkaran gaoh, rik mak memajuko rencana-Ni Allah sai angkah dapok dikenal liwat percaya jama Ia.

⁵Tujuan petuahku ano yakdo in ulun dapok wat hati sai murni rik hati sai suci, rik temon-temon percaya jama Tuhan, rik jama injuk reno tian dapok mengasihi peperda tian.

⁶Wat sebagian jelma sai radu mak hurik injuk reno lagi, rik tesesek delom perdebatan-perdebatan sai mak ngedok gunani.

⁷Tian haga jadi guru-guru agama, padahal tian tenggalan mak memahami cawa-cawa sai tian pakai atau hal-hal sai yakin tian kemukako.

⁸Ram pandai bahwa hukum agama yakdo betik, kik digunako injuk semestini.

⁹Tantuni harus diingok bahwa hukum harus disani lain tehadap jelma betik, melainko tehadap jelma-jelma sai ngelanggar hukum, jelma-jelma sai jahat, jelma bejat, tehadap jelma bedusa, jelma mak beguna, jelma dunia, tehadap jelma sai ngebunuh bak atau emakni, jelma-jelma sai ngebunuh pada umumni,

¹⁰tehadap jelma-jelma hajor, homoseks, penculik, pembuhung; saksi-saksi buhung, rik sapa gaoh sai nyani hal-hal sai betentangan jama ajaran sai benor.

¹¹Ajaran udi wat di delom Kabar Betik sai penyebaranni dipercayako jama nyak, yakdo Kabar Betik jak Allah sai agung rik patut dipuji.

¹²Nyak ngucapko terima kasih jama Isa Almasih Tuhan ram. Ia radu ngeniko kekuatan jama nyak untuk ngelayani Ia, rik Ia nganggap nyak layak untuk tugas ano,

¹³ walaupun tumbai nyak ngefitnah rik nganiaya rik ngehina Ia. Kidang Allah mengasihani nyak, mani waktu seno nyak makkung percaya, jadi nyak mak pandai api sai kulakuko.

¹⁴Rik nyak malah dilimpahi rahmat-Ni Tuhan ram. Ia ngeniko jama nyak kemampuan untuk percaya jama Ia rik mengasihi peperda manusia. Kemampuan ano dikeniko jama ram sunyin sai radu besatu jama Isa Almasih.

¹⁵Sangun temon cawa inji — ulihni seno patutdo diterima rik dipercaya sepenuhni — : “Isa Almasih ratong mik dunia inji untuk nyelamatko jelma bedusa.” Rik nyakdo jelma bedusa sai paling jahat.

¹⁶Kidang justru ulihni seno Allah mengasihi nyak, in Isa Almasih dapok nunjukko sunyinni kesabaran-Ni tehadap nyak, jelma sai paling bedusa inji. Rik inji jadi sai cuntoh untuk sunyin jelma sai kanah haga percaya jama Ia rik mansa hurik sejati rik kekal.

¹⁷Allah, Raja sunyin zaman, patut dihormati rik dipuji selalu, mani Iado sai kekal, sai mak keliakan rik esa! Amin.

¹⁸Timotius, anakku! Tugas inji kupercayako jama niku, ngingok luhot-Ni Allah sai disampaiko ulih nabi-nabi delom jemaah tentang dirimu. Hagani luhot udi jadi bekal jama niku delom perjuangan sai betik.

¹⁹Bejuangdo jama nyating kepercayaan sai benor rik jama hati sai suci. Wat jelma-jelma sai mak peduli jama suara hatini, sehingga hancordo kepercayaan tian.

²⁰Di hantarani iado Himeneus rik Aleksander. Kerua jelma udi radu kuhukum jama nyerahkoni jama iblis, in tian belajar untuk taru ngehina Allah.