Read Lampung Api 1 TIMOTIUS 3 Bible Online

1 TIMOTIUS 3 - Lampung Api bible

1 TIMOTIUS 3

¹Temon nihan cawa inji, “Jelma sai mirak jadi sai ngurus jemaah, ngehagako suatu guai sai berega nihan.”

² Jelma sai ngurus jemaah harusdo jelma tanpa cela, angkah sai inggomni, pandai nahan diri, bijaksana, rik tertib; ia gering nerima jelma di lambanni, rik dapok ngajar jelma,

³dang jelma sai pemabuk, atau sai gering rigu. Sebalikni, ia harus lemoh lembut rik gering damai. Ia mak ngasi mata duitan.

⁴Ia harus pandai ngator rumah tanggani betik-betik, rik ngedidik anak-anakni untuk taat rik hormat jama ia.

⁵Mani kik jelma sai mak pandai ngator rumah tanggani tenggalan, injuk repa ia dapok ngator jemaah-Ni Allah?

⁶Sai ngurus jemaah mak ngasi jelma sai ampai gaoh jadi Kristen, mani kanah ia jadi mepungah raduni tekutuk injuk iblis tumbai.

⁷Ia harusdo jelma sai ngedok gelar betik delom masyarakat, mani kik mak injuk reno maka ia haga dihina jelma sehingga tumbak mik delom perangkap iblis.

⁸Jelma sai ngebantu jemaah harus juga jelma sai betik rik tulus; mak mata duitan rik mak gering nginum lamon nihan anggor.

⁹Tian harus nyating kuat jama hati sai murni ajaran kepercayaan Kristen sai radu dinyatako ulih-Ni Allah.

¹⁰Hagani tian diuji pai, rik kik nyata tian mak becela, ampai tian ngasi ngebantu di delom jemaah.

¹¹Inggom tian pun harus juga jelma sai betik, lain jelma sai gering nyebarko desas-desus. Tian harus pandai nahan diri rik jujor delom sunyin hal.

¹²Sai ngebantu jemaah harus ngedok angkah sai kajong. Ia harus pandai ngator anak-anakni rik rumah tanggani betik-betik.

¹³Jelma-jelma sai betik ngebantu di delom jemaah haga dihormati rik jadi semakin bani cawa tentang kepercayaan tian jama Almasih.

¹⁴Nyak ngeharap mak mesaka lagi nyak haga napol niku. Meskipun injuk reno, nyak nulis juga surat inji jama niku,

¹⁵in kik nyak telat, niku radu pandai injuk repa ram harus hurik sebagai keluarga-Ni Allah, yakdo jemaah-Ni Allah sai hurik. Jemaah injido sai ngerupako tihang penyecok rik pendukung ajaran sai benor jak Allah.

¹⁶Mak sai jelma pun dapok menyangkal, hara balakni rahasiani agama ram: Ia ngeliakko diri delom bantuk manusia, rik dinyatako benor ulih Ruh-Ni Allah, rik diliak ulih malaikat-malaikat. Kabar-Ni dikumandangko di hantara bangsa-bangsa, rik Ia dipercaya di seluruh dunia rik diiwakko mik surga.