Read Lampung Api 2 TIMOTIUS 1 Bible Online

2 TIMOTIUS 1 - Lampung Api bible

2 TIMOTIUS 1

¹ Timotius, anakku sai tecinta! Nyak, Paulus, nulis surat inji jama niku, rik ngeharap semoga Allah Bapa rik Tuhan ram Isa Almasih ngeni berkat, rahmat rik sejahtera jama niku. Atas kehaga-Ni Allah, nyak diangkat jadi rasul-Ni Isa Almasih rik diutus untuk ngabarko tentang hurik sai dijanjiko Allah. Hurik ano ram terima mani besatu jama Isa Almasih.

³Nyak ngucapko syukor jama Allah sai kulayani jama hati sai murni injuk sai dilakuko ulih nenek muyangku tumbai. Nyak selalu ngucapko terima kasih jama Allah unggal nyak ingok jama niku delom dua, baik di rani maupun di bingi.

⁴Nyak ingok jama kesedihan hatimu. Udido sebabni nyak mirak nihan betungga jama niku in nyak benor-benor jadi riang.

⁵ Nyak teingok jama kepercayaanmu sai temon-temon jama Almasih, gegoh kepercayaan nenekmu Lois rik emakmu Eunike. Rik nyak yakin niku pun percaya injuk reno.

⁶Ulihni seno nyak ngingokko niku untuk ngehurikko karunia sai dikeniko Allah jama niku waktu nyak ngepikko culukku di atasmu.

⁷Mani Ruh sai Allah ngeniko jama ram, lain hak Ruh sai nyani ram jadi rabai. Sebalikni Ruh-Ni Allah udi nyani ram jadi kuat, latap jama kasih rik dapok nahan diri.

⁸Ulihni seno dang liam ngeniko kesaksian tentang Tuhan ram, rik dangdo juga liam tentang nyak, sai kuruk bui mani Ia. Sebalikni, hagani niku jama kekuatan jak Allah, nutuk menderita untuk Kabar Betik udi.

⁹Allah nyelamatko ram rik ngurau ram in jadi umat-Ni tenggalan. Ia ngelakuko ano lain bedasarko api sai ram radu guaiko, melainko bedasarko rencana-Ni tenggalan rik rahmat-Ni. Ia ngeniko ram rahmat-Ni liwat Isa Almasih semakkung dunia inji diciptako.

¹⁰Rik tano, Allah nunjukko rahmat-Ni udi jama ram jama ratong-Ni Raja Penyelamat ram Isa Almasih. Isa ngalahko kuasa kematian rik ngusung hurik sai abadi liwat Kabar Betik udi.

¹¹ Untuk ngabarko Kabar Betik udido Allah ngangkat nyak jadi rasul rik guru.

¹²Udido sebabni nyak menderita sunyinni inji, kidang nyak tetap yakin, mani nyak pandai nihan sapa sai kupercaya. Nyak yakin bahwa api sai radu Ia percayako jama nyak, Ia sanggup juga ngejagani sampai Rani Kiamat.

¹³Tutukdo temon-temon ajaran benor sai radu kukeniko jama niku. Rik hagani niku tetap nyating iman rik kasih sai jadi kedau ram mani besatu jama Isa Almasih.

¹⁴Jama bantuan jak Ruh-Ni Allah sai hurik di delom ram, hagani niku ngejagani betik-betik hal-hal berega sai radu dipercayako jama niku.

¹⁵Niku pandai bahwa sunyin jelma di wilayah Asia radu ninggalko nyak, termasuk juga Figelus rik Hermogenes.

¹⁶Kidang keluarga Onesiforus radu pira kali ngeriangko hatiku. Semoga Tuhan bekenan nunjukko belas kesian jama tian. Meskipun nyak delom bui, Onesiforus mak meliom jama keadaanku ano.

¹⁷Reno sampai di Roma, ia terus berusaha nyepok nyak sampai ia betungga jama nyak.

¹⁸Rik niku pandai bahwa di Efesus ia lamon nihan nulung nyak. Semoga Tuhan nunjukko rasa kesian jama ia pada rani-Ni Tuhan ngadili sunyin manusia.