Read Lampung Api 2 TIMOTIUS 4 Bible Online

2 TIMOTIUS 4 - Lampung Api bible

2 TIMOTIUS 4

¹Isa Almasih haga ratong luot mik dunia inji untuk ngadili jelma-jelma sai hurik rik sai mati; rik Ia haga ratong untuk memerintah sebagai Raja. Ulihni seno nyak ngilu nihan jama niku di hadap-Ni Allah rik Isa Almasih:

²Hagani niku ngabarko kabar jak Allah udi, rik terus ngedesak in jelma ngedengini, api tian haga atau mawat. Hagani niku ngeyakinko jelma, nunjukko kesalahan, rik ngeni durongan jama tian. Ajardo jelma sesabar mungkin.

³Mani haga sampai waktuni jelma mak haga lagi nerima ajaran sai benor. Sebalikni, tian haga nutuk kehagani tian tenggalan rik ngumpulko lamon guru untuk diajarko hal-hal sai bangik didengi di cuping tian.

⁴Tian haga nyalok cuping tehadap sai benor, kidang haga masang cuping tehadap cerita-cerita dongeng.

⁵Meskipun injuk reno, niku harus nguasai dirimu delom keadaan injuk repa pun juga. Tabah delom penderitaan, laksanako sebagai jelma sai ngeni kabar Kabar Betik udi rik jalanko sebetik-betikni kewajibanmu sebagai jelma sai ngebantu Allah.

⁶Tentang diriku, radu sampai waktuni nyak haga mati sebagai kurban jama Allah. Serebok lagi nyak haga ninggalko dunia inji.

⁷Nyak radu nutuk perlumbaan sebetik-betikni, rik radu mencapai garis akher. Nyak tetap setia jama Almasih sampai akher.

⁸Rik tano hadiah kemenangan nunggu nyak. Pada Rani Kiamat, Tuhan, Hakim sai adil udi haga nyerahko hadiah udi jama nyak, mani nyak hurik mebetik jama Allah. Rik lain nyak gaoh sai haga nerima hadiah udi, kidang juga sunyin jelma tiram nihan nunggu ratong-Ni Tuhan.

⁹Berusahado ratong jama nyak segeluk-gelukni,

¹⁰ mani Demas radu ninggalko nyak mani mencintai dunia inji. Ia radu mik di Tesalonika, Kreskes radu mik di Galatia, rik Titus mik Dalmatia.

¹¹ Angkah Lukas sai tinggal jama nyak. Sunsungdo Markus rik usungdo ia jejama niku, mani ia dapok ngebantu delom guaiku.

¹² Nyak radu ngayun Tikhikus mik di Efesus.

¹³ Kik niku ratong, usungdo mantol sai kutinggalko di Troas, di lambanni Karpus. Usungdo juga buku-bukuku, terutama buku-buku sai disani jak kertas bawak.

¹⁴ Aleksander, tukang tembaga udi radu ngelakuko hal-hal sai jahat nihan tehadap nyak. Tuhan haga ngebalos ia nutuk perbuatanni.

¹⁵Niku tenggalan harus hati-hati tehadap ia, mani ia menantang nihan kabar ram.

¹⁶Waktu nyak mula-mula ngajuko pembelaan diriku, mak ngedok sai jelma pun sai ngedampingi nyak; sunyin ninggalko nyak. Mudah-mudahan Allah mak nyalahko tian delom hal inji!

¹⁷Kidang Tuhan ngedampingi nyak. Ia ngeniko kekuatan sehingga nyak sanggup ngabarko sunyin Kabar Betik udi, in didengi ulih sunyin jelma lain Yahudi. Rik nyak telepas jak bahaya kematian.

¹⁸Sangun Tuhan haga ngelepasko nyak jak unggal usaha sai jahat tehadap nyak. Ia haga selamat ngusung nyak mik delom Kerajaan-Ni di surga. Hagani Ia diagungko selama-lamani! Amin.

¹⁹ Salamku untuk Priskila rik Akwila rik untuk keluarga Onesiforus.

²⁰ Erastus tinggal di Korintus, rik Trofimus radu kutinggalko delom keadaan meruyuh di Miletus.

²¹Berusahado sedapok-dapokni untuk ratong semakkung musim ngison. Ebulus, Pudes, Linus, rik Klaudia ngirim salam tian jama niku; injuk reno juga sunyin puari seiman barehni.

²²Semoga Tuhan ngedamping niku. Semoga Tuhan ngeberkati Puari-puari! Hormat sekam, Paulus