Read Lampung Api TITUS 1 Bible Online

TITUS 1 - Lampung Api bible

TITUS 1

¹Anakku Titus! Nyak, Paulus, nulis surat inji sebagai jelma sai ngebantu Allah rik rasul-Ni Isa Almasih. Nyak dipilih rik diutus untuk nulung jelma-jelma pilihan-Ni Allah in jadi kuat delom iman tian. Nyak juga harus ngebimbing tian in kenal jama ajaran sai benor sai diajarko ulih agama ram.

²Ajaran udi bedasarko harapan bahwa ram haga nerima hurik sejati rik kekal. Allah radu ngejanjiko hurik ano semakkung permulaan zaman — rik Allah mak mungkin bebuhung.

³Waktu sai tepat, Allah nyatako janji-Ni ano delom luhot-Ni. Luhot udi radu dipercayako jama nyak, rik nyak ngabarkoni atas perintah-Ni Allah Penyelamat ram.

⁴ Titus, niku temon-temon anakku, mani niku rik nyak jama-jama radu percaya jama Almasih. Nyak ngeharap semoga Allah Bapa rik Isa Almasih Raja Penyelamat ram, ngeni berkat rik sejahtera jama niku.

⁵Nyak ninggalko niku di Kreta in niku dapok ngurus hal-hal sai masih perlu diator. Juga, in niku ngangkat jelma-jelma sai mimpin jemaah di unggal kota. Rik ingokdo jama petunjuk-petunjuk nyak inji:

⁶ Jelma sai mimpin jemaah hagani jelma sai tanpa cela; ia harus ngedok angkah sai inggom; anak-anakni harus radu percaya jama Almasih rik lain sai dikenal sebagai sanak berandal rik sai mak dapok diator.

⁷Jelma sai ngurus jemaah iado jelma sai ngurus guai-Ni Allah, ia mak ngasi becela. Ia mak ngasi mepungah atau pembutong, atau pemabuk, atau gering rigu, atau mata duitan.

⁸Ia harus senang nerima jelma di lambanni, gering hal-hal sai betik, dapok nahan diri, jujor, suci, rik tertib.

⁹Ia harus nyating kuat ajaran sai dapok dipercaya, injuk sai radu diajarko jama ia. Jama injuk reno ia sanggup ngeni petuah jama jelma bedasarko ajaran sai benor, rik nunjukko kesalahan jelma-jelma sai nantangni.

¹⁰Mani lamon jelma sai gering berontak, terutama jelma-jelma sai jenoni beragama Yahudi; tian nipu ulun bareh jama balak awak tian.

¹¹Jelma-jelma injuk reno harus disalok bangukni, mani tian ngacauko lamon keluarga jama ajaran-ajaran sai mawat-mawat. Tian ngelakuko ano angkah mani haga nyepok untung sai mak pantas!

¹²Pernah sai nabi tian tenggalan, sai asalni jak Kreta juga, cawa “Jelma-jelma Kreta risok bebuhung, rik injuk binatang buas sai rakus rik pemalas.”

¹³Api sai dicawako ulih nabi udi sangun temon. Udi sebabni niku harus tegas ngingokko tian; in tian tetap nyating ajaran sai benor

¹⁴rik mak lagi nyating cerita-cerita Yahudi atau atoran-atoran sai disani ulih jelma-jelma sai nulak ajaran sai benor udi.

¹⁵Sunyin hal iado suci bagi jelma-jelma sai suci. Kidang bagi jelma-jelma sai pikeranni kamak rik sai mak beriman, mak ngedok sai pun sai suci, mani pikeran rik hati tian radu kamak!

¹⁶Tian cawa bahwa tian kenal jama Allah, padahal perbuatan tian nyangkal-Ni. Tian menjijikko, rik tian mak haga taat; tiando jelma-jelma sai mak mampu ngelakuko sai hal sai betik.