Read Lampung Api TITUS 2 Bible Online

TITUS 2 - Lampung Api bible

TITUS 2

¹Kidang niku, Titus, hagani niku ngajarko ajaran sai tepat.

²Keni petuah jelma bakas sai tuha, in tian nahan diri, bijaksana rik hurik sebagai jelma sai patut dihormati. Tian harus juga nyating ajaran sai benor jak Allah, sempurna mengasihi rik tabah menderita.

³Injuk reno juga hagani niku ngeni petuah bebai-bebai sai tuha in kelakuan tian nutuk api sai patut bagi jelma sai hurik khusus bagi Allah. Tian mak ngasi ngefitnah jelma bareh, rik mak ngasi ketagihan inuman keras. Tian harus ngajarko hal-hal sai betik,

⁴in injuk reno tian dapok ngedidik bebai-bebai ngura untuk mengasihi kajong rik anak-anak,

⁵jadi bijaksana, hurik suci rik jadi ibu rumah tangga sai betik sai tunduk jama kajongni. Jama injuk reno mak ngedok jelma sai dapok ngereneh kabar jak Allah.

⁶Injuk reno juga, ingokko jelma-jelma ngura in tian jadi bijaksana.

⁷Delom sunyin hal, hagani niku jadi teladan kelakuan sai betik. Kik niku ngajar, niku harus jujor rik temon-temon.

⁸Pakaido cawa-cawa sai bijaksana, sai mak dapok dicela ulun, rik lawan-lawanmu jadi liom mani mak ngedok hal-hal burak sai dapok tian cawako tentang ram.

⁹Jelma-jelma sai ngebantu harus tunduk jama tuanni, rik nyenangko hatini delom sunyin hal. Tian mak ngasi ngebantah,

¹⁰atau maling. Hagani tian nunjukko bahwa tian selalu besikap betik rik setia, in jama sikap tian ano ulun memuji ajaran tentang Allah, Penyelamat ram.

¹¹Mani Allah radu nunjukko rahmat-Ni guna nyelamatko sunyin manusia.

¹²Rahmat-Ni Allah udi ngedidik ram in mak lagi hurik belawanan jama kehaga-Ni Allah rik mak nutuk kemirakan dunia. Ram dididik untuk hurik nahan diri delom dunia inji, tulus rik setia jama Allah.

¹³Tano ram lagi nunggu Rani sai ram harap-harapko udi; waktu Rani udi dunia haga ngeliak keagungan-Ni Isa Almasih, yakdo Allah Mahabesar rik Raja Penyelamat ram.

¹⁴ Ia radu ngurbanko diri-Ni bagi ram untuk ngebebasko ram jak sunyin kejahatan, rik ngejadiko ram suatu umat sai bebas jak dusa rik sai jadi kedau-Ni gaoh, rik sai rajin ngelakuko sai betik.

¹⁵Ajarkodo sunyinni ano, rik ngeni petuahdo rik tegurdo para pendengimu jama bewibawa. Dangdo naganko sai jelma pun ngeliak niku rendah.