Read Lampung Api IBRANI 10 Bible Online

IBRANI 10 - Lampung Api bible

IBRANI 10

¹Hukum agama Yahudi angkah ngeniko gambaran sai samar-samar tentang hal-hal sai betik sai haga ratong, rik lain gambaran sai sebenorni jak hal-hal udi. Mak mungkin hukum udi dapok nyempurnako jelma sai ratong nyumbah Allah jama ngusung persembahan, walaupun unggal tahun terus dipersembahko kurban-kurban sai gegoh.

²Kik jelma-jelma sai nyumbah Allah udi benor-benor radu dikecahko jak dusa, tian mak lagi ngedok perasaan bedusa, rik kurban mak haga dipersembahko lagi.

³Kidang nyatani kurban-kurban sai dipersembahko unggal tahun udi justru ngingokko jelma-jelma jama dusa-dusa tian,

⁴mani sangun rah jawi rik rah kambing bakas mak dapok ngehapusko dusa.

⁵ Udido sebabni pada waktu Almasih kuruk mik dunia, Ia cawa jama Allah, “Niku mak ngehagako kurban rik persembahan; sebalikni Niku radu nyediako badan bagi-Ku.

⁶Niku mak bekenan jama kurban bakaran atau kurban untuk pengampunan dusa.

⁷Raduni Nyak cawa, ‘Injido Nyak, ya Allah! Nyak ratong untuk ngelakuko kehaga-Mu, injuk sai tesurat tentang diri-Ku di delom Alkitab.’ ”

⁸Mula-mula Almasih cawa, “Niku mak ngeharapko kurban rik persembahan; Niku mak bekenan jama kurban binatang sai disuah sebagai persembahan rik jama kurban untuk pengampunan dusa.” Almasih cawa injuk reno, sekalipun sunyin kurban udi dipersembahko nutuk hukum agama Yahudi.

⁹Radu jak seno Almasih cawa, “Injido Nyak, ya Allah! Nyak ratong untuk ngelakuko kehaga-Mu.” Jadi Allah ngehapusko sunyin kurban sai saka udi, rik ngegantikoni jama kurban Almasih.

¹⁰Isa Almasih radu ngelakuko api sai kehaga-Ni Allah rik mempersembahko diri-Ni sebagai kurban. Jama persembahan udi, sai dilakuko-Ni angkah sekali gaoh untuk selama-lamani, ram sunyin dikecahko jak dusa.

¹¹ Unggal imam Yahudi ngejalanko tugasni sebagai imam unggal rani, rik berulang kali ia mempersembahko kurban-kurban sai gegoh. Kidang kurban-kurban udi sama sekali mak dapok ngehapusko dusa.

¹² Sebalikni, Almasih mempersembahko angkah sai kurban untuk pengampunan dusa, rik kurban udi belaku untuk selama-lamani. Radu jak mempersembahko kurban udi, Almasih mejong di kebelah kanan-Ni Allah rik memerintah jejama jama Ia.

¹³Rik tano Almasih nunggu sampai Allah nyani musuh-musuh-Ni takluk jama Ia.

¹⁴Jadi, jama sai kurban, Almasih nyempurnako jelma-jelma sai radu dikecahko jak dusa.

¹⁵Tentang hal seno Ruh-Ni Allah ngeni juga kesaksian-Ni jama ram. Ruh-Ni Allah cawa,

¹⁶ “ ‘Injido perjanjian sai haga Kusani jama tian di rani-rani sai haga ratong,’ ani Tuhan, ‘Nyak haga ngepikko hukum-hukum-Ku mik delom hatini tian, rik nulisni mik delom pikeran tian.’ ”

¹⁷ Allah juga cawa, “Nyak haga ngelupako dusa-dusa rik kejahatan-kejahatan tian.”

¹⁸Jadi, dusa-dusa rik kejahatan-kejahatan udi radu diampuni, maka mak perlu lagi dipersembahko kurban untuk pengampunan dusa.

¹⁹Nah, Puari-puari, ulih kematian-Ni Isa udi ram tano bani kuruk Ruang Mahasuci.

²⁰Isa radu ngebukak suatu jalan sai ampai untuk ram, yakdo jalan sai ngeni hurik. Jalan ano liwat hordeng, yakdo badan-Ni Isa tenggalan.

²¹Rik ram tano ngedok sai imam sai agung, sai betanggung jawab atas Lamban Ibadah.

²² Ulihni seno, ijado ram ngeredik Allah jama hati sai tulus rik iman sai kuat; jama hati sai radu disuciko jak perasaan besalah, rik jama badan sai radu dikecahko jama way sai murni.

²³Hagani ram kuat nyating harapan sai ram akui, mani Allah dapok dipercaya rik Ia haga nepati janji-Ni.

²⁴Rik hagani ram saling memperhatiko, in ram dapok saling ngeni durongan untuk peperda mengasihi rik ngelakuko hal-hal sai betik.

²⁵Hagani ram tetap bekumpul jejama, rik dang hak lalai injuk jelma bareh. Ram justru harus lebih setia saling nguatko, mani ram pandai bahwa mak mesaka lagi Tuhan haga ratong.

²⁶Mani kik kabar sai betik jak Allah radu disampaiko jama ram, kidang ram terus gaoh sengaja nyani dusa, maka mak ngedok lagi kurban untuk ngehapus dusa ram.

²⁷ Satu-satuni sai wat untuk ram iado ngehadapi pengadilan-Ni Allah rik apui kebutongan-Ni sai haga nyuah bela jelma-jelma sai haga ngelawan Ia!

²⁸ Jelma sai mak taat hukum sai dikeniko ulihni Musa, dihukum mati tanpa ampun, kik atas kesaksian rua telu jelma, ia tebukti besalah.

²⁹ Hara lebih biak hukuman sai harus dijatuhko atas jelma sai ngilik-ilik Anak-Ni Allah. Ulun udi nganggap hina rah perjanjian-Ni Allah, yakdo kematian-Ni Almasih sai ngecahkoni jak dusa. Ia ngehina Ruh pengeni rahmat.

³⁰ Ram pandai sapa Ia sai cawa, “Nyak haga ngebalos! Nyak haga ngehukum!” rik sai cawa, “Tuhan haga ngehakimi umat-Ni.”

³¹Hara ngerini kik tumbak mik culuk-Ni Allah Sai Hurik!

³²Ingokdo injuk repa keadaan Puari-puari waktu sai radu. Waktu seno, radu jak cahaya-Ni Allah nyinari niku, keti lamon menderita; kidang keti tetap gigih bejuang.

³³Wat masani keti dihina rik diperlakuko mak betik di hadapni umum. Wat masani juga keti nutuk menderita jama tian sai diperlakuko injuk reno,

³⁴rik keti nutuk ngerasa kesedihan jelma sai kuruk bui. Rik waktu sunyin sai keti kedau dirampas, keti nerima ano jama senang hati, mani keti pandai bahwa keti masih ngedok sai hal sai lebih betik, sai haga tahan selama-lamani.

³⁵Ulihni seno, dang putus asa, mani kik keti tetap percaya, maka wat upah sai balak untuk seno!

³⁶Keti perlu besabar, in keti dapok ngelakuko kehaga-Ni Allah rik jama injuk reno nerima api sai dijanjiko-Ni.

³⁷ Mani delom Alkitab tetulis, “Angkah serebok gaoh lagi, maka Ia sai haga ratong udi, haga geluk ratong; Ia mak haga nunda-nunda ratong-Ni.

³⁸Rik umat-Ku sai benor haga percaya rik hurik; kidang kik wat di hantara tian sai mundor, maka Nyak mak haga senang jama ia.”

³⁹Ram inji lain umat sai mundor rik sesek. Sebalikni, ramdo umat sai percaya jama Allah rik sai diselamatko.