Read Lampung Api IBRANI 11 Bible Online

IBRANI 11 - Lampung Api bible

IBRANI 11

¹Beriman retini yakin temon-temon jama hal-hal sai diharapko, retini ngedok kepastian jama hal-hal sai mak diliak.

²Mani beriman, maka ulun-ulun zaman tumbai disenangi ulih-Ni Allah.

³ Ulihni beriman, maka ram ngerti bahwa alam inji diciptako ulih sabda-Ni Allah; jadi, api sai dapok diliak, tejadi jak api sai mak dapok diliak.

⁴ Ulihni beriman, maka Habel mempersembahko jama Allah kurban-kurban sai lebih betik jak kurban Kain. Ulihni imanni udi, Habel diterima ulih-Ni Allah sebagai jelma sai betik, mani nyatado bahwa Allah nerima persembahanni. Habel radu mati, kidang ulihni imanni udi, maka ia masih cawa sampai tano.

⁵ Ulihni beriman, maka Henokh mak mati, melainko diangkat rik diusung jama Allah. Mak sai jelma pun dapok ngehalu ia, mani ia radu diangkat ulih-Ni Allah. Delom Alkitab tetulis bahwa semakkung Henokh diangkat, ia nyenangko hati-Ni Allah.

⁶Tanpa beriman, mak sai jelma pun dapok nyenangko hati-Ni Allah. Mani jelma sai ratong jama Allah harus percaya bahwa Allah wat, rik bahwa Allah ngeni balosan jama jelma sai nyepok Ia.

⁷ Ulihni beriman, maka Nuh dikeni pandai ulih-Ni Allah tentang hal-hal haga tejadi sai haga ratong, sai mak dapok diliak ulihni. Nuh taat jama Allah sehingga ia nyani sai kapal sai kak raduni ternyata nyelamatko dirini jejama keluargani. Jama injuk reno dunia dihukum, sedang Nuh tenggalan ulihni imanni dinyatako ulih-Ni Allah sebagai jelma sai betik.

⁸ Ulihni beriman, maka Abraham taat jama Allah waktu Allah ngurauni rik ngayunni mik di negeri sai Allah janjiko jama ia. Raduni Abraham berangkat rik mak pandai mik dipa ia mik.

⁹ Jama beriman, Abraham tinggal sebagai jelma asing di negeri sai dijanjiko Allah jama ia udi. Abraham tinggal di dudi di delom kemah. Reno muneh Ishak rik Yakub, sai nerima janji sai gegoh jak Allah.

¹⁰Mani Abraham sedang nunggu-nunggu kota sai direncanako rik dibangun ulih-Ni Allah jama pondasi sai kuat.

¹¹ Ulihni beriman, maka Abraham mansa keturunan jak Sara, sekalipun Abraham radu tuha nihan, rik Sara tenggalan mandul. Abraham yakin bahwa Allah haga nepati janji-Ni.

¹² Walaupun Abraham waktu seno injuk jelma sai radu mati badanni, kidang ia mansa lamon keturunan, sai lamonni mak kehitung — injuk lamonni bintang di langit rik heni di pingger pantai.

¹³ Sunyin jelma udi tetap beriman sampai mati. Tian mak nerima hal-hal sai dijanjiko ulih-Ni Allah, kidang angkah ngeliak rik nyambutni jak jaoh. Rik jama seno tian nyatako bahwa tian angkah jelma asing rik perantau di bumi inji.

¹⁴Jelma sai ngucakko injuk reno jelas nunjukko bahwa tian sedang nyepok negeri sai haga jadi tanoh air tian.

¹⁵Lain negeri sai radu tian tinggalko ano sai tian piker-pikerko. Mani kik injuk reno, maka radu lamon kesempatan bagi tian untuk muloh mik negeri udi.

¹⁶Kidang nyatani, tian tiram sai negeri sai lebih betik, yakdo negeri sai di surga. Udi sebabni Allah mak meliom kik tian nyebut Ia Allah tian, mani Allah radu nyediako sai kota untuk tian.

¹⁷ Ulihni beriman juga, maka Abraham mempersembahko Ishak sebagai kurban waktu ia diuji Allah. Jama Abrahamdo Allah ngeni janji-Ni, kidang Abraham rila nyerahko anakni sai hehana udi.

¹⁸ Allah radu cawa jama Abraham, “Liwat Ishak injido niku haga mansa keturunan sai Kujanjiko jama niku.”

¹⁹Abraham yakin bahwa Allah sanggup ngehurikko luot Ishak jak kematian — jadi, ngasi diucakko, Abraham radu nerima luot Ishak jak kematian.

²⁰ Ulihni beriman, maka Ishak ngejanjiko berkat-berkat jama Yakub rik Esau untuk masa depan.

²¹ Ulihni beriman, maka semakkung Yakub mati, ia ngeni berkat jama anak-anak Yusuf — besandar jama ulu tungkokni rik nyumbah Allah.

²² Ulihni beriman, maka Yusuf — waktu hamper mati — cawa tentang luahni umat Israel jak Mesir, rik ninggalko luhot tentang api sai harus dilakuko tehadap mayatni.

²³ Ulihni beriman, maka ulun tuha Musa nyegokkoni telu bulan sakani radu jak laherni. Tian ngeliak bahwa ia sanak sai helau, rik tian mak merabai ngelawan perintahni raja.

²⁴ Ulihni beriman, maka Musa radu balak, mak haga disebut anak jak putri raja Mesir.

²⁵Ia lebih gering menderita jejama jama umat-Ni Allah jak untuk sementara waktu ngerasako kesenangan jak hurik sai bedusa.

²⁶Musa ngerasa bahwa jaoh lebih berega untuk mansa penghinaan demi Raja Penyelamat sai dijanjiko Allah udi jak mansa sunyin harta negeri Mesir, mani Musa ngeharap upah di rani sai haga ratong.

²⁷ Ulihni beriman, maka Musa ninggalko Mesir tanpa ngerasa merabai tehadap kebutonganni raja. Musa maju nuju tujuanni seolah-olah ia radu ngeliak Allah sai mak keliakan udi.

²⁸ Ulihni beriman, maka Musa ngadako Paskah rik merintahko in direcakko rah di rangok lamban ulun Israel in Malaikat Kematian dang ngebunuh anak-anak tuha tian.

²⁹ Ulihni beriman, maka ulun-ulun Israel dapok nyeberang Laok Suluh, seolah-olah tian lapah di atas tanoh sai nyangu, sedang ulun-ulun Mesir dibelot ulih lawok udi, waktu tian nyuba nyeberang juga.

³⁰ Ulihni beriman, ulun-ulun Israel nyani sesai-sesai Yerikho runtuh radu jak tian ngelilingi pitu rani sakani.

³¹ Ulihni beriman juga, maka Rahab, bebai lacor udi, mak nutuk tebunuh jejama jama jelma-jelma sai ngelawan Allah; mani ia ramah nerima mata-mata Israel.

³² Nah, nyak dapok gaoh terus-menerus cawa, kidang waktu mak cukup untukku. Mani nyak makkung lagi nyebut Gideon, Barak, Simson, Yefta, Daud, Samuel, rik nabi-nabi.

³³ Ulihni beriman tian radu ngalahko kerajaan-kerajaan. Tian ngelakuko api sai benor, sehingga nerima api sai dijanjiko Allah. Tian nyalok banguk-banguk singa;

³⁴ madamko apui sai hibat, tehindar jak tikaman pedang. Tian lemoh, kidang jadi kuat; tian perkasa delom peperangan sehingga ngalahko pasukan-pasukan bangsa asing.

³⁵ Ulihni beriman, maka bebai-bebai mansa luot jelma-jelma sai radu mati, mani tian dihurikko luot. Wat muneh sai rila disiksa sampai mati, rik nulak untuk dibebasko, mani haga dihurikko luot bagi suatu kehurikan sai lebih betik.

³⁶ Wat sai diulok-ulok, dilecut, diikok jama rantai rik dikurukko mik delom bui.

³⁷ Tian ditayar batu sampai mati, wat sai dipelok jama gergaji, rik sai dibunuh jama pedang. Tian mengembara jama kawai jak bawak biri-biri atau bawak kambing; tian mejerih, dianiaya rik disiksa.

³⁸Dunia inji lain rang sai layak untuk tian. Tian mengembara di padang gurun rik di bukit-bukit, rik tinggal di delom guha-guha rik delom lubang-lubang tanoh.

³⁹Hara balakni kemenangan sai dicapai ulih sunyin jelma udi ulihni iman tian! Kidang tian mak nerima api sai dijanjiko ulih-Ni Allah,

⁴⁰mani Allah ngedok rencana sai lebih betik untuk ram. Rencana-Ni iado bahwa angkah jejama jama ram, tian haga jadi sempurna.