Read Lampung Api IBRANI 2 Bible Online

IBRANI 2 - Lampung Api bible

IBRANI 2

¹Udido sebabni ram harus lebih temon-temon nyating ajaran sai radu ram dengi, in ram dang ninggalko kepercayaan ram.

²Luhot-luhot sai disampaiko ulihni malaikat-malaikat jama nenek muyang ram ternyata benor, rik jelma sai mak nutuk atau taat nerima hukuman sai setimpal.

³Apilagi jama keselamatan sai lebih hibat jak luhot-luhot udi! Kik ram mak ngeni perhatian tehadap keselamatan udi, ram tantu mak haga telepas jak hukuman. Mani Tuhan tenggalando sai mula-mula ngumumko keselamatan udi, rik jelma-jelma sai mula-mula ngedengini radu ngebuktiko kebenoranni jama ram.

⁴Di samping seno, Allah nutuk nguatko kesaksian jelma-jelma udi jama ngadako sunyin macam keanehan rik hal-hal luar biasa rik ngebagi-bagiko pengenian-pengenian jak Ruh-Ni Allah nutuk kehaga-Ni tenggalan.

⁵Malaikat-malaikat mak mansa kuasa jak Allah untuk memerintah dunia ampai sai haga ratong, yakdo dunia sai sedang ram cawako inji.

⁶ Sebalikni, di suatu bagian di delom Alkitab tetulis injuk reji, “Manusia udi api, ya Allah, sehingga Niku haga ngingokni? Manusia angkah manusia gaoh, kidang Niku ngeperhatikoni!

⁷Untuk waktu sai singkat Niku ngejadiko ia cutik lebih rendah jak malaikat. Niku ngeniko jama ia pangkat sai mulia rik tehormat,

⁸rik ngejadiko ia jelma sai bekuasa atas sunyin hal.” Nah, kik dicawako bahwa Allah ngejadiko manusia “jelma sai bekuasa atas sunyin hal”, udi retini bahwa mak ngedok sai hal pun sai mak di debah kekuasaan manusia. Meskipun injuk reno, ram mak ngeliak tano manusia bekuasa atas sunyin hal.

⁹Kidang ram radu ngeliak Isa bekuasa! Ia dijadiko cutik lebih rendah jak malaikat untuk waktu sai singkat, in atas kebetikan hati-Ni Allah Ia dapok mati untuk sunyin manusia. Ram ngeliak Ia tano dikeniko pangkat sai mulia rik tehormat mani Ia radu menderita sampai mati.

¹⁰Sangun radu sepatutni Allah — sai nyiptako sunyin hal untuk maksud-Ni tenggalan — nyani Isa penyelamat sai sempurna liwat penderitaan. Jama seno Allah dapok ngurau lamon jelma untuk nutuk diagungko jejama Isa. Mani iado sai ngebukak jalan bagi tian untuk dapok diselamatko.

¹¹Isa ngecahko manusia jak dusa-dusa tian; rik Ia sai ngecahko, rik tian sai dikecahko udi, jejama ngedok sai Bak. Udi sebabni Isa mak meliom ngaku tian ano sebagai puari-puari-Ni.

¹² Isa cawa jama Allah, “Nyak haga ngabarko jama puari-puari-Ku tentang Niku. Nyak haga memuji Niku di delom pertemuan tian.”

¹³ Isa cawa juga, “Nyak haga nyerahko harapan-Ku jama Allah.” Rik Ia cawa juga, “Injido Nyak, jejama sanak-sanak sai radu dikeniko Allah jama Nyak.”

¹⁴Ulih sebab jelma-jelma sai Ia sebut anak udi, iado makhluk manusia sai dapok mati, maka Isa tenggalan jadi gegoh jama tian rik hurik sebagai manusia. Ia nyani injuk reno, in jama kematian-Ni Ia dapok ngehancorko iblis sai nguasai kematian.

¹⁵Jama cara injuk reno Ia ngebebasko jelma-jelma sai seumor hurik dibudakko mani rabai jama kematian.

¹⁶Nyatado bahwa lain malaikat sai ditulung-Ni, melainko keturunan Abraham.

¹⁷Inji retini bahwa Ia harus jadi gegoh jama puari-puari-Ni delom sunyin hal. Rik renodo Ia dapok jadi Imam Agung sai setia rik ngedok rasa kesian. Jama pelayanan-Ni ano dusa manusia dapok diampuni.

¹⁸Rik mani Ia tenggalan pernah menderita rik dicubai, Ia dapok nulung jelma-jelma sai tekena cubaan, mani Ia tenggalan pernah dicubai rik menderita.