Read Lampung Api IBRANI 3 Bible Online

IBRANI 3 - Lampung Api bible

IBRANI 3

¹Puari-puari peperda Kristen sai radu diurau juga ulih-Ni Allah! Cuba pikerko relam-relam tentang Isa inji! Allah ngutus Ia khusus untuk jadi Imam Agung delom agama sai ram anut.

² Ia setia jama Allah sai radu milih Ia untuk guai seno, injuk juga Musa tumbai setia nunaiko tugasni di Lamban Ibadah.

³Kidang Isa patut mansa kehormatan sai lebih langgar jak Musa. Mani jelma sai ngebangun lamban harus mansa kehormatan lebih langgar jak lamban udi tenggalan.

⁴Sangun unggal lamban wat sai ngebangunni, kidang sai ngebangun sunyin hal iado Allah tenggalan.

⁵Musa setia sebagai jelma sai ngebantu di delom Lamban Ibadah rik nyampaiko hal-hal sai haga dikeni pandai ulih-Ni Allah pada masa sai haga ratong.

⁶Kidang Almasih setia sebagai Anak sai betanggung jawab atas Lamban Ibadah. Rik ram iado Lamban Ibadah, kik ram tetap besemangat rik tetap yakin untuk mansa api sai ram harapko.

⁷ Ulihni seno, injuk ani Ruh-Ni Allah, “Kik rani inji niku ngedengi suara-Ni Allah,

⁸dangdo niku keras ulu, injuk nenek muyangmu, waktu tian berontak tehadap Allah, rik nguji Allah di padang heni.

⁹‘Di dudi nenek muyangmu nyubai Nyak, rik nguji Nyak,’ ani Allah, ‘padahal tian radu ngeliak perbuatan-Ku epak puluh tahun sakani.’

¹⁰Udido sebabni Nyak butong tehadap tian rik Nyak cawa, ‘Tian selalu mak setia, rik malas naati perintah-perintah-Ku.’

¹¹Nyak butong rik besumpah, ‘Tian mak haga kuruk mik negeri ano untuk mansa istirahat jama Nyak.’ ”

¹²Puari-puari, hati-hatido dang sampai wat di hantaramu jelma sai hatini jahat nihan rik mak beriman, sehingga ia murtad rik ngejaohi Allah sai hurik!

¹³Jadi, in mak ngedok sai jelma pun jak hantaramu sai ketipu, ulih dusa sehingga nantang Allah, hagani keti saling ngeni petuah unggal rani selama ram masih hurik delom zaman sai disebut “Rani Inji” delom Alkitab.

¹⁴Ram sunyin iado kantik seperjuangan jama Almasih, asal ram sampai akher nyating teguh keyakinan sai ram miliki pada mulani.

¹⁵ Injido sai tetulis delom Alkitab, “Kik waktu rani inji niku ngedengi suara-Ni Allah, dangdo niku keras ulu, injuk nenek muyangmu, waktu tian ngeberuntak tehadap Allah.”

¹⁶ Nah, sapa jelma-jelma sai ngedengi suara-Ni Allah raduni ngeberuntak tehadap-Ni? Udido sunyin jelma sai dipimpin ulihni Musa luah jak Mesir kan?

¹⁷Rik tehadap sapa Allah butong epak puluh tahun sakani? Tehadap tian sai bedusa, sai tumbak mati di padang gurun, kan?

¹⁸Waktu Allah besumpah injuk reji, “Tian mak haga kuruk mik negeri ano untuk mansa istirahat jejama Nyak” — sapa muneh sai dimaksud ulih-Ni Allah? Sai dimaksud iado jelma-jelma sai ngeberuntak tehadap Allah, kan?

¹⁹Tano ram ngerti bahwa tian mak dapok kuruk, mani tian mak percaya jama Allah.