Read Lampung Api IBRANI 4 Bible Online

IBRANI 4 - Lampung Api bible

IBRANI 4

¹Nah, janji Allah masih belaku, rik ram haga dikeni istirahat sai dijanjiko-Ni. Jadi, hagani ram ngejaga dang wat sai jelma pun jak hantara keti sai ternyata mak ngerasako istirahat sai dijanjiko udi.

²Mani Kabar Betik udi radu dikabarko jama ram gegoh injuk jama tian. Kidang jama tian, kabar udi mak ngedok gunani. Mani waktu tian ngedengini, tian mak percaya.

³ Kidang ram sai percaya nerima istirahat sai dijanjiko Allah udi. Udi cucok jama api sai dicawako Allah, injuk reji, “Nyak butong rik besumpah, ‘Tian mak haga kuruk untuk mansa istirahat jejama Nyak.’ ” Allah cawa injuk reno meskipun guai-Ni radu selesai radu jak Ia nyiptako dunia inji.

⁴ Mani tentang rani kepitu, wat tetulis delom Alkitab injuk reji, “Di rani kepitu Allah beristirahat jak sunyin guai-Ni.”

⁵ Tentang hal ano ditulis lagi injuk reji, “Tian mak haga kuruk mik negeri udi untuk mansa istirahat jejama Nyak.”

⁶Jadi tian sai mula-mula ngedengi kabar tentang Kabar Betik udi, mak nerima istirahat udi mani tian mak percaya. Kik injuk reno radu jelas bahwa wat jelma-jelma bareh sai ngasi nerima istirahat udi.

⁷ Mani Allah radu nantuko suatu rani sai lain lagi, sai disebut “Rani Inji”. Betahun-tahun jak seno Allah cawa tentang hal ano liwat Daud, delom ayat sai dikutip jeno, “Kik di rani inji niku ngedengi suara-Ni Allah, dangdo niku keras ulu.”

⁸ Kik seandaini Yosua radu ngeni jelma-jelma udi istirahat sai dijanjiko Allah, maka Allah mak haga cawa lagi tentang suatu rani sai bareh.

⁹Jadi bagi umat-Ni Allah masih wat janji untuk istirahat injuk Allah beristirahat pada rani sai kepitu udi.

¹⁰ Mani jelma sai nerima istirahat sai dijanjiko Allah jama ia udi, haga beristirahat juga jak sunyin guaini, gegoh injuk Allah.

¹¹Ulihni seno, ijado ram berusaha temon-temon untuk nerima istirahat sai dijanjiko Allah udi. Dang sampai sai jelma pun jak ram gagal injuk tian tumbai, mani mak percaya jama Allah.

¹²Cawa-Ni Allah anodo cawa sai hurik rik kuat; lebih tajam jak pedang bemata rua. Cawa udi nusuk sampai mik batas hantara jiwa rik ruh; sampai mik batas hantara sendi-sendi rik tulan sumsum, sehingga ngemandai serelam-relamni pikeran rik niat hatini manusia.

¹³Mak ngedok sai makhluk pun sai tesegok jak pengliakan-Ni Allah. Sunyin hal jelas tebukak di hadap-Ni. Rik ram harus ngeni pertanggung jawab jama Ia.

¹⁴Udido sebabni ram harus nyating teguh pada pengakuan kepercayaan ram. Mani ram ngedok Imam Agung sai langgar, sai radu kuruk sampai di hadap Allah — Iado Isa Anak-Ni Allah.

¹⁵Imam Agung ram udi lain hak imam sai mak dapok nutuk ngerasako kelemohan-kelemohan ram. Sebalikni, Ia radu dicubai delom sunyin hal, gegoh injuk ram tenggalan; angkah Ia mak bebuat dusa!

¹⁶Ulihni seno, ijado ram ngebaniko diri ngehadap Allah sai memerintah jama betik hati. Allah haga mengasihi ram rik ngeberkati ram in ram mansa tulungan tepat waktuni.