Read Lampung Api IBRANI 6 Bible Online

IBRANI 6 - Lampung Api bible

IBRANI 6

¹Ulihni seno, ijado ram maju mik ajaran-ajaran sai lebih lanjut tentang hurik Kristen sai dewasa, rik dang angkah ngeperhatiko dasar-dasar mula-mula ajaran agama ram. Dang ram ngulangi lagi ajaran dasar bahwa jelma harus taru ngelakuko hal-hal sai mak beguna rik harus percaya jama Allah,

²atau ajaran dasar tentang pembaptisan atau tentang ngepikko culuk di atas jelma, atau tentang hurik luot radu jak mati atau hukuman sai kekal.

³Ijado ram, kik Allah mengizinko, maju mik ajaran-ajaran sai lebih lanjut!

⁴Mani, jelma-jelma sai radu murtad, mak mungkin dibimbing luot. Tian tumbai radu wat di delom terang jak Allah, rik radu ngerasako pengenian-Ni. Tian radu juga nutuk dikuasai ulih Ruh-Ni Allah.

⁵Tian pandai jak pengalaman tian bahwa cawa-Ni Allah udi betik rik tian radu ngerasa karunia-karunia sai lamon kuasa jak zaman sai haga ratong.

⁶Kidang radu jak seno tian murtad! Dipa mungkin ngebimbing tian muloh untuk betubat lagi jak dusa-dusa tian. Mani tian sedang nyalibko luot Anak-Ni Allah rik nyani Ia dihina di hadap umum.

⁷Tanoh sai ngehisap way labung sai risok gugor di atasni, raduni ngehasilko tanoman-tanoman sai beguna untuk jelma sai nanomni, tanoh udi diberkati ulih-Ni Allah.

⁸ Kidang kik tanoh udi ngehasilko lioh rik tanoman keruwi, maka tanoh udi mak ngedok gunani rik kanah haga dikutuk ulih-Ni Allah rik akherni disuah bela.

⁹Kidang Puari-puari sai tecinta, sekalipun sekam cawa injuk reno, kidang sekam yakin tentang keti. Sekam yakin bahwa keti radu nerima hal-hal sai lebih betik, yakdo berkat-berkat sai ngerupako bagian jak keselamatanmu.

¹⁰Allah lain hak Allah sai mak adil. Ia mak ngelupako api sai keti guaiko bagi Ia, rik kasih sai keti tunjukko jama Ia sewaktu nulung puari-puari seiman, tumbai rik tano.

¹¹Sekam mirak nihan in keti masing-masing terus besemangat sampai akher, sehingga keti nerima api sai keti harap-harapko udi.

¹²Sekam mak haga keti jadi malas. Kidang sekam mirak in keti hurik injuk jelma-jelma sai nerima dijanjiko Allah, mani percaya jama Ia rik mani sabar nunggu.

¹³Waktu Allah bejanji jama Abraham, Ia besumpah bahwa Ia haga ngelakuko api sai radu dijanjiko-Ni. Rik mani mak ngedok sai lebih langgar jak Allah, maka Ia besumpah atas gelar-Ni tenggalan.

¹⁴ Ia cawa, “Nyak bejanji haga ngeberkati niku rik nyani keturunanmu jadi lamon.”

¹⁵Abraham sabar nunggu, maka ia nerima api sai dijanjiko Allah jama ia.

¹⁶Kik ulun besumpah, ia besumpah atas gelar ulun bareh sai lebih langgar jak ia, maka sumpah udi ngeakheri sunyin bantahan.

¹⁷Allah haga negasko jama jelma-jelma sai nerima janji-Ni, bahwa Ia mak haga ngerubah rencana-Ni. Udi sebabni Ia nambah sumpah jama janji-Ni udi.

¹⁸Rua hal ano mak dapok berubah: Allah mak mungkin bebuhung tentang janji rik sumpah-Ni. Ulihni seno, ram sai radu belindung jama Allah, dikeni durongan kuat untuk nyating teguh jama harapan sai tebentang di hadap ram.

¹⁹ Harapan ram ano injuk jangkar sai tetanom relam nihan rik ngerupako catingan sai kuat rik aman bagi hurik ram. Harapan udi nembus hordeng Ruang Mahasuci di Lamban Ibadah di surga.

²⁰ Isa radu ngerintis ranglaya mik rang udi untuk ram, rik radu kuruk mik disan jadi Imam Agung ram untuk selama-lamani, injuk Imam Melkisedek.