Read Lampung Api IBRANI 9 Bible Online

IBRANI 9 - Lampung Api bible

IBRANI 9

¹Perjanjian sai mula-mula ngedok atoran-atoran ibadah, rik ngedok juga rang ibadah sanini manusia.

² Sai kemah dibangun sai bagian hadapni digelarko Ruang Suci. Di dudi wat cukut untuk lampu, rik wat juga mija jama ruti sai dipersembahko jama Allah.

³ Di bagian delomni, yakdo di kudan hordeng sai kerua, wat ruangan sai digelarko Ruang Mahasuci.

⁴ Di delom ruangan udi wat mezbah sai disani jak emas untuk nyuah dupa, rik wat juga Peti Perjanjian sai sunyinni dilapis emas. Di delom Peti udi wat belanga emas ngisi manna, tungkok Harun sai radu betunas, rik rua lempeng batu tulis sai di atasni tetulis puluh perintah jak Allah.

⁵ Di atas Peti udi wat rua Kerub, yakdo makhluk bekepi sai melambangko kehadiran-Ni Allah. Kepi jak kerua makhluk udi terkembang di atas salok Peti, yakdo rang pengampunan dusa. Kidang sunyinni udi mak dapok diterangko tano secara terurai.

⁶ Injuk renodo sunyinni diator. Unggal rani imam-imam kuruk mik delom bagian hadap kemah udi untuk ngejalanko tugasni.

⁷ Sai kuruk mik bagian paling relam jak kemah udi angkah imam agung gaoh. Ia ngelakuko udi angkah sekali setahun. Udi dilakukoni jama ngusung rah untuk dipersembahko jama Allah mani dirini tenggalan rik mani dusa-dusa sai dilakuko tanpa sadar ulih umat-Ni.

⁸Jama atoran tersebut, Ruh-Ni Allah jelas nunjukko bahwa selama kemah bagian hadap udi masih cecok, renglaya kuruk mik delom Ruang Mahasuci udi makkung tebukak.

⁹Inji ngelambangko zaman tano; retini bahwa persembahan-persembahan rik kurban-kurban binatang sai dipersembahko jama Allah, mak dapok nyempurnako hati jelma sai ngusung persembahan.

¹⁰Mani upacara-upacara udi angkah bekenan jama kanikan, inuman, rik lamon macam upacara penyucian. Sunyinni angkah atoran-atoran laher sai belaku angkah sampai waktu Allah nyani atoran sai ampai.

¹¹Kidang Almasih radu ratong sebagai Imam Agung jak hal-hal sai betik sai radu wat. Kemah Tuhan di dipa Ia ngeguaiko tugas-Ni sebagai Imam Agung iado kemah sai lebih agung rik lebih sempurna. Udi mak disani ulihni manusia; retini lain asalni jak dunia sai diciptako inji.

¹²Almasih kuruk Ruang Mahasuci di delom kemah udi angkah sekali gaoh untuk selama-lamani. Waktu seno Ia mak ngusung rah kambing bakas atau rah anak jawi untuk dipersembahko; ia ngusung rah-Ni tenggalan, rik injuk reno Ia ngebebasko ram untuk selama-lamani.

¹³ Rah jak kambing rik jawi bakas rik hambua jak kurban anak jawi, dipakai untuk ngerecak ulun-ulun sai najis nutuk atoran agama in tian jadi mekecah.

¹⁴Nah, kik rah rik hambua udi dapok ngecahko kenajisan jelma-jelma udi, apilagi rah-Ni Almasih! Liwat Ruh sai abadi, Almasih mempersembahko diri-Ni tenggalan jama Allah sebagai kurban sai sempurna. Rah-Ni ngecahko hati ram jak upacara agama sai mak beguna, in ram dapok ngelayani Allah sai hurik.

¹⁵Udido sebabni Almasih jadi Sai Ngantakko suatu perjanjian sai ampai, in jelma sai radu diurau ulih-Ni Allah dapok nerima berkat-berkat abadi sai radu dijanjiko ulih-Ni Allah. Sunyinni ano dapok tejadi mani radu wat sai mati, yakdo Almasih; rik kematian-Ni udi ngebebasko jelma jak kesalahan-kesalahan sai tian lakuko waktu perjanjian sai mula-mula masih belaku.

¹⁶Kik wat surat warisan, harus juga wat buktini bahwa jelma sai nyani surat udi radu mati.

¹⁷Mani surat warisan mak belaku selama jelma sai nyanini masih hurik. Surat udi belaku angkah seraduni ulun udi mati.

¹⁸Ulihni seno perjanjian sai mula-mula pun harus disahko jama rah.

¹⁹ Mula-mula Musa nyampaiko sunyin perintah hukum Allah jama bangsa Israel. Radu jak seno Musa ngakuk rah anak jawi rik rah kambing bakas, raduni nyamporko jama way, kak raduni ngerecakkoni jama Kitab Hukum-hukum jak Allah rik jama sunyin bangsa Israel jama makai jukuk hisop rik bulu biri-biri warna suluh tuha.

²⁰Sambil ngelakuko ano Musa cawa, “Injido rah sai ngesahko perjanjian jak Allah sai harus keti taati.”

²¹ Kak raduni jama cara sai gegoh, Musa ngerecakko rah udi juga di Kemah Tuhan rik di sunyin alat-alat untuk ibadah.

²² Sangun nutuk hukum agama Yahudi, hamper sunyin hal disuciko jama rah; rik dusa angkah diampuni kik wat pertumpahan rah.

²³Jama cara injuk renodo barang-barang sai ngelambangko hal-hal sai di surga, perlu disuciko. Kidang untuk hal-hal sai di surga udi tenggalan diperluko kurban sai jaoh lebih betik.

²⁴Mani Almasih mak kuruk mik Ruang Suci sanini manusia, sai angkah ngelambangko Ruang Suci sai sebenorni. Almasih kuruk mik surga tenggalan; di disan Ia tano ngehadap Allah untuk kepentingan ram.

²⁵Imam agung Yahudi unggal tahun kuruk mik Ruang Mahasuci di delom Lamban Ibadah jama ngusung rah sai binatang. Kidang Almasih mak kuruk untuk mempersembahko diri-Ni berulang-ulang.

²⁶Mani kik injuk reno, udi retini Ia radu berulang-ulang menderita radu jak dunia inji diciptako. Kidang nyatani, tano waktu zaman akher inji, Ia ratong sekali gaoh untuk ngehapus dusa jama ngurbanko diri-Ni tenggalan.

²⁷Allah radu netapko bahwa manusia mati sekali gaoh rik radu jak seno diadili ulih Allah.

²⁸ Injuk reno juga Almasih sekali gaoh dipersembahko sebagai kurban untuk ngehapus dusa lamon jelma. Ia haga ratong lagi waktu kerua kalini, lain untuk nyelesaiko persoalan dusa, kidang untuk nyelamatko jelma-jelma sai nunggu ratong-Ni.